Дахка

                Дахка

       Дахаш – лелаш цхьа воккха саги цхьа йоккха саги хиннад. Шоаш хьегача къих таро йолаш, хьал долаш, дика дахаш хиннад уж. Т1адувха, даа, наха дала х1ама хиннад царга, бакъда ц1а даьсса хиннад.  Берий г1ар хиннаяц ц1аг1а хозаш. Из бахьане, ч1оаг1а г1айг1а яй цар.
      Цхьан бийсан г1а дайнад воккхача сага. Ц1аг1а г1олла удаш лийнай  цхьа х1ама. Ц1аккха царна яйна х1ама хиннаяц из.  Хьайба да из, оалхазар да, аькха да кхета де йиш хиннаяц.  Биъ ког баьллаб, д1аьха ц1ог даьллад, лаьтта г1олла текхадеш. Из лаца аьнна,воккхача сага кулг д1акховдадича, ч1оаг1а лозавеш, царг техай цунна, воккха саг сомаваьннав.
      Цу шера к1аьнк ваьв цунна. Дахка аьнна ц1и тиллай. Вича денз х1ама ца дуаш, хий ца молаш, массахана велхаш, дукха ха яьккхай к1аьнка. Цунна фу деза ца ховш, ч1оаг1а к1аьдлуш хиннад да а нана а, доллача х1амах догъийккха, хий мала аьнна ше беделла пела лаьттах теха дохадаьд дас. Т1ап, аьнна, велхар соцадаьд к1аьнка, велавеннав. Боккхий нах г1адбахаб. К1аьнк велха волавелча, цхьацца х1ама йохаеш, вурийтта шу даьннад Дахкан. Бакъда боккхийча наха 1алаш мед даьр, шер-шера к1езиглуш, кхоачаденнад.
      Саг йоалаяь, Дахка хувцаваларга догдоахаш, боккхача наха саг йоалаяьй цунна. Бакъда е Дахка е цун сесаг къахьега безам болаш хиннабац. Из халахийтта да, нана дог даьтта деннад. Дас-нанас 1оа мел даьр сихха чакхдаьккхад Дахкас. Т1аккха наьха х1амаш лечкъае волавеннав.
      Цхьан бийсан х1амаш лочкъае аьнна ц1аг1а чуваьнна Дахка гучаваьннав ц1ен-даьнна. Ведда, дахча лоаттадеча подвала чу 1очуийкхав из. Подвала чу, е гали да е т1адувха барзкъа да ца ховш, х1амаш ядаш хиннай. Ше б1аргагургвоацаш уж х1амаш шийна сихха хьат1айийхай Дахкас. «Т1оах, т1оах»,- аьнна б1аргаш сийрдадаьннад цун, т1аккха, корта б1агорабена, лаьттах кхийтав. Дахка биъ когара эттав, е велх е вела ца ховш, оаз яьннай цунгара. Цун даьнна г1анахьа б1аргадайнар хьахиннад цунах.  Из лаца аьнна, подвала чу чулийлхача наха б1аргадайнад, дахча т1аг1олла дахка беда араэккхаш.