Жамедин бубадин махарикай. Цавун канцеляридин жава

Якъин я, т1ебиатда авай зат1ар вири сад садав кьадайвал туьк1венва, гьарда вичиз Аллагьди ганвай къуватдиз ва гуьзелвилиз килигай рол къугъвазва. Тек са инсанрин арада  ч1уру крар гзаф гьалтзава: са куьнизни лайих авачирди гьукуматдин кьиле хьун мумкин я, са инсандин эмирдалди виш, агъзур кас рекьин мумкин я, мана авачир шиирар кихьидай касдин ктабар еке тиражралди акъудзава ва ик1 мад.
… Сулейман пайгъамбар хайи йикъалай тама яшамиш жезвай: ам сятралди вагьши гьайванрихъ, къушарихъ, векьер-кьаларихъ галаз абурун ч1алал рахаз жедай. Ч1ехи хьайила, ада инсанрин къвалав хтун кьет1ъна. Адал гьалт авур сад лагьай инсан - иер к1алубдин гуьзел дишегьли Пери хьана. Перидал ясдин парталар алай, вилерни гъам – хажалатди кьунвай, амма Сулеймана и к1валах кьат1анач. Т1ебиатдин гуьзелвилерал гьейран яз ч1ехи хьайи Сулейманаз гьа инани акурди Перидин гуьзелвал хьана. Сулеймана адаз вичиз гъуьлуьз атун теклифна ва гьасятда т1уп1ал пишкешна. Периди адаз «Сулейман, эвленмиш жез тяди къачумир, кьуд патахъ килиг, фена инсанар гьик1 яшамиш жезват1а килига, ахпа хъша» лагьана, мукьув гвай хуьр галай пад къалурна. 
Сулеймана Перидин гафариз яб гана, рази хьана. Ахпа ам хуьр галай патахъ тамайт1уз фенвай  рекье гьатна. Са арадилай, ам садлагьана къах хьана акъвазна. Адан вилик дак1ан жедай гьалдин шикил акъатна: рекьел кьве мийит, кьуд пад ивидай касунвай, анихъ – са тар ат1ана, къеняй къизилар авахьнавай, адалайни анихъ са къажгъан ац1ай аш авай. И акур шикилди адаз еке эсер гана, бедендик зурзун кутуна. Сулейман кьулухъ элкъвена. Адан рекьел мад Пери акъвазнавай. Ада и сеферда Перидал ясдин парталар алайди ва адан чина дерин хажалатдин гелер авайди кьат1ана. Перидини Сулейман къах хьанвайди кьат1ана, адаз ик1 лагьана: «Сулейман! Къе ваз акур мусибат себеб хьана ви вилерал алай перде алатна, ваз зунни исятда халисандаказ аквазва. Къе экуьнахъ и кьве кас тамуз к1арасар гьазуриз фенвай. Са тар ат1анмазди къеняй и къизилрин хазина акъатна. И кар акур кьведан вилерини къанихвиляй нур гуз эгеч1на. Кьведан хияларни, вич муькуьдакай гьик1 азад жедат1а, гьадакай хьана. Сада, и кар чуьхуьн патал вич к1вализ хъфена аш гваз хкведа, лагьана. Амма, вичи рик1яй ашдик гьик1 агъу кутадат1а лугьуз фикирзавай. Муькуьди лагьайт1а, и гафунал шад хьана, вичи ам хтанмазди гапурдиг ягъада, лагьана фикирна. Ахпа, гьа лагьайвални авуна, аш гваз хтайди, гьасятда яна кьена. Вичи шадвиляй аш нез эгеч1на ва вични хуьрекдик квай агъудикай кьена…»
  «…Ингье, гьавиляй зун ясдик ква, шехьзава. Захъ галаз гзафбур шехьзава, вучиз лагьайт1а, инсанрин ва гьукуматрин арайра авай къанихвилинни азгъунвилин, тапарринни ва кьве чин хьунин нукьсанар гзаф инсанар терг хьунин себебдиз элкъвезава - давамарна Периди. Сулейман, геж тахьанмаз, туп1ални къахчуна жуван гьайванрин, къушарин, векьер-кьаларин патав алад! Хъифидай рекье, цавун (Аллагьдин) канцелярдиз вач, аниз дуьнья хаталу рекьел экъеч1навайди, нукьсанри инсанар, гьукуматар - дявейрилай, азаррилай гзаф тергзавайди хабардар ая! Хабар яхъ и к1валах гьик1 акъвазарин?» 
Са арадилай цавун канцеляридай инсанриз жаваб хтана: «Дуьнья арадал гъайила, Худади квез виридалайни еке азадвал – гьар са касдиз вичин ахлакь, вичи вич тухунин тегьер хкядай мумкинвал ганва! Амма Ада инсандиз жавабдарвални тайинарнава. Жавабдарвал кьилиз акъуд тавун – им гьа и дуньядани ва муькуь дуьньядани жаза къвезвай гунагьвал я. И винидихъ къалурнавай нукьсанар  - лапни еке гунагьдиз лайих жезва! Жаваб регьятди, асантди я: къаст к1евиз яхъ, куьне куь уьмуьрдик нукьсанар кутумир!» 
Дустар! Квек, са к1валахдив эгеч1дайла, адан эхир гьик1 атун мумкин ят1а фикирдай, хесет  квани?