Бикедин адахлияр

               
                ( Къемеда )
Бике. ( Скамейкадал ацукьнава.) Валлагь,ина авай итимар аламатдинбур я. Са-кьве югъ я санаториядиз атана, амма чамар тежедай адахлийрин  гъиляй ял ядай вахт жезвач. Гуьрчег дишегьли куьчедиз экъеч1ун багьна я – тадиз экуьнал къведай чепелукьар хьиз вири к1ват1 жеда. Гьарда са теклиф ийида -  кино, куьлер ийиз ( яни танцариз) , концертдиз… Чепелукьарни акурт1а квез : гьар сад  тумунин жунгав хьтинбур. Санаторияда авай итимар вири холостояр я. К1анзавайди к1валивай 500 метридин яргъаз акъатун я – тадиз холостой жеда. Ахпа иер дишегьли акурвалди ч1ижери хьиз гьужумда . И куьнуьда ч1ижерик хузарни акахьда, лап зурба бувунарни.
   Ик1 жедач, абуруз са тарс гана к1анда. Ангье лув гузва мад сада :  ч1иж яни хуз яни, тахьайт1а мотор квахьай самолет яни… Вичин аэродромдилай алатнавай хьтинди я, чилел ацукьдай чка жагъизвач.
 Шумалбег. Саламалейкум, Бике-ханум. И гуьзел гатфарин  гуьзел цуьк багъишзава ваз, к1анда  рик1из  гьамиша вун акваз, югъди хьурай вун цуькведив къугъваз, бубу хьтин п1узаррал мили хъвер алаз.
Бике. Вагь, вакай халис шаир хьанвай хьтинди я гьа.
Шумалбег. Валлагь, вун акурдалай кьулухъ зи рик1е илгьам гьатна, йифди вакай хиялар ийизва, шиирдин ц1арар арадал къвезва. Вун хьтин бикейрин Бике, ханумрин Ханум, сунайрин Суна акур касдикай шаир хьун тажуб жедай кар туш.
Бике. Вуна ви папазни гьа ихьтин шиирар кхьейди тирни?
Шумалбег. Низ хьайит1ани шиирар теснифиз жедани мегер!  Паб заз так1анз гъайиди тир, гьавиляй чун чарани хьана. Заз зи уьмуьр вун хьтин са гуьзелдихъ галаз фена к1анзава. Эгер вун рази хьайит1а, залай бахтлу кас гьич дуьньяда жеч.
Бике.  Ваз гьакьван бегенмиш я ман?
Шумалбег. Гафаралди лугьуз жедач, зи рик1 гимидин элкен хьиз ашкъидай ац1анва, гьавиляй зун пияла хъвайиди хьиз жув жувал аламач. Кьураз-ц1разава.
Бике. ( Гьавиляй я жал шумал хьтинди?)  Тади мийир, шаир. Исятда вун т1арамарнавай чуьнгуьрдин сим хьиз ава, амма ваз чир хьухь, а сим гъуьргъуьни жедайди я, кьат1-кьат1ни…
Шумалбег. Нивай ат1уз жеда-е  зи рик1ин сим?
Бике. Вахт лугьур са зат1 ава, ам дарманни я,  себебни. Терезни я гьахъ-дувандин.
Шумалбег. Гьикьван вахт алатайт1ани, вун  зи рик1яй акъатдайди туш.
Бике. Сенфиз клубдай хкведайла расу ч1арар авай урус рушан хъуьч1уькай кьунвайди вун туширни?
Шумалбег. ( Са патахъ:  Идаз гьинай акунат1а яраб?)  А..гьа.. А рушан к1вач т1арзавай, за адаз вичин номердиз хъфиз куьмек ганай.
Бике. Лап кравутдал кьван…
Шумалбег. Ваъ, я руш, вуна зун квяй кьазва-е.
 Бике. Исятда заз к1елай шиирни гьа ч1авуз туьк1уьрайди я ман…
Шумалбег. Зун Шумалбег тахьуй хьи, эгер за ваз шиир вун паталди кхьейди субут тавурт1а. К1ант1а за шагьидни гъида.  Киц1ин т1вар кьурвалди, ада ампда лагьайвал, ам вич къвезва.  Ша,ша , играми дуст Ширинбег. Гьа вун тир и арада герекзавайди.
Ширинбег. Зу..ун? Вучиз? Яъ, ина Бикейрин Бике, картарин лачин, дердерин дарманни ава хьи.
Бике. ( Мад са шаир хкатна кук1вадикай.)
Ширинбег. Салам я ваз азиз Бике,
                Гьатна вун зи кузвай рик1е.
                За чан гуда са ви рекье,
                Виридалай к1ани Бике.
Шумалбег. Яда,акъваз кван садра. Вун  гьинай, и Бике-ханум гьинай?
Ширинбег. Вун вуч кас я-е? Ам сифте заз акурди я, акурвалди ам зи рик1и магнитди хьиз вичел ч1угуна. 
Шумалбег. Эй, Шурррик. Жуван чка чирна, киса. Тахьайт1а…
Ширинбег. Эй, Чумалбег…
Шумалбег. Зи т1вар Шумалбег я, дуьз рахух.
Ширинбег. Зи т1варни ширин Ширинбег я.
 Шумалбег. Ваз и гафаралди вуч лугьуз к1анзава ?
Ширинбег.  Бике гьатна ц1ай хьиз рик1е…
Шумалбег. Яд иличда за ви рик1ел , туьхуьрда ц1ай гьатай рик1е…
Бике. Эй, шаирар. Киса кван кьведни, куь гьараяр низ герекзава?
Зун квез вуч я? Туьквендавай шоколадный плитка яни, ида заз, ада заз лугьуз. Регъуь кьванни тушни квез?..
Серкер. Ингье зунни. (Хкадарна Бикедин вилик акъатда.)  Яъ, им вуч къал-макъал я?  Ягъун-гатун авачиз.
Бике. Абур шииррин ц1араралди кик1изва.
Серкер. Зун гъавурда акьурвал, и  чурун тавур шаирриз вун бегенмиш хьанвай хьтинди я. Къе заз дахдилай кагъаз атанвай, ам вахчудайла и кьве Шуриказни телеграммаяр аваз акурди, за гьабурни вахчуна. Ма , Бике-ханум, к1ела кван ина вуч ават1а.
Бике.  ( Чар к1елзава). « Зи багьа Шумалбег, ана вун рангар янавай матишкайрал ашукь жез тахьуй гьа, занни гъвеч1и Периди вун вилив хуьзвайди рик1елай ракъурмир. Ви Ханум.»
          « Аман Ханум,  аман Пери..ии..» лугьуз, кьве гъилини кьил кьуна, шумалбег катда.
Бике.  Гила кьвед лагьай телдиз килигин кван. « Къурумсах я вун, Ширинбег. Папахъ галаз чара хьана лугьуз тапарарна, накь заз ви папа вун са-кьве юкъуз Москвадиз командировкадиз фенвайди лагьана.Чара хьуникай са куьт1ни авунач. За адаз ви адресни гана, ви ч1арар вичи чухвадалда. Я аллагь. Агъубег, вал валайни фейи сад гьалтрай. Тават».
Ширинбег. Пагь.пагь. За садавайни хабар кьазвайди туш, гьиниз к1ан хьайит1а, гьаниз фида.
Бике. Рехъ ачух я ваз. Алад жуван шиирдин ц1арц1е аваз. Инихъ-анихъ алат тавуй гьа…
Ширинбег. Падумайиш. Са маса  бике жагъич заз. (Хъфида).
Серкер. Ажеб рекье туна вуна абур.
Бике. Серкер, вуна лагь кван заз. И яшдиз акъатна, вун вучиз эвленмиш хьанвайди туш?
Серкер. Эгер зал вун фад гьалтнайт1а, за мехъерни фад ийидай. Амма зи кьвед лагьай пай жагъун тавунмаз,гьик1 эвленмиш жедай?!
Бике. Айман, вунни шаир я жеди…гафар са жуьреда аквазва заз.чеб чпиз
Серкер.  Ваъ,азиз Бике. За инлай хъфей хьтин туп1ал шаиррин ваъ, халис шаиррин ч1алар манийриз элкъуьрзава.
Бике. Ак1 ят1а,лагь кван са мани.
Серкер.   Дуьнья тирвал къекъвена зун,
                Гьинва лугьуз зи к1аниди.
                Кьисметди  къе агудна чун,
                Бахт ачухна, зи к1аниди.
Кьведани.  К1анибур хьуй чеб  чпиз кьисмет,
                Ашкъидин ц1ай къизгъин ийиз.
                Муьгьуьббат я чилел женнет,
                Уьмуьрдин дад циц1и ийиз.