Чирвал вуч паталди я?
Гьик1 ят1ани, са юкъуз къуншийрин къанажах ачух хьайиди хьиз, абуру сеткадин часпардин чкадал кирпичдин цал ч1угварвал хьана. Стхайри са машиндавай кирпичар, цемент, къум гъана, йигиндиз к1валахиз эгеч1на. Акваз-акваз цал хкаж хьана, са т1имил вахтунда цлан кьакьанвал метрдилай гзаф хьана. Гадайрик гьеле акъваздай фикир кваз аквадачир…
Гьа и арада чи к1вализ зи са хъсан таниш атана. Ада эцигунрин рекьяй фадлай к1валахзавай кас тир. Къуншийри эцигзавай цлаз вичин тежрибалу виляй килигна, ахпа ам захъ суал гузвай тегьерда элкъвена. «Эхь, - зарафатна за, - къуншийри кирпичдин цал эцигзава, «дуьньядиз машгьур китайдин цал»!» «Заз аквазва кирпичдин цал эцигзавайди, - лагьана зи мугьманди, - амма им китайдин ваъ, гьак1ан цал я лугьузни жедач!» Ахпа ада вичин гъил са 30-40 сантиметр чилелай виняй хьиз ц1ийи цлан къвалахъай тухвана: «Цал и ц1арц1айт1уз ч1ук1уда, идакай яргъаз акъваза!»
К1вализ хтана, юлдашди чи вилик чай гъана, ахпа чун са гьихьтин ят1ани эхтилатрик акатна. Хабарни авачиз са сят кьван вахт алатна. Садлагьана «гурр авуна» цал чк1ай ванци чун хъецел акъудна. Къуншидин ц1ийи цлан кирпичар гьа зи танишда лагьай ц1арц1алай винихъ вири чи патаз авахьна. Чк1ай цла, сегьнеда ахъа авур пердеди хьиз, чаз къуншидин гадайрин чеб чпивай квахьай чинар алай шикил къалурна...
Ингье дустар, чирвилер авай инсандинни (зи таниш) авачирдан (гадаяр) арада авай тафават. Чирвилер авай касди са вакъиа алукьзавайди виликамаз кьат1уда, ада ам гьазурвал аваз гуьзетда, вичин крар гьам хисабда кьуна ийида. Чирвилер авачир касди эцигай шейъинихъ мягькемвал жедач, ам гьа гадайри эцигай цал хьиз, фад чк1ида. Йисар фена, кьуьзуь кьилихъ, элкъвена кьулухъ килигайла акур уьмуьрдилай рази яз амукьна к1анзават1а, къемаз чирвилиз къимет це!
Свидетельство о публикации №219072000776