1аьржа чоапилгаш

                1аьржа чоапилгаш

    1аьржача  чоапилгах ч1оаг1а кхерар Мадина. Дегаза, б1еха хетар цунна уж, во хьаж йоаг1аш санна а хетар царех. Из шоашта гучадаьлча денз Марета а Марема а йитацар из. Чоапилгаш гул а йий, ер 1оюжаш, укхун ювраг1а к1ал йохкар. Х1ама дагадоацаш, 1ойижа аьнна Мадинас ювраг1а хьалъабешшехь, мета г1олла д1а-юха йовдар уж. К1айча кисе т1а уж кхераенна латтача Мадинайна кхы а йоаккхаг1а хетар.
   -Ай! Д1аяха уж! – ц1ог1а  доалар цунга. Цу г1улакхах ч1оаг1а сакъердам хулар йижарашта. Цкъа цар шийна леладер юхадекха дагадехар Мадинайна. Уж кхерабе лаьрхар цо.
   Йижарий етт бета баха кийчлуш бар цхьан сарахьа. Ара баьдъеннаяр. Ц1аьхха коара а ц1аг1ара а лампаш д1аяйра.
   -Кхий чу баьде я. Со кхер. Соца я еза хьо, - аьлар Марета Маремага. Царел хьалха яха, кхий чу а иккха, 1атта хьалхашка, хьай чу дадача г1адамашта к1ал лечкъар Мадина. Етт укхо леладечоъ ца кхеташ, ше дуаш хина г1адамаш а дита, д1аэттар. Хьачубаьлар кхий чу йижарий.
   -Тхьоврехьа сийрда йолаш 1обийттабалара вай ер. Ма баьде я укх чу, аьлар Марета. Т1аккха царех ца1 етт бета йолаелар. Хьахезар ведарах етталуча шурий к1ажараша ду тата. Из болх юкъекхаьчача ханна, ше уллачара, т1ехьнахьа дада г1адамаш а дахьаш, ураг1а йолаелар Мадина. «Т1ап» аьнна, ше беш бола болх соцабир Марета, дувца къамаьл соцадир Марема. Йист ца хулаш, цкъа хьай долчахьа хьажар уж шиъ, т1аккха шоайла б1арахьажар, т1аккха латтачара д1аметтахьалийлхар. Хьалха Марем араиккхар кхий чура. Т1аккха  ведар бе йоалла Марет, цкъа пенах, цкъа на1арсанаг1а кхеташ, цунна т1ехь-т1ехьа араиккхар. Царна т1ехьа елаш чуиккхар ц1аг1а Мадина. Б1аргех хий даллалца йийлар из царех.
   Кхы ший мета 1аьржа чоапилг б1аргаяйнзар цунна