Мунчоын тодон-валан басьтон

Ми, Олексей песятаймылэн мунчоын вордиськем нылпиосыз но нылпиосызлэн нылпиосыз, париськонэз нырысь ик тодим солэн пуктэм мунчояз. 1930-ти аръёсы песятаймылэн кадь муръёен волвол мунчоосты удмурт гуртъёсысь шер пумитаны луэ вал ай. Сьод мунчоез муръётэк лэсьтылизы. Эстэм гурысь чын бугыр гинэ потылиз но, бергаса-бергаса мунчо пушкы люкаськылиз, борддораз, волдэтаз, азяз сьод-сьод пуксьылиз. ;ынэз поттыны мунчолэн волдэт улазгес пичияк пась, жопы, лэсьтылизы, осэз жубис возьылизы. Сурым йыре медаз йоты шуыса, мунчое пырылизы гурысь жуэз кысэм бере гинэ. Нош муръёен лэсьтэм мунчоын гур эстиськыку но пырыны луэ, котырак чылкыт возиське.

Песятаелэн мунчоез азбармылэн пыдэсаз ик, Алнаш шур дуре васькон пичи гурезьлэн меч бамалаз, сылиз. Татын ми паймымон чебер инкуазез учкыса сылыны яратылим. Син азямы усьтиськылиз Алнаш шурлэн чошкыт, паськыт возьёс кузя читыр-чутыр орен инвисозь ик зыл-зыл бызись азвесь вуэз. Возьёс сьорын вож-вож узьымен яке вуэм ю-нянен чуж-чуж бусы адзиськылиз. Отиязгес, Грак палан, вукыремъёс дурын шормучен-шормучен будись лысо нюлэсъёс кыстиськылизы. Песятаелэн азбарысеныз озьы ик Грак черкогуртысь Алнаш черкогуртэ кыстиськись гравиен шобыртэм чошкыт сюресэз адзыны луылиз. Солэн мыд-мыд палаз — чем мерттэм ньылпуос но акациос.

Мунчоен артэ зок пужым корлэсь лэсьтэм паськыт тыбыро зус сылиз. Бордысьтыз ческыт пужым зын лосъяськылиз. Ми, пиналъёс, гужем кузь жытъёсы со зус вылын вераськыса, кыдёке инвис пала учкыса пукыны яратылим. Возамы куддыръя анай-атаймы, песятаймы но итиськылизы. ;ыт, шунды пуксён азьын, татысен паймымон чебер суред усьтиськылиз. Котькуд нунал инкуазь маке но выльзэ, аспортэмлыкозэ возьматылиз. Сыче жытъёс милемды чакласькыны, котырысьтымы дунне сярысь малпаськыны дышетылизы. Трос аръёс ортчыса но со пукемъёсмы сюлэммес шунто на.

Кызьы тодиськомы, нылкышноос но воргоронъёс мунчое чош уг ветло. Но пиос ог куинь аресозь мукет пичи нылъёсын но кышноосын огазе мунчо пыро на. Анай пичи пизэ воргоронъёслы миськыны уг оскы на угось. Кык но жыны аресозь мон но нылкышноосын чош мунчое пыри. Пыласькыкумы одиг пол вить но жыны аресъем Роза апаелэсь юано кариськи:

— Малы-о тынад чисянэд овол, кызямед чик уг поты шат?

Апае номыр вераса оз вутты, анае шуиз:

— Коня ке буд на ай, пие, ваньзэ тодод. Пиос но нылъёс огкадесь овол. Атаед со сярысь вералоз ай.

Мукет арняе монэ воргоронъёсын пыласькыны лэзизы. Соосын мунчо пырыны мыным яраз: серекъяса чаш потто, трос пол парисько но вылазы кезьыт ву кисьтало, толалтэ нош лымы вылэ пото, серекъяло, жушто…

Апаелы сётэм юанме мон ой вунэты, вуоно коснуналэ ик со сярысь атаелэсь выжыяти. Атай туж паймиз но шуиз:

— Паймод ук таин! Атай, учкы ай нунокед кыче чакласькись, али ик ини нылъёслэсь но пиослэсь портэмлыксэс тодэмез потэ.

Песятай чик но оз паймы, пальпотыса шуиз:

— Умой ук со! Ваньзэ рос-прос валэктоно луод ни...

Атай дыртысагес вераны кутскиз:

— Пие, тон — пияш, нош Роза — нылаш. Будид ке, кужмо пиосмурт луод, мон но песятаед сямен, нылпиосыдлы, анаедлы но песянаедлы юрттод. Нош Роза будиз ке, анаед но песянаед кадь луоз. Нылъёс но пиос ог-огзылэсь портэмесь. Тани учкы ай, мынам гадьы кыче пичи, нош нылкышноослэн бадзымесьгес. Нылъёс будизы ке, гадьёссы сыче ик будозы, нош тынад — уз. Чисёнзы но нылъёслэн пичи, уг адзиськы. Пудо-животъёслэн, пойшуръёслэн, тылобурдоослэн но, адямиослэн сямен ик, нылъёссы-пиоссы, нылкышнооссы-воргоронъёссы вань. Соослэсь нылкышнооссэс мумы шуо, воргоронъёссэс — айы. Асьмелэн тани ыжъёсмы вань, айызэ така шуо. Мумы ыжъёслэсь со мукет: мугорын бадзымгес, сюрыз крендель кадь сьорлань позырскыса будэ. Курегъёсмылэсь айызэс атас шуо. Со но мумыосызлэсь портэм: тазагес, кужмогес, портэм буё яркыт тылыосын чеберскемын, бадзым быжо, горд зускиен, курег сямен уг котка — чоръя, чипыосты душесъёслэсь возьма. Курег вылтусын огшоры ке но, пуза, чипы поттэ. Озьы ик зазегъёслэн но мумызы, айызы вань. Музъем вылысь вань лулосъёсты инкуазь сычеен кылдытэм. Будэмъяд тон сое, пие, зечгес но зечгес валалод ай.