1ойожар

                1ойожар

        Елхача Заретай г1ар хезе, х1амашта аьшк тохаш йоалла Зарема арайод. Коа яг1ача боалий ган к1алха, шина кулгаца б1аргех 1оуха хий д1а а доахаш, елхаш латта Зарета гу цунна.
       -Ай, фу хиннад укхаза, фу даьд хьона, елха сенна елх хьо? – аьле, Зарета, марх1а а елле, хьоаст цо.
       -1оежай со…- йоах Заретас, елхаш къургаш а деш.
       - Мишта, мичахьара? – хетт Заремас.
        -Хьанз…аз д1ахьокх хьога, - елхар соца а дий, боалий гаьн т1а йоалл Зарета, т1аккха боалий ган юххе йоаллача кхоален тхов т1а йоалл, горахай, кхоален тхов кхочалучу кхоач, хьалъура а этте, боалий ган ткъовро лаца, аьнна, цо кулгаш ураг1дохийташшехь, ког лайжа а лайже, Зарета лакхера лаьтта йож. Лаьттара хьал а г1етте - Ишта 1оежай со, - аьле, юха ч1оаг1аг1а елха йолалу Зарета шозлаг1а лаьттах кхийттача моттигах кулг а хьекхаш. Цунга фу адда ца ховш, йист а ца хулаш, Зарема латтача хана:
       - Фу даьд са йи1ига, хьан елхаяьй из? – яхаш, коа чуйоаг1а тика т1а яха даь-нана.
       - Нани, 1оежар со, - яхаш, цунна духьалйод Зарета.
       -Мишта ежар хьо? – аьнна, хаьттар йоккхача сага.
       - Ишта ежар, - яхаш, Зарета боалий га яг1ача оаг1орахьа йийрзача, Заремас сихха шин кулгаца соцаю из.
       -А..а.., нанега аз дувцаргда, - йоах Заремас, ела а елаш.