Седредин ва адан рухваяр

Колхозда гатфарин чуьлдин к1валахар къизгъиндиз физвай. Мукьвара дяведин ц1ай гъалибвал къачуна туьхуьрнавайт1ани, инсанрин рик1ел, бедендал алай  азабдин пар т1имил хьанвачир. Седрединанни ч1ехи хва дяведай хтанвачир. Умудни югъ-къандавай ц1развай…
Кьвед лагьа хва бубади эхиримжи йисара вичихъ галаз цан цаз ва маса чуьлдин к1валахар ийиз тухузвай.  И крарай гададиз хъсан тежрибани хьанвай. Алай гатфариз Седредин азербайджан пата харат уст1арвилин хсуси к1валахар ийиз геждалди амукьун хьана.  Хва хуьруьн лежберрихъ галаз гатфарин цанар цаз чуьлдиз буба галачиз, текдиз экъеч1на.
Гьайиф хьи, жегьил гададин хийир так1анбур, пехилбур арадиз акъатна. Седрединан гадади колхоздин къуьлуьн тум гзаф харжзава, колхоздиз зиян гузва лугьана, са ни ят1ани Правлениедиз кихьена. Жегьилдиз анай эвер гана, ч1ехи халуйри месэла «лап рик1ивай» веревирд авуна. Правленидал гадади вичиз бубади чир авур къайда - къуьл цадайла гьар гектар чилиз кьве килограмм тум чук1урун герек къвезвайди лагьана. Накьварин еридилай, гатфариз ник1ера жедай къушарин къадардилай аслу яз, са кьас т1имил ва я пара герек атунни мумкин тирди гъавурда тваз алахъна. Амма Правленидин членри – гададиз жерме авун патал сес гана, адан к1вачихъ  8 кило къуьл яна… Им Сидрединан ч1ехи хзан патал гъвеч1и пар тушир… 
Гьа йисан зулун са йикъуз, кимихъ физвай рекьел Седрединал хуьруьн Председател гьалтна. Председателди кам вилик вегьена, салам гана. Ахпа ада Седрединаз хъсан, акьуллу, кар чидай хва тербия гана ч1ехи авуна лугьуз, вичин еке разивал къалурна. «Ви гадади къуьл цай чкайрай кьве сеферда гзаф бегьер хьанва, амма муькуь участокра къуьл авач, бегьер лап т1имил хьанва» - малумарна ада.  «Гада зи къвалав рекье тур вуна, Седредин стха, - лагьана ада. Зун адахъ галаз рахада» Седрединан гуьгьулар ачух хьана, ада к1вализ хтана, вахт яргъал ч1угун тавуна, хва Председателдин патав ракъурна. Шад жедай к1валах, дугъриданни, аваз хьана. Хва колхоздин грамотадизни лайих хьана, Председателди адаз къад кило къулуьн чекни гана. Складчидизни чекинай къуьл вахтунда  ахъайун буйругъна.
 «Чан хва, - лагьана Седредина, - гьар мус хьайит1ани, жува ийизвай к1валахдив рик1ин михьивал, гьакъисагъвал хвена эгеч1а. Ви зегьметдин нетижа са гьихьтин ят1ани пишкешдиз лайих ят1а, ам Аллагьди я фад, я геж вав агакьарда!»