Зизаш

                Зизаш

Т1орме лаьтта 1о а бежа, из хьалэца аьнна истола к1ала Марет яннача хана классера ни1 тох. Ше яг1ачара меттахь ца йоалаш 1е Марет.
  «Т1ох…т1ох т1ох…» к1аьнкий маьчеш деш дола татт г1оз цунна, уж Лида яг1ача истола юххе соц.  Истола к1алхара из малув ха йиш яцар, хьал ца г1аттача. К1аьнко  Лидай истола яшкача цхьа хьама д1ачуелалга Марето кхетадир. Фу дича бакъахьа да хьог1 яхаш цо уйла еча юкъаг1  к1аьнк классера ара вод, кхы цхьанна истола юхе ца водаш.
   Цун т1ехьа ни1 т1акхайлача, сихха истола к1алхара ара а иккхе Лидай истола яшкача хьож Марет. К1ай, ц1е, 1ажаг1а бесса зизаш дадар чуча.
  Эггара хьалхаг1а дахьаж дацар уж. Хьано кхохь Лидас шийна а хац аьннадар цунга.
  Цхьа ха йоакх Маретас  зизашта б1арахьежаш. Т1аккха катехха зизаш хьа а ийце, ший истола яшкача дохк.
   Цкъа хьалхаг1а на1ара ара а хьажа, шой классера саг вий хьож из ишкола колидорача. Колидорача хайра саг вацар, урокаш йолаяла шоартта ха яр. Ший т1орме а ийце кулгаш дулаш йола моттиге йод Марет.
   Юха классе Марет чуялча дукхаг1бараш хьабаьхкабар. Ше яг1ача истола юхе хьа ей, шийна эггара хьалха зизаш б1аргагуча сана ч1оаг1а цецъянна кеп а оттая  «Зизаш…зизаш… сонна а денад  зизаш…» - яхаш кхувсалуш массанега зизаш д1ахьокх Марета.
   Лида цунна б1арахьажача юс. Цунна хала дар, б1арчча бета шийна кхехьа зизаш хьанз Марета кхаьча.
   «Кхоана хьона а д1ахьадда…» - оал цо хьалишкахьа яг1ача Хьанифайга. Шийна из халадолга д1ацахайта г1ертар из, бакъда, б1аргаг1а-м хий даьннадар.
   Хьехархо классе чуяннача хана, классе ч1ог1а г1ар латтар. Массавар лувш вар. Цхьабараша  «Ишта йиш яц»- йоахар, вокхара «Зизаш марг дий уж» - йоахар. Хьехархо классе чуяннаецаре цхьаццабараш в1ашаг1лата а мегар.
   «Фу хиннад укхаза села ч1оаг1а г1ар яла езаш?... - аьле хоат хьехархочо. Ше-ше дикаг1а дувц г1ерташ бераш д1адувц цунга хиннар.
  Царга ла а дег1е хьехархочо оал:  «Дай зизаш да уж… ч1оаг1о йоаца саго денна зизаш д1акхосса мара а дезац…»
   «Д1акхосс дез…д1акхосс дез…» - яхаш ц1ог1арч доал классе. Берригаш Марета б1арахьож.
   Марето  зизаш берара д1ахецац. Зизаш д1акхосса йийш йоацилга кхета дора цо. Зизаш денар малув ховре-м цо уж д1акхосса а мегар. Т1ехьаг1а бехказа яг йоалаш.
   Цхьа ха йоакх цо йийст ца хулаш, зизашта б1арахьежаш. Т1аккха Лида йоалча д1ат1а а яххе истолат1а 1одохк зизаш.
   Бераш цо леладечох ца кхеташ йист ца хулаш даг1.
   «Хьа зизаш да ераш...- оал цо – хьона дена… аз хьа истола яшкачара сайчуча дехкадар… хьайна ховд да хьона д1акхосса дез е дезац…»
   «Са… са зизаш…» - йоахар г1адяхача Лидас, зизаш марх а дехкаш.
  Кулг а айдий кха саг йист ца хулийташ, хьехархочо урок йолаю.