Цхьоал

                Цхьоал

       Ший ханара болча к1аьнкел дуккха теннаг1а а низ болашаг1а а вар Тухан. Из бахьан ч1оаг1а доаккхал деш вар из. Латара т1ера вар Тухан. Классе ца1 вацар цунах вухьаш. Цхьаккха йи1иг йисацар цо е мос ца озаеш, е увзорга 1адаца пхолг ца тохаш.
      Кхыметтел шийца парта т1а ваг1а Султан доска т1а водаш ког духьалтесса барталвожавир цо.
      Шийл воккхаг1вар а ларх1ацар Тухана. Ший даь-нанас яхар дацар. Цо шийга раьза йоацаш х1ама аьлча, бат а эзе аравоалар. Ж1алешта т1ой деттар. Циск дитацар ц1ог увзадеш.
    - Хьо ишта хуле цхьаь вусаргва хьо, - аьннадар цунга дас. Бакъда, Тухана цхьоал фуд хацар.
     Классера бераша «Тух», аьнна ц1и тиллаер цох. Тухана, цар из оалаш хезадале а, хацар из цар шийх тилла ц1и йий.
    Цхьан дийнахьа ц1аг1а ваг1аш сагот а денна ловза аравьалар Тухан. Баь т1а бургацах ловзаш боахкача шийца деша баг1ача к1аьнкашта д1ат1аволавелар из. Гаьннара из воаг1аш баргвайна бераш шоай бургац хьа а ийца, цхьан к1аьнка коа д1ачубахар.
    Царна эг1аз а ваха, эг1ахьа «классикех» ловзаш йоахкача йи1игашта 1от1аволавелар Тухан.
   - Тух доаг1а, Тух доаг1а! – аьнна д1а-юха яйдар йи1игаш а.
    Т1аккха хайра Тухана, бераша шийх ц1и тиллалга. Из ч1оаг1а хала хийтта, коа пазаташ еш яг1ача даь-наьна йолча вахар Тухан. Бакъда даь-нана, укхунна раьза йоацаш, хьа ца хьожаш яг1ар, корта хьал ца айбеш. Цу г1улакхо корзаг1ваьккха Тухан, ведда ц1ент1ехьашка вахар. Дийхка латта ж1али ер б1аргагушше а бун чу иккхар.
    Кхы ваха моттиг а йоацаш ц1ен йисте велха 1охайра Тухан. Цигга велхаш ваг1аш дагадехар цунна дас аьнна дешаш:
   - Хьо иштта хуле цхьаь вусаргва хьо.