Унзара х1ама

                Унзара х1ама

   Цхьа таьда мосаш йоахкаш йоалла х1ама бата 1от1акхийтта сомаэкх Тома. Шинна кулгаца из д1акхосс шийна т1ера цо, из пенах а кхийтте йож лаьтта, т1аккха «топ…топ…»-  аьлле йод.
   Сихха ураиккхе лампа сог Томас. Д1а-юха хьож, цаг1а саг вацар. Амина илла маьнги баьсса бар.
   «Амина, Амина…»- аьнна Тома йист хиллача саг юхайист хиланзар. Ц1аг1ара ара йод Тома.
   Эхки бераш сало1а лагерь ер из.
   Бус ювхаю йиткъа коч а ювхаш, берзан когашца, на1ара юххе, букъ пенах теха, гергаенна лаьтта яг1ар Амина.
  Унзардаьнна доаккха б1аргаш дар Томайга хьежаш… «Фу?... Фий из?...»- йоахар цар.
   «Хац сонн-м, хьо уккхаза яг1а дукха ха йий?» - хаьттар цунга Томас
   «Цхьа – ши сахьат…»
  Тома йийчеча доалла сахьатага хьажача ткъо минот кхоаллаг1чоа яьннаяр.
   «Воспитателига оалий вай?...» - аьлар Аминас.
   «Алац даьр, цхьа-ши сахьат хьалхаг1а ала дезар… Цкъа из фий хьожадда вай. Из дошдоаца х1ама хуле еррига лагерь елаг я вайг1а».
   Хьалха Тома а йоалаш, т1ехьа йоаг1ий ца ховш шортта Амина а йоалаш, шоай ц1аг1а юха чу болх ераш. Аминас ни1 йийла ютт. Ц1аг1а чу ялча кхы маг1а а ялац.
   Тома ц1аг1а г1олла д1а-юха хьож. Цар ц1аг1а кхы дукха х1ама а латтацар. Ши маьнги, цхьаъ шкаф, ши тумбачка.
   Шортта шкафчу хьож Тома. Акхар, т1адувха барцкъал совг1а х1ама яцар цу чу. Тумбачкача а х1ама яцар.
   Аминай маьнги к1алха хьож Тома. Цига Аминай маьчаш ядар, цхьаъ геттара гаьнна д1ачуяхаяр. Ц1аг1ара араэккхача хана гаьнаяккха хургьяр из Аминас.
   Т1аккха ший маьнги к1ала хьож Тома.
   Маьнги къал, пенами1инги цхьа 1аьржа х1ама ер яг1аш. Бакъда из фий ха йиш яцар д1аюххе ца вахача.
   «Маьнги хьаоазабеза вай», - оал Томас Аминайга.
   Амина меттаг1а ялац.
   «Ай, х1ама яц уккхаза, сай книжка хьаэца йоал со» - йоах Томас. Маьнги к1ала цхьа х1ама яг1а аьллача Амин-м гаьнаяргьяр.
   Аминас новкъостал а деш Томас маьнги хьатот. Ми1инги, акхарел ч1оаг1аг1а кхераенна, з1амига циска къориг яг1ар. 
   «Ай…ера-м… ера-м…Любай цисккъориг ма йий…- йоахар ч1оаг1а г1адяхача Аминас, - оахам б1арчча сайранна ма лийхайий ер».
   «Даьр тешшаме доттаг1а-м я хьона хьо…» - оал Томас Аминай керта шорта т1оара а техе.