Куси Дауд
Куса кхузткъе итт шаре г1оьртина йоккха стаг яра, дукха жима йолуш дуьйна йисина 1ийна. Дауд цхьаъ бен воцу во1 вара Кусин, цундела цул хьоме х1ума а дацара цуьнан кху доккхачу дуьненахь. Жима волуш дуьйна «х1ун оьшу хьуна, х1ун еза хьуна, х1ун кхоллур яра ахь» бохуш, хала лелийна а вара.
«Х1ун деш ю те х1ара кхузахь?», - аьлла, шен дагахь Куса йолчу аг1ор д1авирзира базара юккъехула схьавог1у Дауд. Д1ахьаьжча банканашна чохь хьаьмцаш бухкуш лаьтташ яра Куса.
«Дера еза ша иза хьовзо», - ойла кхоллаелира кхуьнан. Шен пальто т1ехьара кач ира а х1оттийна, коьртара шляпа ма-хуьллу хьаж къайла а доккхуш, б1аьргашна т1е охьа а теттина, Кусина хьалха д1ах1оьттира Дауд. Хийцинчу озаца хаттар дира цуо оьрсийн маттахь:
- Почем шишки?!
- Дувацат капек банка…
- А ведро?
- Пят рубил…
- Много! Давай за три рубля!
- Нет, - корта ластийра Кусас.
- Ну, что за бабка?! Ну, давай, - кхаа соьма кехат д1акховдийра Дауда.
- Нет! Моя далЕко ходил есть, пулатьи порвал есть, к1охцал пошел издес, – мохь туххуш элира йоккхачу стага, ша лазийна меттиг гайта варе т1ехьа п1елг а буьллуш.
- Не дашь? – къар ца лора Дауд.
- Нет, - юха а корта ластийра къаръйала дагахь йоцчу Кусас а.
Т1аккха, шен пальтон кач охьа а биллина, шляпа хьаж т1ера хьала а теттина, хьаьмцаш т1аьхь лаьтташ йола стоьла т1ехула Кусина улле а г1оьртина, Дауда элира:
- Ва, Куса, хьо евзаш хиларна, х1ара пхи сом дели-кх ас хьуна! Схьалохьа и хьаьмцаш! Ахь оццул хала гулдина долу х1орш ма ч1ог1а деза суна…
Куса дукха цец а яьлла, юха хилира цкъа. Т1аккха Дауд велавелча, и вовза а вевзина, цунна маракхийтира Куса, яша а ешна:
- Вай, хьайн нана яла хьан, Дауд, хьайн нана… Шаберш баалахь, Дауд, шаберш…
Даудана т1е куьг хьоькхура Кусас, шен хебаршка яхана йолчу юьхь т1ехула б1аьрхиш а 1енош:
- Баалахь, Дауд, шаберш баалахь… шаберш… шаберш…
И дешнаш кица а хила д1адахара цул т1аьхьа оцу эвлахь. Наноша тахана а шай доьзалхочунна хьалха кхалла х1ума х1оттош олуш хеза наггахь:
- Нана яла хьа,хьенех… Кусини дайна, яалахь... шаерг а яалахь…
Опубликовано в журнале "Орга", № 4 за 2019 год.
Отзывы к публикации на моей странице в Фейсбуке от 29.12.2018 года:
Ахмет Байбатыров:
Иштта доца дийцарш йоза 1аморна пайда алсам болуш хила декхар ду аьлла хета суна.
Тамара Юнусова:
И Мать, и Сын такие красивые, светлые, и юмор у них утонченно- философский, несмотря что житейский, в общем, истинно чеченский!
Айза Резванова:
Хаваж, Дела реза хуьлда хьуна!
Ма хаза дийцар ду и, сина парг1ато луш...
Аднан Ахматов:
Хаза дийцар ду. Дела реза хуьлда хьуна, Хаваж. Мерза кхачанаш кху чохь гойтачул иштта пайде дийцарш йаздича бакъахьа дара. Вайн мотт кхиор а хира дара, ойланаш хаза а хира йара. Кхетош кхиорана дика а дара.
Луиза Исраилова:
Ч1ог1а аьхна ду х1ара дийцар.... Баркалла, Хаваж...
Musa Muhammad:
Х1ара дийцар-м, суна хетарехь, вукхарел а ("Шляпа", "Мотт бастийтар") а дика ду, - йозанан бакъенашкахула а.
...Доцачу, ВАЙН маттахь долчу дийцарийн жанр - хьакъ йоллу "говр" хета суна, вайн меттан "ворда" бицбаран боданера хьалаозан.
Дела реза хуьлда хьуна, Хаваж, и болх бечарна массарна а.
Ramzan Ibragimov:
Ма хаз дийцар ду, Хаваж Цинцаев, ма хаза дийци . Сан де цхьа сирла, дай ди х1окх дийцаро, ойла самукъне яьккхи. Баркал!
Луиза Боки:
Язйделахь иштта дийцараш тхуна, Хаважи. Язделахь.)
Дела реза хуьлийла, Хаважи. Суна мел хазхета ер тайпа дийцараш. Ас къоман дийцараш олу кхарех
Камета Эльмурзаева:
Со-м елхий кху дийцарш
Ibrahim Yakhyayev:
Ма хаз дийцар ду из дагах кхеташ дог каддеш бергех хи докщ
Свидетельство о публикации №218122901067