Хьаст

                Хьаст
       Яхаш лелаш цхьа йоккха саг хиннай. Цхьа во1 хиннав цун, Хьаст яхаш ц1и а йолаш. Ч1оаг1а боча хиннав из. Цо из дукха  хьийстандаь, Хьаст аьнна ц1и тиллаер цунах наха. Майра, низ болаш, ц1аг1а-ара де мел дезар деш, мекъал ца йоаллаш, г1улакхаца, эздел долаш вар Хьаст. Ший ц1аг1а меттел, юрта бахача наха новкъостал дора цо. Дахча даккха дезачоа, дахча доаккхар; лаьтта аха дезачоа, лаьтта оахар. Эшача г1о де кийча хулар.
     Хозача моттиге улар цар юрт. Гонахьа хьу, гувнаш, баьццара буц. Цхьа х1ама дар юрта эшаш. Ч1оаг1а гаьнара кхахьа дезаш дар хий.
     Цхьан дийнахьа, нах хий доацаш бисар. Лекъадар хи тоатолг. Цхьа хи т1адам бисабацар. Юртара нах  раьза а хина, хий лаха аравоал Хьаст. Ши ди, ши бийса доакх цо наькъа водаш. Хьун юкъег1олла, гувна т1ара гувна т1а вувлаш, никъ бу цо. Боккхача кхеранна юххе сала1а 1охов из. К1аьдвалар котдаьле, тхьовс. Г1а гу цунна. Ч1оаг1а дуне сийрдадаьккха, цхьа воаккха саг гу, шийна духьалвоаг1аш. Й1аьха г1адж бе а йоаллаш. Юрта юкъе, баьца т1аг1олла г1адж хьекха, герга го булл воккхача сага. Чамеца лаьтта хьаэц, т1аккха гонна арахьа 1одохийт, бакъда 1ододача  цох, лаьтта т1оада а деш, хий хул.            Сомавоал Хьаст, фу дича бакъахьа да ца ховш, цхьа ха йоаккх. Т1аккха ц1авода.
     Хий доацаш Хьаст ц1авеча, раьза хилац юртара нах. Царга х1ама д1а ца оалаш, юрта юкъе вода Хьаст. Воаккхача сага г1анахьа хьийха моттиг ахка отт. Юртара нах, йист ца хулаш, цо дечох цецбаьнна, цунга хьежаш латт. Корта мара б1арга ца гуш, къайлавоал из, лаьтта охкаш.
    Х1ама хургдий хьог1, аьнна, цунна хийттача хана, когаш т1оадабеш, хий гучадоал. Юртара нах ч1оаг1а г1адболх. Хих йиза йиш мел йоа пхьег1а юз. Бакъда хий кхоачалац, хий лаьттана к1алхара духдувл.
    Цу хана денз, Хьаст аьле ц1и д1айода цу моттигах.