Машарца д1адирза дов

                Машарца д1адирза дов
     - Хьа воша латаш воалл ишколен коа, - Азас а аьнна, классе чуйода Лиза арайод. Ишколе коа дукха боккха а з1амига а к1аьнкаш бар, го а баь гулбенна. Удаш Лиза д1ат1аяхача,  гон юкъе кхоалаг1ча классе ваг1а ший воша Батыри цунна духьалалатта к1аьнки гу цунна. Веший классера к1аьнкаш Лизайна бовзар. Из царех вацар. Дуккха Батырел воккхаг1а хила везаш вар из. Дег1а лакхаг1а а теннаг1а  а вар. Шортта, ше гуча а ца йоаккхаш, д1ахо фу хул хьож Лиза.
    - А, а… Совцабе уж, лата ма латийта,- йоах Лизай лерга юххе Азас.
    -К1езига сабардергда вай, - оал цунга Лизас.
    Шийна духьалалаттача к1аьнка т1ера б1арг а ца боаккхаш, ший гибоалла т1орми лаьтта 1ооттабу Батыра. Т1аккха шийна т1аювха коча пхьош хьалъоз. Боккхаг1а болча к1аьнкаша даггара шиннена  а 1оттараш ю, уж сихаг1а лотабе г1ерташ. Духьалалатта к1аьнк хьат1акхета кийчвеннача хана, шортта ший коча пхьош хьанийсадир Батыра. Лаьтта 1обилла хина т1ормиг юха шийна качъолл, в1алла сих а ца луш.
   - Ай… Батыр, кхеравелар хьо? Лата х1ана латац хьо? – аьнна, шийга гонахьа латтачар хаьттача: - Со ишколе лата ахац, деша ух, - аьле, ц1енгахьа ласт Батыр.
   К1аьнкаш цецбаьле, йист а ца хулаш бус. Цхьаццабараш белалу.
   Сайрана ц1аеча Лизас: - Лата х1ана латанзар хьо? – аьнна шийга хаьттача: - Ай, б1аргавайрий хьона из? Цо цхьа бий техача, со-м атаг1а кхоачаргвар. Эшачул дикаг1а деций иштта из дов д1адерзадича? – йоахар Батыра


Рецензии