Буратино

                Буратино

    «Мухьмад, юха хьаоттабе сона из…»- аьле х1ара дийнахьа дехар дора Мажита. Т1аккха фаьлг йисте балалца меттахь ца воалаш, йист ца хулаш в1аг1агвар, къирвенна б1арахьежаш.
    Эрси меттала бола «Буратино» яха фаьлгах кхоъ шу даьннача Мажита фу кхетаду Мухьмада хацар, бакъда цо деха мел дехача хана цун из юха  а хьаоттабора.
    Цхьан дийнахьа Мухьмад ишколера ц1авеча Мажита дехар дир: «Дукха х1амаш е ма хой хьона, дахчах сона Буратино вел хьай…»- аьнна.
    Мухьмад кулгговзала 1омаеш йола ишколе ухар, цига дукха дахчах, топпарах х1амаш йора цо.
    «Маьгаьд, ег я хьона аз,» - аьннача Мухьмада дага а дацар, мел хала худда Буратино хьа еш. Эггара халаг1а дар цун й1аьха хьалхьайза мераж е. Кхоъазза д1акхассар цо мераж кег а луш болабаь болх. Кулгаша е когаш е хьастамаца хьат1лоттаде йиш яле, мераж е хьастамца, е хьамчаца лота е йиш яцар, кертаг1а йолаш хала езар.
    Дукха ваьлар Мухьмад меражаг1. Шийна мел хьийхар, ший мел йоа говзал т1аяхийта цхьан дийнахьа йисте ваьлар «Буратино» яха дахчах теник я. Хьехархочо ч1оаг1а хоастабир баь болх.
    Г1адваха ц1а вера цу дийнахьа Мухьмад.
    Мажит юха а «Буратино» яхача фаьлгага хьежаш ваг1ар. Шортта цун ши кулг хьа а лаьце 1ачуюл Мухьмада дахчан баьха бухь бола мераж йола Буратино.
    Хьежаш ваьг1а фаьлг биц а бенна цхаь ха йокх Мажита теникат1ара б1арг ца боаккхаш.
    Ше шийна хьат1аийца декхар дика чакхдаьккха раьза вола Мухьмад х1ама хувца д1ачу вод. Юха чу ваьлча шийна б1аргдайначоа ч1оаг1а цец вокх  из.
    Урсаца теника й1аьха мераж  д1ахоада а я, йисара нисъеш воалаш го цунна Мажит.
    «Ай…Буратино…Буратино ма йий из…» - аьлле ц1ог1а тох цо.
   «Хов сона… укхан ер-м лоцъе могад дар сона… цхьаккха саг вайна вий хьона иззал й1аьха мераж йолаш…» - йоахар Мажита ше беш бола болх соца а ца беш.