Дийна ябакх

                Дийна ябакх

    Ябакх хьаханна ха яр из. Ч1оаг1а хоза хетар Мадинайна кхехкаяь ябакх юаш. Кхерзар а хетар цунна мерза. Тхоасара из кхарза нана ц1аг1а яцар, Азас кхорзаргйоацилга ховра цунна:
    -Аза, са йишилг ма йий хьо, ябакх кхехкае вайна,  -  хьоастаенна, ший йоккхаг1а йолча йишийга дехар дир Мадинас.
    -Ай, шортта даа х1ама ма дий вайга. Ишта дукха яа йиш яц. Г1анахьа духьалъухаргья хьона ябакх, - аьлар цунга Азас. Цхьабакъда, Мадинайна б1арахьажача, доккха са а даьккха, ябакх я йода из.      Г1адъяха кхувсалуш, цунца йода Мадина.
    -Ма къиза ювш латт оаш из,- оал Асхьаба, ябакха диг детташ йоалла Аза б1аргаяйча, - дийна я шоана из. Цунца хина Аслан велалу.
    -Из-м яц дийна, -оал Мадинас, к1иръенна ябакха б1арахьежа.
     Йоахаь ябакх ийца йижарий д1абахача, йоаккха, герга ябакх хорж Асхьаба. Диг а техе, ябакх чура ц1енъе отт из. Т1ера ч1ор мара ца дуташ, чухьнахьа мел яр арайоаккх цо. Ябакхах, герга а йолаш, яьсса кхабилг хьахул, фуннаг1а чуйотта йиш йолаш. Асхьаба леладечох ца кхеташ, цунна б1арахьежаш латтар Аслан. Шийна дагадехар даь валлалца, х1ама хьаоалаш оамал яцар Асхьаба. Яьсса ябакх истола т1а 1о а оттаяь, б1аргашта тара, герга а долаш, ши 1ургилг доакх цо. Т1аккха, цергашта тара кхалингаш а йоахкаш, й1аьха баге йоаккх. Ше баьча балха б1ара а хьежа, Асхьаб велалу.
    -Х1анз шунцига даха деза вай, - оал цо, - баьдъерзалехь цхьа х1ама лаха еза вай, дика йоагаргйолаш.
    Аслана, ший даь машен лоаттаеча ц1аг1ара, хьамча ч1егилг лу цунна.
    -Ер я хьона вайна езар, - г1адвода Асхьаб.
   Хьамча ч1егилг аьшкасаьргаца й1аьхача г1ажа т1а хьорчаяь, бензина чу 1отт цо. Аслана ц1аг1ара ц1илеторгаш а ийце, кийчъяь улла ябакх йолча бовд к1аьнкаш. Ара баьдъеннаяр. Ц1аг1а лампаш сегаяр. Ц1ен корах чухьежача, пишка юххе кхийхка ябакх оаркхо чу юллаш йоаллар Аза, т1ехнахьа 1агица шекар а тоссаш. Мадина х1ама дуача истола йисте латтар.
  -Лотае! – оал Асхьаба.
   Бензин теха хьамча сиха лоталу. Ше кийчъяь улла ябакх, бе йоаллача г1ажан боагаш бола бухь чу а баьккхе, хьалг1оттаю цо.
   Ч1оаг1а унзара сурт дар Аслана б1аргадайнар. Доагаш б1аргаш а долаш, й1аьха йийлача бага, ирача цергашта юкъе, боагаш ала а болаш, дийна ябакх яр Аслана хьалхашка лаьттар. Аслан йистхилалехь, корах п1елг а теха, ше б1арга а ца вайташ, кора лохера йоагаш йола ябакх ураг1ъяхийтар Асхьаба.
   Азайна бе баьлла 1аг, песок а т1ехьа, лаьтта бож. Мадина къайлаэккх. Асхьаб виззалца вийла а вийла, ц1аг1а чувеча, Аза ше лаьттачара меттаг1ъяланца яр. Мадина, д1а-юха хьажача, гуш яцар.
  - Мадина мичай? – аьле, Аза шин кулгаца оагаю Асхьаба.
   - Цхьа унзара х1ама я вай коа, - оал йи1ига, воша б1аргагушшехь.
   Мадина лаха отт уж, «Мадина, Мадина», яхаш, ц1ог1а а детташ.Г1ар-тата дацар Мадинай. Маьнге к1алха, саьн чу хобаенна, пенах лата яг1ар Мадина. Асхьаба ч1оаг1а дехар дир, Мадина маьнге к1алхара араяккха г1ерташ.
  - Ай, Мадина, ябакх яр хьона из, со вар хьона из лотаяьр, - яхаш, йи1иг меттайоалае г1ертар ше даьчох дехкеваьнна Асхьаб.
   Ведда ваха, ше  лотаяь хьамча а д1ахьокх цо йижарашка, яьга ябакх б1аргаяйча, Мадина юха а кхераяле, Азайна т1акхет.
    -Кхы-м йоаг1аргъяц хьона ер вайцига, - яхаш, ябакх когашца йохаю Асхьаба.
    Дика ха яьккхар Мадинас ябакх хьоа ца еш.  Х1аьта Асхьаба кхетадир бегаш а бе-бе хулга.