Жамедин бубадин махарикай. Къанихвални азгъунвал

      Аллагьди дуьньядин чинал халкьнавай сад лагьай инсан тир Адема яцар кут1унна тураздал цан цазвай. Са югъ арадай фена, кьве югъ арадай фена, мад гзаф йикъар арадай фена, амма ада яцарин галатуникай хабар кьун тийиз абурув мадни гзаф чилер цазвай. Тураз четинвилелди ч1угвазвай яцарин далудихъ нубатдин къамчи галукьайла, гьайванрикай сада, давам гуз тахьана, кьил хкажна худадиз лагьана: «Я Аллагь, им вуч завал тир чаз ракъурай? Чун галатна кватнава, амма идан рик1ел акъвазун сак1ани къвезвач!» И гафар ван хьайи худади вичин малайик Жабраилаз «Вач килига, Адем квел машгъул ят1а!» лагьана, ракъурна. Жабраилаз акур шикилди адан рик1ик къалабулух кутуна. Ада кьатайвал, Адема дуьньядин са пай цана, амма адан фикирда гьич акъвазун авачир. Жабраила къванер к1ват1на, са ц1арц1а туна ва Адемаз къванерин ат1ардилай и пад вичинди тирди малумарна. Адемаз хъел атана, ам Жабраилахъ галаз кк1ана. Амма Жабраилан къуват гзаф тир, ада Адем к1аник кутуна ва адан гъилер кут1униз эгеч1на. Гьа и арада Жабраила Адема к1вачеривди са гьихьтин ят1ани гьерекатарзавайди кьат1ана. Элкъвена килигайла акур шикилди малаик мягьтелна: Адема ат1ардин къванер к1вачеривда анихъди,… анихъди, мадни анихъди – Жабраилан чил галай патахъди, ийизвай…!
На лугьумир кьван, инсандик къанихвални азгъунвал, дугъриданни, гьа вич халкь авур йикъалай квай къилихар я!