Чкъаьрийдоахар

                Чкъаьрийдоахар

        Ч1оаг1а хоза хетар Анзора веший з1ак. Й1аьха г1адж яр из, сийнеи ц1еи т1алета т11ирг йоаллар цох. Кхестаеш, вошас елла, йиткъа т11ирг йоалар, даггара озайича хада а ца хадаш. Т11иргах теса йоаллар ц1еи к1айи  бесаш дола хи т1аг1олла лела х1ама. Цох «поплавок» оал аьннадар вошас цунга. Чкъаьран даар дола аьнна, гоама корта бола хьастам а боаллар з1ака юхье. Каст-каста вошас шийца чкъаьрий лувца вугар Анзор, бакъда з1ак-м хьалуцар.
      -З1амига ва хьо х1анз а, чкъаьро хьо а з1ак а д1ахьоргда, - аьннадар цо, шийга Анзора дехар дича.
     Хоза ахкан ди дар. Юрта юкъег1олла додача хи чу лувча бахар доттаг1ий.
      - Чкъаьрий лувций вай? – хоатт Беслана Анзорага.
      - З1ак доацаш мишта лувц вай уж? – юхайистхул маьлхе вокъалуш улла Анзор.
      - Кулгашца…, кхертой к1алхара…, сона б1аргадайнад ишта лувчаш, - йоах Беслана. Ура а лийлхе, хила чулелх к1аьнкаш. Шинне а безам бар эггара хьалхаг1а чкъаьра лаца. Доккхача а з1амигача а кхерт1ой к1алха кулгаш ахийта болабелар уж. Беслана каракхаьчабар, бакъда цхьан кулгаца лаьца чкъаьра, карарбаьнна бахар. Хий к1оаргаг1а долча кхаьчар уж, кхертой доккхаг1а дар. Анзора кулгаш боккхача кхерт1онна к1алха дахийтача, цхьа х1ама лаьцар цо.
    -Лаьцаб, лаьцаб, - ц1ог1а техар цо.
    - Шина кулгаца лацалахь, - яхаш, хи чуг1олла хьат1авод цунна Беслан.
     -Кортеи ц1оги лаьцад аз, кхерто т1ера д1абаккха, - йоах Анзора, ше лаьца чкъаьра д1а а ца хецаш.
    - Боккха бий? – хетт Беслана, шинна кулгаца кхерт1о ший оаг1орахьа хьа а тетташ.
    - Боккха бий хац сонна, б1аьха-м ба хьона, - йоах ч1оаг1а г1адвахача Анзора. Бе боалла чкъаьра б1аргабайча, йистхила аьнна йийла баге д1а ца къовлаш юс Беслана. Цун унзардаьнна б1аргаш Анзора кулгаш т1ара доалаш дацар. Т1аккха мара хьажац Анзор ше лаьцачунга. Аьтта кулгаца Анзора лаьцабар б1ехала корта, аьрда кулгаца – юкъера. Ц1ог детталуш дар. Цхьа ха яьккхар к1аьнкаша йист ца хулаш, шоайла б1арахьежаш. Хьалхаг1а ц1ог1а техар малаг1а вар царна х1анз а хац. Хи цицхаш детташ, когаш шоаш мичахьа бетт ца ховш, хьалха Беслан, т1ехьа Анзор, бе боалаш б1ехал а болаш, хи чура арабовд уж, даггара хьекхаш ц1оаг1арч а долаш. Берда йисте баг1а к1аьнкаш:
    - Д1ахеца, д1ахеца, - яхаш ц1ог1а деттар. Бакъда Анзор х1ама хьахозача вацар. Анзор вошас хьалаьцача хана, б1ехала ц1ог детталуш дацар. Ч1оаг1а то1абоь, бийнабар цо из. Берда йисте мел бараш гонахьа гулбелар царна. Анзор кхеравенналга гуча ца дала а мегар, цхьабакъда Беслана б1аргаш хих диза дар, из футтарвеш х1ама ала кийча бар цхьаццабараш.
    - Ма ч1оаг1а кхеравеннавар со, - аьлар Анзора, вела а вена. Из цо аьлча, к1аьнкаш белабелар. Беслан а велавелар. Дукха ха ялалехь, з1амига долаш з1ак ийцар цунна вошас.
   - Х1анз бокъонца вола чкъаьрийдоахар ва хьо, - аьнна.