Мишта лаьцар чано гуйре

                Мишта лаьцар чано гуйре

      Ч1оаг1а хоза гуйре латтар хьунаг1а. Ц1е, 1ажаг1а, баьццара г1аш доахкар гаьнаш т1а, бакъда мух хьекхача лаьтта легар, халха а дувлаш.
      Цхьан дийнахьа царга хьежаш яг1ар ча, баьцах хьаж а йоахаш. «Ма дика дар-кх массахана иштта латтаре»,- йоах чано ше-шийца. Михо лаьтта легадеча г1ашца, гуйре д1айодаш сана хетар цунна. Уйла йир цо. Мишта, фу дича соцаергъяр хьог1 гуйре? Т1аккха дагадох цунна, гизгашка а аьнна, дуккха мазаш а даь, гуйре хьалаца.
      Удаш йода пхьагал гу цунна. «Гуйре хьалаца новкъостал де сона», - дехар ду чано пхьагалга. «Аз фу новкъостал дергда хьона?» - хоатт пхьагало. Шийна дагадехар д1адувц чано, т1аккха оал: «1а, хьунаг1а г1олла го а боахаш, гуйре гизгмазаш долча хьайоалае, т1аккха из, мазашца хьа а лаьца, ц1аг1а лочкъаергъъя вай».
       Гизгаша мазаш ду, гаьн т1ара гаьн т1а а ювлаш. Хьунаг1а г1олла го баха йолалу пхьагал. Из б1аргагу цогала. «Гуйрено корта б1агорбоалабаьб хьа ва пхьагал?» - аьле, кхайк из цунга. «Хье сиха деце, гуйре лаца чан новкъостал дудалара 1а», - дехар ду пхьагало. Пхьагало дувцачох ч1оаг1а цецдаьнна цогал ча йоалча дода.
       Гуйре мичахьа кхаьчай хьажа аьнна, гаьн т1а яьннача чана гу цхьа 1ажаг1а х1ама удаш йоаг1аш. Гуйре йоаг1а мотташ г1адъяха ча, «хьалаца, хьалаца…» - аьле ц1ог1а а техе, гизга мазаш долча чукхет.
       Цун ц1аг1а хьахеза пхьагал ча йоалча йод. Хьакхаьчача пхьагала гу гизгмазашта юкъейоалла цхьа х1ама, «Гуйре лаьцай, гуйре лаьцай», - ц1ог1а детт пхьагало, бакъда ча-м гучайоалаш яц. Хьалаьца гуйре, д1аг1оргйоацаш, теркаеш, бургац сана мазашта юкъейоалла ча ц1аг1а чуйоакх пхьагало. Чан йистхала в1ашт1ехьдалац. Пхьагало ни1 т1акъовлалехь, чан кхийра цхьан т1одаца пхьагала лергаш лаца. Шоллаг1а т1одаца чано лоац пхьагала леладечох кхераденнача, юха хьунаг1а дада аьнна кийчденнача цогала ц1ог. Ше гуйре лаьцай мотташ йоалча чано лергаш а ц1ог а карардалийтац.
      Цхьаккха а кот ца воалаш, бийса хьат1айоаг1а. 1уйре еча, деррига лаьтта къайла а доаккхаш, хьунаг1а лоа дилла хул. Оззадаь, пхьагало ший лергаш мукъадоах, т1аккха цогала новкъостал ду. Ц1аг1а чухьажача, царна гу мерза наб кхийтта тхьайса улла ча. Даггара из сомаяккха г1ийртача, х1ама хилац. Ни1 д1акъайла, шоайла б1арахьож уж.    Пхьагала д1аьха лергаш б1аргадайна цогал, саца ца могаш делалу.
     «Хьай ц1огага хьажа хьо», - оал цунга пхьагало. Д1аьхденна, лаьтта уллаш дола ший ц1ог б1аргадайна цогал, эг1аздахе, пхьагала т1акхет. Пхьагал к1отаргаш йоалчахьа йод. Цу хана денз цогали пхьагали шоайла товш дац.
      Х1аьта ча х1ара шера, гуйре д1аяхача, б1арччача 1ан тхьайса улл.