Джинсовый хачи

                Джинсовый хачи

- Ай, фу деш воал хьо? Ц1ен хачеца ийнаш дуллаш воала-м хуг вац? – хазар Рамзана, ни1 ела аьнна кулг айдаьча хана, сесага оаз.
    Сесагага юха техача багено айдаьча дитар кулг.  «Эъ..» - аьннача виссар из ший латтача. «Хийттар-кх сона из, хал йиш яц из во1ий оаз?» - йоахар цун дего. Бакъда, ц1аг1ара во1ий оаз чоаг1луш латтар. Шийна хазадецарий из тешаг вацар цо иштта баге етт аьлча.
   Аьнна-м аьннадар цунга сесаго, къезига хьехар де далар 1а цунна харцвалалехь.
 - Д1аяла, цун хана-м хул иштта, къезига воаккх халач меттвоаг1аргва – аьнна 1ийнавар из. Ч1оаг1а кхо вора цо ц1аъ мара воаца во1. Х1адеча х1амаг1 къалхарвоаккхар, хало ца халийта хьожар.
   Доаккха са а даьккхе ни1 елл Рамзанас. Ц1аг1а чу ваьлча  го цунна швабраца ийнаш дулаш воала ший во1. Б1аргех хий даьнна латта ший сесаг.
   Да б1аргавайча соца бир Алихана хьал-1а хьекхаш хина, сийна х1ама бихье йоала швабр.
   - Ийнаш дила дог эттад хьа? – аьнна хаьттар цо ший во1ага.
 Йист хиланзар во1. Ишта хьалха да ц1авоаг1агвий хацар цунна.
   - Даьр воал ший джинсовый хачеца дуллаш – аьлар сесаго – ц1ен ер шийна цаэцарах раьза а воацаш, аз тиш хаче лелаегъяц йоах.
    - Раьза вац ях 1а? – хаьттар дас, - Тиш елий-м ювхийт йиш яц ц1аъ мара воацача во1га. Хьалмаг1а а ваьнна г1андат1а 1о хайра да.
    – Хьахьокхал – т1атехар цо.
  Алихана швабр хьалъайбо шийх йоала хачеца.
   - А..а.. ишта сона ховддац, т1айиха хьаж вез…хьат1аювхал…
  Алихана б1аргаш шераделар. «Т1ада хачи мишта ювх аз?» - йоахар цар, бакъда даьна б1арахьажача Алихана кхетадир дас бегаш ца белга.
   З1амигача ц1аг1а 1ачу а ваьнна, ийнашта хьийкха,  т1аьда хачи т1аювх  Алихана.
   Дас, к1аьнк хьовзавалийте, оал - Из енна а енний тиша, кхоана вай шиъ г1оргда ц1ена джинсовый ер эца. Бакъда, из х1анз хьайна т1аювхар, кхоана долхаш т1аювха кийчъелахь, 1айха… хьай кулгашца  йитте.  Хьанз… ийнаш дила герме ле уккханна – аьлар цо ший сесагага – доладаьр чакхдакха деза къонахчо.
    Шоллаг1ча дийнахь, сатоссаш г1отта а ваь: «Керда джинсовый хачи эца долх вай» - аьнна кхайта оасар де вигар дас Алихан.