Циска тийшаболх

                Циска тийшаболх

     Дукха ха хьалха хиннад из. Шоайла т1ера долаш, ц1аккха а ца къувсаш, цхьана юаш, дувшаш, ловзаш, хоза безаме цхьана дахаш хиннад циски, ж1алий, цар ц1ен-даи.
  Цхьан дийнахьа коа шоай г1улакхаш деш боахкача хана, хьунаг1ара ара а ийкха, цхьа ийрча акха х1ама т1айод царна. Из б1аргаяйча, кхеравенна, ц1ен-да дог г1елделе вож, г1а а баккхалехь. Х1аьта циск, коа яг1ачагаьн т1а а кхоссадале, г1аьнашта юкъе къайладоал. Лечкха к1алхара дала ж1але а кхувргдар, лаьтта улла ший ц1ен-да б1аргавайна, ца додаш 1ийна мара. Цунна ч1оаг1а дукха веза ц1ен-да акхача х1аманна вусаргвар. Ший ц1ог ура а оттадаь, бирса б1ара а хьежа, геттара ч1оаг1а 1аьха, акхача х1аманна т1адод ж1али, ц1ен-даьнна из х1ат1акхачалехь. В1ашаг1лат уж, д1а-юха ух цар царгашца хьадоаха чеш. Шоайла латаш, хьунаг1а къайладоал, котваьннар малаг1а ва ца ховш. Дукха ха йоакх циско, лакхера царех юха малаг1а воаг1а хьежаш, гаьн т1а даг1аш. Бакъда, хьунаг1ара гучайоалаш х1ама яцар. Садовш латтар, циско гаьн т1ара 1одаьнна, ц1ен-да, мотт хьекхаш, меттавоалаваьча хана.
   -Фу яр из? Мича яхар из? – аьнна, хоатт фусам-дас.
  - Ай… Из-м цхьа лоадам боаца х1ама яр, в1алла а чам бацар, - оал циско.
   -Ж1али…Ж1али мичад вай?
   -Ж1али-м хьо а со а дагадохача дацар хьона, сов кхераденна. Ше к1алхардаьнна г1аддаха, х1анз а ц1енах кхийтадац. Хьона-м из сол дукхаг1а а ма дезарий.
    Ше акхача х1амех к1алхарваьккха циск марх1а а деле, ц1аг1а чувода ц1ен-да. Т1аккха циска, хьаьста шура а лу.
    Шоллаг1ча дийнахьа сайранна, ч1оаг1а к1адденна, цхьацца моттигашкара 1оухаш ц1ий а долаш, моцалла чукхийтта б1аргаш а долаш, ц1адоаг1а ж1али. Ц1аг1а чудаьнна ж1али б1аргадайча, ц1ен-да йистхалалехь, й1айхача пишка юххе дика диза даг1ача циско оал:
  - Хьажалахь укханга, б1арга х1ама ца гуш, иддад мотт сонна ер-м. Сов гаьндала дезацар хьона. Из-м цкъа кхаллал мара яцар.
    Къувса долалу уж. Ж1але бакъдар духьалдоакх циска, циско шийдар дувц. Цхьаккха а котвалац. Харцо ювцача циско корзаг1даьккха ж1али цисках лата т1адод. Циск, сиха ура а ийккхе, ц1ен-да ваг1ача дод. Ц1ен-дас, циск марх1а а деле, ж1али фоарт лаьцце ц1аг1ара аракхосс:
  - Хьайх тешам боабаьб 1а, ер ков да хьа ц1а, - аьле.
   Цу хана денз, ж1алии циски шоайла товш дац. Циск б1арга мел гуча хана, ж1али из лаца г1ерт. Х1аьта циск, ше х1ама йиа даьлча, ц1ендала отт.