Аквариум

                Аквариум


     - Ишта мара хьона аквариум лелае ца хой, аз Азайна лургъя из, - аьлар балхара ц1аенача нанас. Аминас ч1оаг1а дехар даь,  чкъаьрий, хи чу хула садоахка х1амаш, баьцаш лело кизга яьшка оттаяьяр нанас.
    - А..ма ле… Х1анз урокаш яь яьлча хьожаргъя со цунга… - йох ц1аг1ара болх беш яг1ача Аминас. Аквариум б1ехъенна дукха ха яр. Чулела чкъаьрий, баьцаш гуш яцар. Б1ехача хих шийтайпара хьаж йоаг1ар. Цхьа ха йоаккх Аминас, урокаш яь а яьнна, качъяда гизгий бурилгаш цхьан кулгаца ловзаеш, аквариума б1арахьежаш яг1аш. Ч1оаг1а дезар цунна, хий ц1енденна, чкъарий а буц а гучадаьлча. Бакъда мед дукха Амина б1архьажарах хий меттаг1доалаш дацар. Ше хиннача беса б1еха латтар аквариум.
    -Кхоана а ди даог1а вайна-м, кхоана ц1енъергъя аз…-  аьле, Амина 1оюж.
Ц1аьхха Амина сомаэккх. Аминай кога п1елгах каетташ чкъаьра боаллар. Кхераенна Амина ураэккх. Лакхача гаьн т1ара хи чу йож из, качъухка гизгаш, ган ткъовронах тоссаеле, йох. Еррига бурилгаш 1о а легаш. Уж гулъе аьнна Амина эттача, цунна б1еха долча хи чу х1ама кораяг1ац.
    -Г1а да ер, сомаяла еза…- йоах цо, дег1а м1арилгаш а етташ.
     Бакъда гушдар г1а дацар. Хи чу садаккха фо таацар Аминайна. Ер т1ера чуежа га а яцар гуш. Кхераенна, удаш йода Аминат, цхьан х1амах ког кхийте, лаьтта йож. Дикка хьежача, ког кхийттар бенна чкъаьра болга кхетадир цо. Астаг1а а лелхаш, Амина ни1 йоацача ц1аг1а чуйоал. Д1а-юха удаш, цхьа х1ама лелар ц1аг1а г1олла.
      -Малав укхаза, йист х1ана халац хьо? – ше кхераенналга д1а ца хайта ч1оаг1а ц1ог1а тох Аминас.
      -Со, ма баа… со ма баа…- яхаш, хоз цунна.
      - Аз х1ама дергдац хьона, гучабала, - юхайистхул Амина.
      Хий оага а деле, з1амига чкъаьрилг гучабоал. Кхераденна детталора чкъаьрилга дег1.
      - Фу ханнад укхаза, кхера сенах кхер хьо, укхаза баьдеча сендухьа лечкъаб хьо? – хаттараш ду Аминас. Ч1оаг1а цецъяннаяр , чкъаьрий мотт шийна харах, - Ер хила йиш яц, г1а да ер, -йоахар цо ше-шийца. Духьала улла чкъарилг йистхилар цунга.
      - Чоаг1а хувцаденнад хьона тха вахар, б1ехденна хий, къахъенна буц, даа доаца х1ама, мала, мичахьа вах хац, хьанах кхера веза, малаг1а чувита веза хац, фо а таац садаккха…
      - Дукха ха йий шо иштта даха? – аьнна, Аминас хаьттача, чкъаьрилг йистхиланзар, тхьовра деттаденна чкъарилга ц1ог оллденна улар.
       -  Аквариум, са б1еха аквариум я ер, - ц1ог1а техе, сомаэкх Амина. Урокаш е хайнача  яг1ар из. – Ма дика да из г1а долаш, - оал цо, качъулла гизгий бурилг лаца  аьнна кулг хьал  а дахийте. Кач гизгаш ядацар. Сихха аквариум латтача йод из. Б1ехача хи чу ядаш  т11иргах хьаяьнна гизгий бурилгаш гу цунна.
      -Йита, кхоана юлларгъя 1а, - оал цунга, цо леладечох ца кхеташ яг1ача нанас.
      - А…а ..тахан, тахан, - йоахар, наьнага букъ берзабаь, хи чура гизгий бурилгаш гулъеш йоаллача йи1игу.