БIаргий лор

  «Нани… новкъостал де сона… - йоах ц1аг1араболх беш ваг1ача Iалихана – е пример цхьанна тайпара хьахалац са, со кхеташ вац хьона укхо сога фу йоах».
  «Дьара, кхетагвар, 1а хьехархочунга  ладийг1адаларе-м, харцахьа а ца лелаш, - к1аьнк ваг1ача д1ат1айода даь-нана - Малаг1а ба из, хьо ца кхета пример?» - хоатт цо. «Ер ба-кх,- п1елг тIаоттабу Iалихана книжка т1а.
  Йоаккхача саго книжка т1ара б1арг а ца боаккхаш, коча кисара б1аргсинош хьалдоах, т1аккха, уж д1а а дехке оал: «Даьра к1аьнк, укх цхьан б1арга са довш ма латт са, ди хьалха дикаг1а гора сона».
   Iалихан ше ваг1ачара ураг1ахьежача, даь-нана б1аргсиной цхьа б1алг боацаш бар, коча киса биса хала тарлора из.
   К1аьнк ч1оаг1а велалу, из б1аргадайча. Йоаккха саг кхетац из х1ана                                вел: «ХIанз  хьо сох веле а, воккха хилча ховргда хьона согара хьал…» - йоах раьза йоацача даь-нанас .
  «Ай, нани, хьох велац хьона со. ХIанз хов сонна, се воккха хилча малаг1а  болх беш хургва. Б1аргий лор хургва со.  Теший хьо? Хьажалахь т1аккха, аз хьай б1арг мишта сиха тоабу. Хьадал хьай б1аргсинош».
   Даь-нанна т1аювхача коча киса кулг а дахийте, кизга б1алг хьалбоакх Iалихана, из ший моттиге дIаоттабу.
«Хьажал, нани, хьанз дикаг1а гой  хьа б1арга? - йоах велар соц а ца деш, Iалихана.                                                
   «Хьох б1аргий лор хиллалца яхийла со, - аьле елалу даь-нана - ХIанз хьа примеро фу йоах хьожаргда-кх вай.