Полковникдин гъетер

               
                (Къемеда)
Иштиракзавай ксар: Машгьурбег, Марал, Гуьзель, Цуьквер, Марвар.
Машгьурбег  ( ресторанда ацукьна вич  вичив рахазва ).  Ажеб хъсан гъетер гьатначни заз, иербурни я ва кар алайди вири пулар квайбур я.Къачун чна Марал ( чарчиз килигда). Мебельный фирмадин иеси . Са т1имил кьван  шкьакьвал ква . Муькуьбуру гьар сада са зат1 савкьват яз гъида. Килигин,къе ида вуч ийидат1а.Ахпа  Гуьзель- идаз шегьерда кьуд салон красоты, пуд туьквен, кьве иномарка… Ибур вири гьа са касдиз хьун дуьз яни мегер? Бес зун хьтин фугъаради вуч ийида? Чуьнуьхиз жедач, машин са верч туш къуншидин къураллай. Ухьт… садра кайиди бесрай. Уголовный право заз хуралай чир хьана ва …са т1имил маса амаларни.  Пагь, пагь… Марал къвезва…сирнавзавай гъед хьтин. (Чар чуьнуьхзава).
  -Я чан Марал, вун атуй, рагъ атуй. Ша ацукьа, ма и цуькверни ваз.(Ибурни детсаддин гьаятдай ат1айди я).
Марал. Нянин хийирар, зун геж хьанани?
Машгьурбег. Ваъ, я Марал.Вал вил алаз зун пакадалди акъвазични мегер.
Марал. Ви т1вар гьик1 тир? Багъишламиша, рик1ел аламач.
Машгьурбег. Т1вар зи Машгьурбег я. Чи дахдиз зун лап гьа гъвеч1и ч1авалай машгьур кас хьана к1анзавай. Амма заз вирида «полковник» лугьуда, зи званидиз килигна. Зун полковник яз Сахалинда къуллугъ ийиз хьана. Ана заз хсуси островни ава, къизил хкуддай са гъвеч1и мяденни, мад герек хьайит1а, цин к1аникай фидай луьткве ва… Эгь , абур квез я, ватан авачир чкада…
Марал. Ваз за юлдаш полковник лугьудани?
Полковник. Ваъ, я чан цуьк, гьак1 полковник лагь.
Марал. Чун са акьван таниш туш,  гьавиляй « чан цуьк» лугьун кутугнавач эхир.
Полковник. Вучиз кутугнавач  кьван! Цуьк хьтин дишегьлидиз цуьк лугьун тавун гена кутугнавач. Амма ихтилатар ахпа жеда… Эй .где там официант, тадиз за кхьей списокда авай кьванбур вири гъваш кван.
Марал. Заз я гишинни ийизвач, идалай гъейри за ресторанра недайди туш. Виридалай жуван к1вал хъсан я.
Полковник. ( вичи вичик: К1вал хъсан тирди зазни чида-е…Эгер к1вални авайт1а, зун инал нида авай тула хьиз жедачир.)  Пагь, ибур пул таганмаз къведайди туш ( жибинра къекъведай амалар ийида). Гила вуч ийида? Беябур хьана..пулни к1вале туна, пулар авай карточкаярни. Гьар сада 50 агъзур манат авай кьве карта.
Марал. Пул за вугуда, я кас, акьван хажалат ийимир. Ма ваз къад агъзур ва и сятни зи патай кьабула…
Полковник. Ваъ, ваъ…къизилдин сят къачуз жедач.
Марал.  Я кас, къизилдин мяден авайдаз са сят яз вуч я!
  Полковник. Мад вучда? Ви хатур завай хаз жедач. (Дишегьлийрин ч1арар яргъи ят1ани, акьул кьери я.)
     Полковникди пулни сят жибинда твада. Марал, «сагърай» лагьана, хъфида.
Полковник. Сагърай гьаятда цуьквер авай детсадарни. Са к1унч1унихъ са виш агъзур.. пис туш,  полковник, ви гьалар.
И арада ресторандиз Гуьзел къвезва.
 Гуьзел. Нянин хийирар, Вун к1вачел ала хьи.
Полковник.  Валлагь, зи рик1из чир хьанай вун къвезвайди, гьавиляй зун ви гуьруьшдиз экъеч1завайди тир. Ша кван, ацукь устулдал.
Гуьзел.  Сагърай, вун халис джентельмен я!
Полковник. Ву..уж?
Гуьзел. Хъсан кас я ман. Гьуьрмет ийидай  инсан.
Полковник. Заз вуна  пелменар лагьайди хьиз хьанай.  Исятда… Эй,официант..
Гуьзел. (Вичи вичик: Им к1амаш яни?  Полковник - половник!)
Полковник.  Официант, тадиз и стол  туьк1уьра кван. Зун дуьз гъавурда гьатначир. Багъишламиша, за тади гьалда са зенг авуна к1анзава… Алло.. гьик1 Япониядиз  акъатна? Сахалин японвийри кьунвани? Ваъ? Куь ана вуч мерг авай? Так..так…Подлодка чкадал хкваш, Япониядихъ галаз дяве авуна виже къведач. Президентни против жеда. Все!...Ингье . жув гьамиша кьилел к1анда.
Гуьзел. Ваз подлодкаярни авани?
Полковник. Сад-кьвед кими туш. Амма чун вакай рахан. Гьик1 я ви кефияр, к1валахар?
Полковник. ..яни…
Гуьзел.  Яни писбурулай хъсанзава.Шкафар-купеяр, диван хьанай, кухня ва ик1 мад. Гьазуриз маса гузва.
Полковник. Хъсан я, хъсан.Бизнесда кьилинди – жибин ич1и тахьун я.
Гуьзел. Жибин вучтинди я? Банкда счет кьери тахьуй лагь.
Полковник. За гьак1 лугьузва-е. Банкара авай пуларилай гъейри жибинда сад-кьве миллион авачиз зун к1валяй экъеч1дайди туш. Эй, официант… Гьиниз квахьна им и арада?
Гуьзел. Тади мийир, инал исятда чи танишар къведа. Ангье абурни.
Полковник. Яъ, ибур зи танишар я хьи. Йоъ, и Марал инлай исятда хъфейди тир хьи! Марварни ава.
Гуьзел. Чун кредитар вахчуз атанвайди я. Процентар чна ваз тада.
Полковник. Вучтин кредитар? Зун куь кредитрихъ галайди яни? Заз хсуси островар авайди я.
Марвар.Чи вац1ани са гъвеч1и остров ава. 3 метр яргъивал,2 метр гьяркьуьвал. Ваз ам бес жеда.Хт1уна садра и костюм, ваз ам ерли кьазвач…
вечрез пурар хьиз.
 Полковник. Я Марал, вуна кьванни лагь. Ина вуч хьанва?.
Марал. Вуна чун ахмакьрай кьунвайни. Островар, къизилдин мяденар…пагь, пагь…подлодкаяр…Чна вун исятда чухвай верч хьиз ахъайда.
Марвар. Рушар, адакай хъсан гриль жедайди хьиз аквазва.
Марал. Вун авай и гостиницани, ацукьнавай ресторанни зибур я.
Полковник. Я чан Цуьквер, ибур жери крар яни мегер? Зун хьтин инсан…
Цуьквер. Ваз ашнавал ийиз к1анзавай ман, пулар к1анзавай ман. Чаз ви гьаясуз амалар гьа сифтедлай чизвайди тир. Акван, лагьана чна, и яланчи чамра гьина кьван чамарар ядат1а.  Гафарал гьалтайла, вуна шивди хьиз чамарзавай, амма крар ви ламранбур тир.
Марал.Таб ийизни чир хьана к1анда, полковник-колхозник. Ви ч1алахъда вуж акьадай, руьхъведин тупар язавай.
Полковник. Таб вучтинди я? Таб гьинай, зун гьинай? Къуллугъзавай чкадиз хабар хьайит1а, зун беябур жеда…
Марвар. Аникай вуна фикирмир. Вун хтай чкада ви месер амалда, гьана вун хушвилелди кьабулда.Хт1уна за гайи туфлияр, ана ваз ракьун чекмеяр гуда.
Гуьзел. За гайи перемни галстук  инал эциг, аферист.
Марвар. Къала зав вахце кван костюм,  гена ина пулни ама,сятни.
  Полковник. Я чан вахар, багъишламиш ая. Зун иблисди алцурарна, беябурмир, аман-минет я.
Марал. Вун иблисди ракъурна ман чи патав?  Яхъ , рушар, хт1уна вири парталар. Гарданда орденни тур «Виридаз машгьур Машгьурбег» кхьенвай.
Полковник. Аман, чан рушар, зун гатамир, заз сахар авайди я, рекьида зун.
Марал. Къайгъу туш, сахар чна ц1урурда. Вегь адаз са вагьрам.
Полковник. Вуч бетербур я куьн? Квез гъил къачун авайди тушни? Цуьквер хьтин рушар я…
Цуьквер. Вун хьтин мошенникриз тарс жедайвал, вун и куьчейра къекъуьрна к1анда гьа ик1.
Полковник. Аман зун чухвай верч хьиз хьана…Бесрай…бес.. мад ихьтин къелетардач…
            
          Нефсикъаран, я Машгьурбег,
          Лайих туш ваз а т1вар-эркек.
          Амукьна вун аюх хьиз тек,
         Аламачиз партал, я пек.
Иштягьар тир ви лап зурба,
Ханвал к1ани, течиз буба.
Хъуьрезва вал Куьре, Къуба,
Гила кьванни ая туба.
            Кьаз тахьайла цавай гъетер,
            Чи вилик на янай мет1ер.
            Чир хьанач ваз якъут-гегьвер –
           Чилел алай цуьквер-гъетер.