Жамедин бубадин махарикай. Гафар маса гузвайди

     Алатай девирра деллекчи (парикмахер) къиметлу пеше тир. Абуруз, гьатта, са бязи азараррикай дири хъувун патал ва я т1ал регьятар авун патал, уьлгуьчдал иви къачунни,  ихтибардай.
     Садра т1вар – ван авай деллекчи куьчедай фидайла, адаз, рекьин къеряхдал, вилик терезарни эцигна ацукьнавай, са кас акуна. Деллекчиди, вуна ина вуч ийизва лагьана   хабар кьурла, а касди вичи гафар маса гузва лагьана. «Вучтин гафар?» – аламат хьана чи деллекчидиз. «Къиметлубур» - жаваб гана а касди. «Къимет куьн я?» - хъуьрена деллекчи. «Ви жибинда авай пулдин кьадардилай аслу я!» - жаваб гана ацукьнавай касди. И жавабдилай кьулухъ деллекчиди жибиндиз гъил вегьена са пул акъудна. Гафар маса гузвайда вегьена адан гъиляй пул акъудна, ахпа терездиз т1амп1 ягъана, лагьана: «Са к1валахдив эгеч1далди вилик дериндай фикир ая!»
…Вахтар, вядеяр алатна. Деллекчидин рик1ел гафар маса гузвайди аламачир. Йикъарикай са юкъуз деллекчидиз пачагьдин везирди вичин къвалав эвер гана. Везирди адаз, «гзаф вахт я пачагьдин кьил т1азва, сагъар хъувун патал, адан кьилиз уьлгуьч яна иви къачун герек я» лагьана ва деллекчидин гъиле уьлгуьч вугана. Деллекчи рази жез гьазур тир, амма садлагьана к1валахдин важиблувал гьисс хьана, рик1ел вичи маса къачур гафар хтана: «…дериндай фикир ая!»
Деллекчиди везирдиз «Гьурмелу везир!Куьне заз икьван важиблу к1валах ихтибарзава, зун и кардиз гьазур хьун герек къвезва. За  фена гъил-чин чуьхуьн къачуна, михьи парталар алук1на, пачагьдин ччандилай дуьа авуна хкведа!» - лагьана. Везир деллекчидин гафарал рази хьана. Деллекчи к1вализ хъфидай рекье пара дерин хиялрик экеч1на. Гьа и ч1авуз адан кьили ван авуна…
Деллекчиди чин-гъил чуьхвена, партал дегишна, к1валяй вичин уьлгуьчни къачуна, хтана. Ахпа, ада садазни таквадайвал, вичинни везирдин уьлгуьчар дегишарна. Деллекчиди пара мукъаятвал хвена, пачагьдин кьилиз са шумуд чкадилай уьлгуьч яна, ч1уру ивияр хкудна. Пачагьдиз акваз-акваз регьят хьана. Ада деллекчидиз и к1валахдай вуч вичиз к1андат1а лугьун теклифна. Деллекчиди ихьтин жаваб гана: «Еке гьуьрметдин иеси тир пачагь! Завай са ч1уру к1валах - везир алдатмишун, хьанва. За куь кьилиз ягъайди, везирдин ваъ, зи уьлгуьч тир. Жедат1а куьне залай гъил къачун т1алабзава…»  Пачагь элкъвена везир галайвал килигна, лагьана: «Ак1 ят1а, везирдин уьлгуьч адан вичин кьилиз ягъа, заз адан чина авай рангар са пара аяр аквазвач!»
Везирдин кьилиз ягъай уьлгуьчди ам кьена, уьлгуьчдин сивиз зегьер янаваз хьана...
Дустар! Садрани къиметлу гафарин къвалавай эляч1на фимир, абурал къимет эцигай кас вуж хьайит1ани.