Тамашийна ди

                Тамашийна ди

       Тухана б1аргаш хьаллекхача, хозача б1аьстен маьлха з1анараш яр корах чухьежаш. «Тахан-м цхьа хоза, тамашийна х1ама хила деза, - аьнна, хетаделар Тухана, - ишта хоза доаг1а ди, дика х1ама ца хулаш, д1адаха йиш яц».
       Меттара хьалг1етта, к1увса т1а отт из. Пхьарсаш ураг1а а дахийта, шина оаг1ора сотталу. Юхь-кулг а диле, нанас даь д1айха чаьпилг дуъ цо. «Чай мала»,- яхаш, нана кхайкашше, даь трактора т1а хов из. Ч1оаг1а хоза хетт Тухана, дас трактора кабина чу ше хайтача, бакъда дукхаг1а долча даькъе, дас шин кулгаца хьалкхессе, лаьтта оттавора из.
     Трактора кабина чу ваг1а Тухан б1аргавайча, да велакъеже, дош ца оалаш 1а. Трактора кабина корах ара а хьежаш, аьха къалт1адаькхача лаьттан муг1араш дагардеш ваг1ача Тухана ше-шийца йоах: «Маца хургда хьог1 тамашийна х1ама».
      Делкъел т1ехьаг1а нанас наб е вужавора Тухан. Тахан-м наб дагайохаш саг вацар. Воккхаг1а волча вошас шийца хьунаг1а вуг из, ший доттаг1ашца. Ч1оаг1а хоза яр хьунаг1а. Хоза, сийна, к1ай зизаш даг1ар хьуна юкъег1олла бодача наькъ йисте, 1ажаг1а баппах бомбаргаш хьахиннаяр. Багара фо а детташ, бомбаргаш ловзаеш, Тухана хьунаг1а гобоахар. Гаьна г1аьнашта юкъег1олла наькъаш дехкаш, маьлха з1анараш яр лаьтта хьежаш. Баьца т1ара гизгий мазаш малхо къоагадаьдар. Лаьтта г1олла тувсалуш лелар цхьа хоза ткъамаш дола хьазилг. Тухана дагадох: «Маца хургда из тамашийна х1ама?»,- аьнна.
     Хьунаг1а баьдъерза йолаелча, вежарий ц1аболх. Б1арчча дийнахьа тамашийна х1ама хиларга хьийжача Тухана хоз, дас наьнага оалаш: «Ч1оаг1а хоза, тамашийна ди дар тахан хиннар». Т1аккха кхетаду Тухана тамашийна х1ама леха ца дезилга. Тамашийна х1ама да х1ара денна хулаш дар. Лаьтта, хьу, хьазилг, зиза – деррига тамашийна х1ама да. Уж уйлаш дег чу йолаш, хоза наб кхет Тухана.