Жамедин бубадин махарикай. Пешекарар хьухь!

Са гьукуматда и жуьредин адет авай: йиса садра, тайин тир юкъуз, пачагьди вичин кьилив къвез к1андай ксар кьабулдай. Инсанриз пачагь, адан дуьзгуьнвилиз килигна, пара к1андай. Гьавиляй атан патав шикаятар гваз ваъ, савкьватар гваз фидай. И юкъуз адан кьилив физ к1андайбуркай учур жедай…
Шегьерда т1вар-ван авай харат уст1арди гьар йиса пачагьдин къвалав вичин зегьметдалди авунвай са савкьват гваз фидай. Мукьвара пачагьдиз биц1и хтул хьана лагьай ван атай уст1арди, адаз пара дамах гвай кьеб туьк1уьрна. Уст1ар кьебни гваз экуьнлай учурда акъвазна, амма пачагьдин патав агакьнач. Пер хайи уст1ар к1вализ хтана.
Пака экуьнахъ к1валахал фидай рекье, уст1ардин гуьгъуьна вичин куьмек теклифиз са чуруяр квай итим гьатна. И касди гъил къачун тийиз акурла, уст1арди «ви пеше вуч я лагьана» хабар кьуна. «За саф туьк1уьрзавай уст1ардин гъиле ч1ар вугузвайди я!» - лагьана и касди. Харат  уст1ардиз хъел атана, ада «и гьавайда кьил хуьз к1анзавайбур вуч бул хьанва» лагьана, итим вичелай алудун патал, юкьвак квай керки хкудна, санлай итимдин чурудин са пад михьиз твана хкудна. Итимдин намусдик и кардикай хкьуна, ада уст1ар суддиз вугуда лагьана, хъфена.
И дуьшуьшдилай кьулухъ уст1ардин еке бажарагъдикай шегьердиз хабар чк1ана, ва яваш-яваш пачагьдивни агакьна. Пачагьди и кьве касни вичин патав гъун эмирна. Саф туьк1уьрдайла ч1ар вугузвайдан чурудин са пад квачиз акур пачагьди уст1ардивай – им ви к1валах яни лагьана, хабар кьуна. Жаваб патал, уст1арди керкидив и касдин чурудин муькуь падни санлай твана хкудна. И кар акур пачагьди, чуру квачиз амукьай кас пулдалди рази хъувуна рахкурна. Уст1ардин еке тарифни авуна, адан кьебни кьабулна ва вични мажиб къвезвай к1валахдал эцигна.
Дустар, са к1валахда хьайит1ани, квекай зурба пешекар хьун герек я. И карди куьн патал гуьзет тавур хьтин агалкьунар гъида!