Доттаг1ий

                Доттаг1ий

      Беслани Руслани ши доттаг1а вар. Цхьан дийнахьа ч1оаг1о йир цар, ц1аккха а даьсса къамаьл дувцаргдац вай, к1оарга чулоацам бар мара аргдац вай воайла а нахага а, аьнна.
      Шоллаг1ча дийнахьа доттаг1ий в1ашаг1кхет. Хоза б1аьстен ди дар лаьттар. Хьежаш малх, гаьнашта теха зизаш. Ашараш лекхаш оалхазараш лелар, гаьн т1ара гаьн т1а а дувлаш, феца к1ормацаш лелар.
     «Ма хоза ди да вайна таханардар», - аьнна, ала дагадох Беслана. Цох Руслана к1орга чулоацам болаш къамаьл цахетар кхераш, йистхилац из.
      Ше тахан школе Любайна даьр дувца дагадох Руслана. Массахана «ручка ба сонна, къоалам ба сонна», яхаш, из к1орда а яь, къоаламаш леладеча г1утакха чу н1аний а дехка, д1акъайла г1утакх Любайна еннаяр цо. Люба кхераялар а, ше цунах велар а Бесланага дувца безам хина Руслан, йист ца хулаш 1а. К1орга чулоацам болаш да из е дац хацар цунна.
     Ше сийсара Русланага хата лаьрх1ар ца хоатташ ваг1ар Беслан. Ший з1амаг1а йола йиша кхетае магацар цунна «кхоне» яхача дешах.
    «Маца йоаг1аш я из кхоане, тахан йоаг1аш я ма аьннадарий 1а сога, тахан-м тахане ма йий, кхоне мичай?» - яхаш, сийсара готтаваьвар цо Беслан. Русланагара новкъостал деха лаьрх1адар цо, бакъдар аьлча, бакъахьа да е дац ца ховш, х1ама аланзар.
     Ведда водача Мурада юхег1олла т1ехьэккхаш оал: «Султанар Рыжикас бакъилг яьй. Д1аьха диткъа когаш а долаш, хьажъюкъе к1ай седкъа а латташ, шийна б1арга мел яйнар 1увшаш, букъа кулг хьекхача кхувсалуш, ч1ог1а сакъердаме я из. Цунга хьажа доаг1ий шо?»  Шоайла б1ара а хьежа, йист а ца хулаш 1а доттаг1ий.
     Ди сайранга дода, 1охайша баг1ача доттаг1ий хьал ца г1овташ. К1аьнкаш зувш ваг1ача воккхача сага, ц1енгахьа леста доттаг1ий шийна юхекхаьчача оал, «Маьржа-я1… шун хана валар-кх со, ишта даьсса д1а-м дохийтаргдацар аз ер мо хоза ди».
     Доттаг1ий цхьатарра совц, т1аккха шоайла б1ара а хьежа, Султана ц1а долча оаг1арахьа чехка д1алелх.