Седрединни сур ат1удайди

Гзаф ч1авуз пис азардин азабдик хьайи, кесиб хзандин кьил тир хуьруьнви регьметдиз фена. Кьейидан хзанда, юлдашдилай гъейри пуд аял авай. Ч1ехи аялдин ц1уд йис тир. И хабар агакьай, адет яз гьамиша хуьруьн сурар ат1узвай касди лагьана: «Къе заз к1валах авачиз дарих тир, Аллагьдиз шукур хьурай, к1валах гайи!» Ахпа ада лопаткани каца къачуна хуьруьн сурар галай патахъ фена…
Мейит чуьхвена, кучудиз гьазурна, ахпа хуьруьн жемят к1ват1 хьана кьейиди вичин эхиратдин к1валин къеряхдал тухвана эцигна. Фекьиди вичин адетдин к1ел ийизвай, итимрини дуьаяр гузвай. Мейит суруз авуддай вахт алукьайла, са шумуд жегьил гада куьмекдиз фена. Гьа и арада сур ат1ай кас абурун вилик акъеч1на, виридаз ван жедайвал «вичиз сур эгъуьнай пул ганвач, вичи кучудиз тадач» лагьана. И, садани гуьзет тавур гафар япарихъ галукьай жемят, са декьикьада кьван къах хьана амукьна.
 Ахпа абурун арадай мягькем къадамралди, кьилиз т1имил рех янавай итим -  Седредин вилик экъеч1на. Ада жемятдилай вил элкъуьрна, лагьана: «Эхь, рик1ивайни, и регьметдиз фейи касдин талукь мукьвабурукай ваз пул гудай кас инал алачиз хьана. Абур яргъара ава, кучудиз агакьнач. Ибур Аллагьдин кьисметар я. Пака-муькуь юкъуз абурукай хкведа. Ахпани и хзандихъ са йисан жунгав ава, пака тук1вада, маса гуда, вун рази хъийида. Ваз инал и месэла хкажун кутугнавачир!» Амма сур гьазурай касди гъил къачунач: «Абур заз чида, пул гудайбур туш!» 
И гафарилай кьулухъ, Седредина вичин кисе акъудна, герек кьадар пул хисабна, а касдив вахкана. Ахпа ада фекьидивай  гъил къачун т1алабна, жемятдихъ элкъвена лагьана: «Къенинлай кьулухъ идаз сур эгъуьн патал эвердай касдин… (инал ада пара «к1еви» гаф лагьана). Ам  зи хсуси душман жеда!»
…Регьметдиз фейи касдин к1валин вилик пудар гузвай юкъуз жемят мад к1ват1 хьанвай. Фекьиди к1елзавай, инсанри ара-ара гъилер хкажиз дуьа гузвай. Са арада, регьметдиз фейи касдин стхадин хци (хтула) Седрединаз са патахъ эвер гана. И кас яргъарай хтанвайди тир. Ада Седрединав сур гьазурай касдин пул вахкана. Амма Сидредина гьасятда, регьметлудан ч1ехи хциз вичин патав эвер гана и пул гьадан гъиле хтуна. «Чан бала,ви бубадиз Аллагьди регьметрай! Къуй и пул квез зи патай гьалал хьурай» - лагьана.