Самосвал

                Самосвал

      «Мама…мама… - ц1ог1а детташ Фатима ц1аг1а чуэккх.
      «Сабар…  сабар… ай фу ханнад цигача?... - яхаш, кхераенна йи1иг меттайоала е г1ерт хьошалла венача ший вешийна х1ама оттаеш йола Лиза.
  «Мадина самавалаца яхар… самавалаца яхар…- йоахар кхераеннача йи1игу, диъ шу даьннача йи1ига самосвал ала хацар.
   «Ай… мишта… даьра хайна хуг яц самосвалат1а…»
 Нана е, наьна воша Мухтар е ц1аг1ара аралилхача, коа  на1арта е машен, е Мадина гуш бацар.
   «Ай… мишта йитай 1а машен д1ацакъовлаш?... - ший вешийга лувр Лиза…- Шайт1а…хьона де доаг1ар м аз дерг да хьона…» - йоахар Лизас. Бакъда ше Мадинайна фу дерг да-м хацар. Цхьайтта шу даьнна Мадина машен мара х1ама эшаш яцар. Цунна из безам мичахьара бенаб кхета дицар нанас. Цунна да ц1аккха а машен хахка вацар, е машен а яцар царга.
   Йи1ига х1ама халар кхераж коарзаг1яьнна Лиза коа на1арта г1олла д1а-юха удар.
   Гаьнна г1атта йог1а самосвала б1аргакхийтта Мухтара гош мел деле, карта боаг1а лоац.
   Ший машен цунна в1алла дага а ялацар. Ший йи1иг а йоацаш,  ч1оаг1а езар цунна йиший йи1игаш, къастта Мадина. Каст-каста ше йиш йолча веча шийна йи1иг кара а хоайий, руль а лацатий самосвал хохкар цо. Цунна дага а дацар Мадинай хаттараш укх дент1а кхоачаддий.
    «Ер фу деш я? Ер санн елай? Укхо фу болх бу?»- дукха хулар йи1иги хаттараш. Цунна деррига хаттара жоп лора Мухтара, ч1оаг1а из сакъердаме а хеташ.
    Саго ца лолаш, ше йоаг1аш сана хеталора самосвал, Мадинай корта гуш а бацар.
    Ший коа на1арт1а кхаьчача, ч1оаг1а тормаз а техе, чарха къалхара дом д1а а бохийташ, яьха сигнал а техе самосвал соца ю Мадинас.
    Ший даьчоа ч1оаг1а раьза йолаш, г1адяха сийрда боагар Мадинай хоза ши б1арг.
   «Со ц1акхаьчар…- аьнна самосвала не1 хьа ел Мадинас.
    Йи1иг дийна йоалаш б1аргаяйна наьна кхерам эг1озланга берз. Наьна ши б1арг байча Мадинас кхетаду шийна хургдар.
   «Ай…»- аьнна, карта юххе латта доаханна лелабу саьрга ка тоха Лизас.
    Машинат1ара кхоссале кийча хина Мадина, кхача не1ара ара а иккхе, лоалахой х1аьжкий беша къайла экх.
    Цу бийсан лахараг1а кора яг1ац царна Мадина.
    Коара, ц1аг1ара лампа ца йоеш бийса йол.
   «Йийтта, йийна д1а ца йоккхе, цунна фу дедда сона-м хац…- йоах Лизас вешийга.
   «Еттараг1а хьама хургдац, хьо раьза хуларе, сона-м ховра ер мишта къостаде деза» - оал Мухтара.
   «Хье раьза вар хьа де, цун да дийна валаре-м са корт лаза безацар цог1».
   Ара сийрда са ханнадар.
    «Мадина…- кхайкар Мухтар коа ара а ваьнна, йи1иг гаьна йоцилга кхетадора цо. - Сога дика ладувг1алахь. Аз ц1аккха а харц дош аьннадий хьога? Айса дергда аьнна хьама ца деш виса вий со?  Аз дош лу хьона хьанз айс аддар кхоачаш де». Ший ханнара сагаца сана дора Мухтара йи1игаца къамаьл. «Хьа наьнаг хьона ца еттийт, айса хьо машен лала 1омае. Бакъда, 1а а дош дала деза, кхы сога ца хоатташ цхьаккха машенат1а ховг яц аьнна. Раьза йий хьо?»
   «Я… со раьза я…» - Мухтара юххе баг1а бог1а т1ехьашкара ара а иккхе, наьна воша марха экх г1адяха Мадина.
   Мухтара кхоачаш а дир ше денна дош. Х1аьта Мадинас цхьа ха яьлча машина хахка бокъо йоакх.