Ческыт кожы

Гуртысь пинал пиослэн одиг тужгес яратоно йонтэмъяськонзы вал: вож кожы пуртэсъёс вуон вакытэ колхозлэн бусыосаз сое сиыны но бичаны ветлон. Пиналъёслэсь сыче йылолзэс тодыса, котькуд паласен умой адзиськись бусые гинэ кожыез кизизы. Отчы мынись адями соку ик син азе сюре. Кожы вуон вакытэ бусылэн вырйылаз сторожлы тылыс пукто. Со возьмаськыны пуныеныз ветлиз, уйин ке, сьораз пычал но басьтылиз. Сое сылалэн яке ю тысен зарадаллязы. Нош ваньмыз со етиз пиослэсь мылкыдзэс жутэ, лопкытэ гинэ вал. Кожыяны мынон азязы соос возьмаськисьлэн  син шораз, киулаз кызьы сюронтэм сярысь кенешылизы: бусы доры кудпалтиз потоно, кыче дыре, пуныез кин пумиталоз, кудпала пегзоно…

Та «шудонын» тужгес но кулэез — пуныез чалмытон, буйгатон. Кенешамы ми усто амал шедьтимы. Кожыяны мынись командаямы одно ик сторожлэсь пунызэ зеч тодись эшмес кутылим. Кожы бусые чемысь бер жыт нюк кузя яке улыг интыети ветлимы. Кожы пуртэсъёсты куддыръя кот вылын нюжтиськыса яке ньыльпыдъяськыса бичаськом но дэрем пушкамы тыриськом вал. Пудзэ ом ишкалэ, озьы колхозлы ожытгес ыштон луэ. Сторожлэн пуныез милемыз одно ик шодэ но дорамы утыса бызе. Соку солэн пумитаз пуныез тодись эшмы потэ. Пуны чалме, буйга. Собере соос чошен тылыс доры мыно, нош ми ньыльпыдъяськыса каллен бичаськиськом. Чумолё бусыосы кожыяны коня ветлим, одиг пол но  возьмаськисьлэн киулаз ом сюрылэ.

Одиг нуналэ Юра нимо зуч эше «Чапай» колхозлэн бусыяз кожыяны мыныны чектиз. Со анаеныз Чапаево гуртын улэ вал, Чумолёысен дорозязы одиг иськем гинэ. Юралэн анаез, Катя апай, Чумолёын йол бичан пунктэн кивалтиз. Мынам Роза сузэре одиг арзэ Катя апайлэн юрттисез луыса ужаз. Юра анаез доры чем вуылиз. Соку ик ми соин эшъяським. Йол бичан пунктэ мон йолвулы (сывороткалы) ветли, соин парсьпиосты люктамы. Скал возись семьяос со пунктэ йол, вой, йолвыл нуллизы. Отын йолэз сепаратор пыр поттылизы но йолвылэзлэсь вой лэсьтылизы, кылемезлэсь — кузятэм (творог). Воез но кузятэмез городэ келяллязы.

Юраен ми анаез доры чем вуылимы. Малы? Со милемыз нянь вылэ нап йолвылэн сурам творог зыраса сюдылиз угось. Соку гинэ лэсьтэм кузятэмез ми туж яратим. Дорын но песяе чырсаны кутскем йоллэсь творог лэсьтылиз но шуылиз:

— Чырс кузятэмлэн пайдаез бадзымгес, трос висёнлэсь уте.

Узы-боры, эмезь кисьман дыръя песяе но Катя апай милемыз нюлэс, луд кузьымъёсынымы шумпотыса пумиталлязы. Со емышъёслэсь йолын но твороген туж ческыт сиён порме угось.

«Чапай» колхозлэн кожыез со арын нюлэсо нюкен артэ киземын вал. Нюк Петропавлово нюлэскысен Пичи Усинка шур дорозь кыстиське. Нюклэн лымшор но шундыжужан палаз Чумолё гуртлэн бусыосыз. Юра Петропавлово дорысь нюлэскы губияны ветлэм но соку ик кожы бусыез эскерем. Быгыльскем ческыт кожы пуртэсъёс солы туж кельшиллям. Веръяны мыным но сётиз, собере кожы бусые мыныны лопкытиз. Зэмзэ но, кожызы асьме бусыынлэсь ческытгес потиз. Бусызы умой интыын. Со доры нюлэсо нюк кузя лушкемен мыныны луоз. Сторож адзиз-шодиз ке, пегзон инты вань, пычалэныз но ыбыса уз вутты — нюке туж чаляк вуом. Ваньмыз умой пормыны кулэ кадь, но та «операцимылэн» ляб интыез вал: кожы бусыез возьмасьлэн пуныез вань меда, созэ ум тодиське. Нуназе тылыс дорысь эше нокинэ адзымтэ.

Гудырикошкон толэзьлэн кутсконэз. Пилемо жытэз кык нунал возьмамы. Бер жыт, котырак жомыт. Чапай гурт пала Голюшурма — Алнаш трактлэн урдэстиз пыдын ветлон сюрес кузя мыныны потимы. Трактлэн одиг палаз зег бусы тулкымъяське, мукет палаз — чабей. Пичи сюрес араны вуэм жужыт зег бусыен артэ кыстиське. Тол ю-нянез каллен гинэ лэйкатэ. Зарезь кадь тулкымъяськись бусыети интыен-интыен пилемъёс выскыти толэзьлэн азвесь сиосыз «бызьыло». Гурт палась пуныослэн утэмзы дырын-дырын кылиське. Вераськытэк, шыпыт, сак эскериськыса мыниськом. Азьпаламы нюк кузя инлэн бамаз, пинё борддор кадь сьод нюлэс адзиське.

Тани нюк доры вуимы, выжез но ортчимы ни. Трактлэн паллян палаз ог сю метр кемын — кожы бусы. Дугдимы. Котырак утчаськиськом, чакласькиськом.  Матысь бусыын ю-нянь аранын ужась тракторъёслэн, комбайнъёслэн но машинаослэн огвыллем гуретэмзы, кызъёслэн тол шорын шаугетэмзы кылисько. Нюклэн пыдэстиз пичи шур жильыртэ. Выжлэсь ог куамын метрлы вылиын шурлэн орыз ыше, ошмес ву мучъёс вискыти зызыра. Татияз нюклэн пыдэсыз мучо, кот, йоныен, шашыен, пушнерен шобырскемын, куд-ог интыосаз бадьпу, нюрез яратись мукет будосъёс будо. Мучъёс куспын сьод-сьод торфлэсь дэри, пыдыныд сюрид ке, нодод.

Пеймыт уйин сторож медаз адзы шуыса, ми сьод штаниен, сыче ик дэремен дисяськемын. Эшшо ожытак кылзиськыса сылим но ньыльпыдъяськыса кожы модосъёс полы вуим. Нюк дорысен соос дорозь ог вить-куать метр гинэ. Жалем пуртэсъёсыз ишканы но дэрем пушкамы тырыны вуимы гинэ — матамы ик пунылэсь утэмзэ кылим, собере вал пыдъёс тыпыртизы. Учкиськом но — нюклэн пумысьтыз ми пала вал вылын сторож пуныеныз чош туж жог матэкто. Зурак тэтчыса, кожы полысь потимы. Мон меч нюке бекмыльскыса питырай. Йырам чилектиз: таче меч нюке сторож валэн уз лэзиськы, нюк кузя бызись вань бере, пуны но сьорам уз уйиськы. Нюкын та вадесын нодыны, пушнераськыны луоз шуыса Юра тодэ вылэм, улиетигес, косгес интыти нюк сьоры потыны малпам. Но кожыны вуымтэ.

Мон сторожлэсь но, пунылэсь но пегзи. Но Инмар малпам, лэся: «Та йонтэм пияшез дышетоно». Нюклэн кык бамъёсаз ик монэ метръем пушнер туж зол «вешаз». Мон вакчи саесо дэремен, гольык пыдам сандалиен вал. Пушнер сяна, нюклэн пыдэсаз монэ лэчыт куаро шашы, йоны, жужыт мучъёс вискысь дэри «дышетизы» на. Пеймыт нюкети, муч вылысь муч вылэ лудкеч сямен тэтчаса, нодэз ортчыны тырши, но пыды бадьпу вай борды канжаськиз но, сьод дэрие месиськи. Ымныры но негрлэн кадь вал, дыр. Умой коть, нокин но оз адзы. Мучъёс вылэ туж шаплы султи но дэриысь поти, ымнырме, киме чылкыт вуэн гылти.

Нюкез лобыса сямен коня ке секундскын ортчи, «сьось» пушнерлэсь, шашылэсь но йонылэсь быдэс мугорме йырысеным пыдозям пушнерамзэс-вандылэмзэс чик ой шоды. Мугорлэсь жуамзэ мон соку гинэ шоди, ку нюк дорысь кык сю метр пала ортчи но зеглэн модосэныз сьолтаськыса уси. Быдэс мугоры чидантэм юмекъя, тужгес но — пыдъёсы. Кион сямен вузэм потэ, но уг луы: астэ шараятод.

Сак кылзиськыса, жужыт зег пушкын тыбыр вылам коня ке кылли: Юралэсь но сторожлэсь кытынзэс валаны тырши. ;оген кыли сторожлэсь Юраез тышкаськемзэ. Иське, со возьмаськисьлэн киулаз сюрем. Сюлмы шуг луиз. Тулкымась зег, кызъёс, инбамысь пилем — ваньмыз милемыз тышкасько кадь.

Пукси. Пезь-пезь кариськи. Коня ке зег шепез ишкалти но куадаса сии. Ма меда кароно? Кызьы та секыт югдурысь потоно? Нош быдэсак мугоры дугдылытэк жуа, юмекъя, вандиськем интыосыз юн висё. Тодам лыктиз: пушнерез мунчоын пось вуын возиськом но суретэныз йырмес, мугормес гылтылиськом, пушнер веникен париськиськом — мугор уг сутиськы. Озьыен, пось ву солэсь сутись кужымзэ быдтэ. Со сяна, гурт калык жуась, сутиськем, юмекъясь мугорез будос воен, шырбыж, вукуар парем вуэн зыра, висись инты жогак каньыла.

Мон но озьы эмъяськыны малпай. Доре вуыса, мунчоез эсти, ву посяти. Мунчо дорысь тымет дурын шырбыж, вукуар турынъёс трос будо вал. Соосты бичай. Уйин мунчо эстэмлы песянае паймиз. Мар карод на, мугзэ верано луиз. Песятае ёросэ кошкемын вал бере, песяе мыным мугорме зеч-зеч зыраны юрттиз.

;укна султыса валай: шуныт мунчо, вой но турынъёс юрттизы, мугоры буйгаз. Пыдъёсылэн вандиськем интыосыз гинэ юмекъяло на вал. Соосыз кык-куинь пол зырано луиз.

Кожыяны ветлыкум юмоке сюреме йырвизьмам кемалы кылиз. Сыче мур нюкъёсыз палэнэти ортчыны тыршисько, муртлэн бакчаяз но ноку ой ни кожа. Калыклэн лэчыт верамез йырам чогиськыса кадь улэ: «Муртлэн нянез шоры ымдэ эн усья, Инмар ваньзэ адзе но ужедъя дунъя».

Юраез сторож арканэн кутэм. Асьме палъёсын ноку адзылымтэ маке. «Чапай» колхоз кожы бусызэ возьманы Астраханьысь вуэм бигер воргоронэз медъям вылэм. Та учырлэсь коня ке толэзь азьвыл со Чапай гуртысь зуч кышномуртэн кузпалляськем. Азьвыл со Астрахань степьёсын вал уллёосты возьмаса улэм. Кулэ дыръя валъёсты отын арканэн кутыло. Тини Юра но солэн арканаз сюрем.

Ахмад сторож Юраез тодмам, но лэзьымтэ.  Сое колхозлэн кеносаз пытсам,  чукнаозь отын пукем. Кожыез лёгамез, бичамез понна анаез правленилы штраф тырем. Собере гинэ Юраез эрике лэзиллям.