Хьавай нани

                Хьавай нани
   Г1айг1ане корах арахьежаш яг1а Хьава, кора т1а латта зизаш д1а-са а тетта. Малх хьежаш, сийрда, къаьга хоза ди да тахан. Ц1аг1а сатийна я. Нани  а д1атхьайсай.
  Кхы саг вац ц1аг1а. Цхьабараш балха бахаб, вожаш берий беша ба.
  «Укх шера а берий беша ца йохийташ йитар-кх со», - йоах Хьавас ше-шийца.
   Ай нани цхьаь ма хургйий, аьлар цунга мамас, садике яхийта со, аьлча. Йоаккха нани ч1оаг1а дукхаезар Хьавайна. Цунна фу деза хьожар. Хий, молха бурилг д1алора, даьцешта из д1аяла йицъелча, дага а ехе.
  Нани меттара хьаг1атта аьнна г1ертача, сихха цун г1аджа маьчеши д1алора.
  -Нани, тахан хоза ди да хьона, фега араг1о хьайна, - оал Хьавас, нани ше уллачара д1а-са хьайча.
   -Даьра йи1иг, нане хоза денош д1а-ма дахад, къаеннай хьа нани, ког баккха а магац, - йоах нане ше уллачара меттахьа  ца йоалаш. Бакъда, з1амига Хьавай керте из кхетадац.
 -Хьо–м яннаяц къа. Вай лоалахо Кайпа еннай хьона къа, - йоах цо  - Х1аьта а, мишта сих алел хой хьона из?
  Лоалахо Кайпа ч1оаг1а г1ийла кхалсаг яр. Цох «къаенна Кайпа» оалар Хьавас ший дагахьа. Соахка га д1айоаккхача хана, фу даьд цунна, аьнна хаьттача, дас аьлар цунга, къаеннай ер, хьажал мишта йокъаеннай. Цудухьа моттар Хьавайна, къавенна саг г1ийла а волаш хила везаш санна.
   -Хьо в1алла а къаеннаяц хьона, нани, - йоах Хьавас. – Хьажал, хьа басилгаш мишта ерста, ц1е я, - Нани хьест Хьавас, басилгах барташ а доахаш.
   - Ай, д1адала сонна, зудилг, - йоах нане, Хьавас дувцача къамаьло ч1оаг1а догг1оздоакх цун. Шийна ца моге а, шорттига хьалг1отт нани.
  - Йолле хьо, са йи1иг, ара-м даьра г1оргда вай шиъ.
  - Нани, хьай мора кухта хьат1аювха, ара мух болаш сана хетт сонна, - йоах г1адъяхача Хьавас.
  Цхьан бе кухта а йоаллаш, шоллаг1ча кулгаца нане кулг а лаьца коа т1а арайоал Хьава.