Догилг

                Догилг

     Ахкан т1ехьара ди да. Дийнахьа й1айха яле а, бийсан-м шийла хул. Шийна эггара дукхаг1а еза теник бе а елла, коара арайоал Аза. Лоалахой коана1арга латташ ши йи1иг б1аргагу цунна. Ца1-м 1айна я, Тамаре веший йо1. Азайл цхьа шу йоаккхаг1а йола из, г1алий т1ара хьоашалг1а енай юрта. Х1аьта цо кулг лаьца латтар Азайна йовзаш яц. Царна д1ат1аяхача, Аза ч1оаг1а цецйоал. Гаьннара цунна йи1иг хийттар, Аза миссел лакха а йолаш, теник я. Керта т1а шляпилг, хоза коч, маьчешта метел когаш т1а пазаташ ювх цунна.
    - Ер са Фатима я, - оал 1айнас. Т1аккха Азайна бейоалла теник б1аргаяйча: - Ер малий вай? Малаг1ча кхалаж т1ара кораяьй? – яхаш, Фатимай кулг д1а а хийце, елалу 1айна. 1ойожаш латта Фатима, лаьтта кхачалехь, хьалоац Азас. Т1аккха ший теника б1арахьож. Х1анз цун хьайза хиннача мосех харшаш мара дисадац. 1ойижача д1акъовлаш, урахайча хьалакхаш хиннача б1аргех ца1 боацаш ба, шоллаг1бар, меттаг1 ца боалаш, массахана Азайна б1арахьеж.
     - Догилг, - аьнна, жоп лу Азас.
Из д1ахеза 1айна, соца а ца луш, ел.
     - Дог, догилг…, - йоах цо елашшехь. Б1аргех хий даллалца ел из, т1аккха: - 1а из д1акхоссе, аз сай Фатима лургья хьона, - оал.
     Фатима ч1оаг1а хоза хийтар Азайна. Кулг лаьца, Азас хьатеттача, ше ког баьккхар тенико. Карта йисте яг1аш йолча йоккхача йоарх1ашта юкъе кхосс Азас ший беяьлла тиша теник. Хьалхаг1а д1а-юха лостайича «Ма-ма» оалар Догилго, х1анз-м йист ца хулаш, йоарх1ашта  юкъе къайлаяьлар из.
     Ди д1адода, йи1игаш Фатимайца ловзаш. Сайран, теник Азайна и йите, 1айна чуйода.
    Ч1оаг1а г1адъяхача Азас Фатима ший маьнге т1а 1оюжаю.
    «Т1ох! Т1ох!» - яхаш, кора т1а детталу дог1ан т1адамаш хоз Азайна. Чехка кор долчахьа йод из. Ара ч1оаг1а мух баьннаб. Дог1а долалуш латт. Цхьаккха х1ама т1а ца ювхаш, ерзана йоархашта юкъе улла Догилг дагайох Азайна. Х1анз хацар цунна, дукха еза Догилг йоархашта юкъе д1акхосса шийна мишта мегаьд. Ши б1арг д1а а къайла уллача Фатимайна б1арахьож из.
   - Езаш яц хьо сонна, - йоах цо.
   Т1аккха эг1азйода из, шийга Догилг д1акхосса аьннача 1айнайна. – Во я хьо.., во я хьо…, со а яц дика… - доккха хи т1адамаш долалу цун б1аргех.
    - Ай, мича йода хьо? – яхаш, нанас ц1ог1а детташехь, сиха ц1аг1ара араэккх йи1иг. Коара ара а яьнна, ше Догилг д1акхесса мотиг йолча ер д1акхаьчача, цига, йоарх1ашта юкъе, кулгаш хьекхаш йоалла 1айна гу цунна.
    -Догилг шелъялалехь хьалаха еза, - йоах 1айнас.
  Шинна а йи1ига цхьатарра корайоаг1а Догилг.
    - Хьай Фатима д1аэцалахь, аз Догилг д1акхоссаргъяц хьона, - йоах из кораяь г1аъяхача Азас.
   - А! Фатима аз хьона еннай. Догилгаца ловзаргъя из. Когаш баха 1омалургъя…
   Ц1аг1а, д1айхача хица Догилг лувча а йий, Фатимайна юххе 1оюжаю Азас.
     «Селла во а хиннаяц из 1айна-м», - йоах цо ше-шийца.