Доттаг1а

                Доттаг1а


        - Доттаг1а хувца веза са, - аьлар Ахьмада, ишколе лелабу т1орме г1анда юхе 1о а тесса.
        - Доттаг1а? – цо аьнначох ца кхеташ, юхахоатт цунга воккхаг1а волча вошас. - Мишта доттаг1а хувца веза?  Хувца веза доттаг1а доттаг1а вац. Малав хьа хувца веза доттаг1а?
         -Беслан ва кх, - доккха са доаккх Ахьмада. – Тахан математика хьехаш вола хьехархочо аьлар цунга «ишта мара 1а математика 1ома ца йой, шоллаг1ча классе д1ачуваргвац хьо, доттаг1а а хувца везаргва хьа т1адоаг1ача шера», - аьнна. Цо доттаг1а хувцаш хилча, са а хувца везаций доттаг1а? – йоах Ахьмада.
         Ахьмади Беслани, з1амига болча хана денз, цхьана лелар, карт мара юкъе йоацаш баха а бахар. Ишколе а цхьан парта т1а баг1ар уж. Бакъда Беслан ч1оаг1а сиха к1аьнк вар. Таьрахьаш в1ашаг1тоха, т1ерадаха уйла е сатем бацар цун. Цудухьа цо шийна дагадехараш увттадора, примераш беча хана. Цхьа таьрахь латтача  ца1 оттадора, шиъ латтача – шиъ. Ахьмада математика урок дукхаг1а езар. К1аьд ца луш, примераш беш ваг1ар из, таьрахьаш в1ашаг1детташ, т1ерадоахаш.
        - Шун хьехархо бакълув, - оал цунга вошас - Беслана хувца а веза доттаг1а. Доттаг1ий иштта хилац, шоайла новкъостал ду… Хьо цамогаш хиннача хана, шийна лазар кхетар ца кхераш, из хьона юхера д1аваланзар, х1ата хьо таьрахьаш бахьане из хувца кийча ва…
         Ахьмад вешийга ладувг1аш ваг1ар, корта чу а баха.
         - Т1аккха… фу де деза аз? – оал цо.
         -К1езига уйла 1а йой, хьайна ховргда хьона, - аьле воша аравол.
          Ахьмада дагадох: тика т1а дахача, Беслана ахча сихаг1а дагардора, къоалам а боацаш. Математика цаховш хилча, из де йиш йоацилга Ахьмада ховра.  Х1ама диа ваьлча, «Математика» яхаш дола книжка а ший тетрадь а ийца, Ахмад Бесланарга вода.