Гундушв руб гъадабгъуз хючна базариз

               
                ГУНДУШВ РУБ ГЪАДАБГЪУЗ ХЮЧНА БАЗАРИЗ
                (Ихтилат)


       Агь яв биц1ивахт узу!
       Ахсрар ккахьуйи К1ару Ярквлантина убхьурайи рукьси. Ккахьу ахсрарин нурар кархьуйи ичв унч1вин гюзгдик гъеебц1у гъургъмишин рангси.
       Уларигъян гъюдубзури нивк1 мярхярин кьяляхъди гъягъюйва крибчуз хъюбгъю чигран дифраъди Кьаркьлиинна ук1аз. Ва ужв ккадатуз талсар али канч1арихъди – Гьеп1илна ук1у ругдиз.
       Ккат1абхьу вичун гъюл жиниди гъадабгъну ип1ру! Шалар гъахи рякъярихъди дяхнин к1улар дюхру! Кац1нах ккубкьди к1ури, уьлер ктагъурайириз дерникк ккилигури дийигъру!
       Агь, гьякьвал адру, гьаци дубхьну ккуниси гьибгъри гъабхьи биц1игандин вахт!

       Гьадмуганси гъира гъяраригъинди гъяхьра! Ургмар, гьалвар, бархлар, ахнар, диванар, телефнар, телевизорар уазариъди, газонариъди, нивйириъди, газелариъди! Йигъандин аквнаккди! Ашкарди! Сарихьанра гьилигуб адарди! Хъанара бул ибшривучв! Бул ибшривучв гъяхьрударихъди улар гъярудариз! «Гьяйифийк1ан» к1ури!
       Юк1в убгурайидариз! Лихурушра гьубк1ну адрудариз!

       Хъа думуган мицикьандиси дайи. Шуйи айидар мал-марчч, багъ-бистан, хяр-хут1ил ва гьадрарилан артухъ вуйиб йишвну жиниди гъябгъюйи жагвариъди, гъулариъди гъяраригъинди!
       Адруриз начди вуйи айирихьан ча пуз! Айириз гуч1уйи адруриз тувуз! Диндина гьюкми дерккнайи гъадагъйирихьан! «Дурар гъузну ккунду касибди, фук1а гьудрубк1ди, ухьухъ лихуз. Ади гъабшиш дураризра, дурарси лихбакк ккуркьди ухьура!» – магьа фтихьан гуч1уйиш ва гъадагъйир фицдар вуйиш! Агь думугандин мидкан хабар адру байвахт!
       «Аллагьдин кьадрар гьацдар ву! Кьисматарихьан дар гьудуч1вуз шлуб!» – магьа касиб адмйир ва к1вакк фук1а кадру касар лук1валиъ гъитрайи диндин куч1лин к1улин къанунар!
       Кефер ап1инай учвуз маллйир ва кьазйир! Ачва дап1ну вердиш учвухъ лихрудар – к1ул ис, ва ап1рудар – учву гъяру рякъяр диш!

       – Гьамус ухьура, жан бай, дахъдихьа хьаяргъ. Хач айи ахин гат1абхьидихьа гъяригъинди. Лэъфин ерина илипурайи, ч1илар кайи бархал ккипдихьа ихь ужв ккадатнайи хяларин хулакк. Шагьселем бажийи туври имдарзухьна руб. Ичв адашдиз марччарихъ хъайи ккубкьну кьюб шегьи. Закур Хючна базариз гъярударихъди гьаъдизаву хуз ухьуз леэф бирхуз гундушв руб. Яв таяри вари ап1ура, уву душну ухьуз саб-кьюб каркайи лишвкьана хурадарваааа гемерйирилан Сулан сивиъ айи!

       Гьамус хиял мап1анай колхоздин марччарихъ хъайи Хамисайин жилири гъахи хьаяригъ дахъди к1ури му хизан. Ваъ, гьап1руб! Касиб марчлихъниз ккуркьуз гъитдайин искалатчйирина биргадирарина саркрари!
       Сар фуж-вуш кент-худайи гъяригъинди гъяфдар йишвну душну гъюдюхну гъахидар вуйи му дишагьлийин! Гъугъмик гъизил гъибихъганси гъулайвална шадвал кади гъяжягъюрайи жигьил хъуркьрайи дада.

       – Сарун лишварин вахт ккудубк1ну!
       – Ккудубк1ундайиш валлагьи зиркь адабт1идийва!
       – «Шейт1нар-жинари…» к1ури уву узухьди удуч1вуз гъитнана ч1атиндиии, дурчарра кмиди уву хури яв кьял’индиии!
       – Ич классди Бадайина Атури чпира закур гъягъюрча к1ур Хючназ аьхюрарихъдиии!
       – Уву, жан бай, дурарихъди мягъян! Бадайин адашди, Хюл’ин малариз лигури пялкьярстар пулар гъадагъура, Атурин адашди мектебдин савхузуди хъабхьну ккудубк1айиз, пул ккадабц1ура! Хъа ичв адашдин, ч1ат-ч1урдиъ кьяши жилариин дахъри, ярхи хьарди мархьар-мирккарикк гъазанмиш гъап1уб, учв’ин алабхьрубдихъкьана гьубк1радар! Вааа-ваъ! Дурарихъди уву пулт1ан ч1ур ап1идарва! Мягъян!!!
       – Ич классди баяр вудииии, узуз гьарган гивч1лягъ к1удииии!
       – Ккудубк1у! Гъягъидива Ряжявалдин Гюлюзерихъди! Узу дугъаз дупназа. Гъадагъидиза к1урайи, чахъди!

       Ярхла рякъ жилгъйириъди Дизирдихъантина, Дубсу (Пайгъамбардин) гъарзхъансина, Уркъларин канч1арихъди, Аьхюниркантина (Рубас), Халгъарин ушвариантина, Ягъли (Жжугьудити) гъарзарихъантина, Нискраригъянтина, Дифран-хьам’антина, Йирхьинидири Ззимззарт1илан улдуч1вну, Жвжвугьут1накасина, Жжафран-штухьансина, Мукьакку-хулихъди, Варг’андидарихъанди, Мякьярт1илансина, Абдиярикансина Угъулдизди удуч1вну, Барсик1айин штухъансина, Нит1ик-прарихъантина, аэродломдилансина, Цалккарин гъулккансина йиц1икьюб километркьан му биц1и бали фици ккадап1ур?

       Сюгьрин хьайизра, мегьел ахсрар ккт1уршвузкьана хъуркьнадайи, амма:
       – Я, Хамиса, нашдияв учухъди гьаърайир гундшвиз! – к1ури дурарин улдариккантина гарпаринна к1ик1йирин сесер саб гегьди гъажаргъу.
       – Гурбагур ишричву, гьарайниин алдарчва, дийигъай, гъириккну гьаъраза!
Дадайи набалугъ хъиргну хъитайиз дурарин шил мектебарикансира гъубшнийи.
       – Чкиди гъарах, бай! Дизирдихьинди гъягъяйиз хъуркьдива!
       – Хъа муч1уди узуз гуч1дарииин?
       – Гуч1уруш, кьяляхъ хъадак! Мягъян!

       «Пагь, фу к1ура гьагъму ич дадайи! Вари уьмурди ккилигурайи гъягъру гьаму саб йишвхъанра хъадак к1урайириз лигайчва! Губч1уруш, йибк1 жан! Филадизкьан гуч1ури уьмур хъап1уз ккава? Гъушхьа ухьу! Гъайихай, ликар, учу! Жаргъури!
       Хъуркьруси улихьди гъярайидарихъ! Сифте вуйиз гьа базариз гъюри! Думура – гундушв гъадабгъуз!»

       Асккан табарин муч1у даргар, шикил зигурайиси, завхьан жара хьуз хъюгъю! Даргарихъди вари дерейиин рябкъбан юруш илибшу. Ригъ гьудубч1вайиз абхънайи аквну сюгьюр алап1урайи.
       К1ик1ларна дюргънайи жвилли гъванаригъянтина биширугдиъди гъярайи гурпарна-гарпар, аьлхъбарна-к1ик1йир, Дубсу гъарзхъансина гъяради, гьамус, ерхьуриси, рякъюрира айи.

       Набалугъдин гуч1 гъудубгу ва дурарихъ хъуркьуз жвар ккипу.
       Кьадабхъу Ургъларин гъулакк ккайи, дюрхъяр айи гъарзариккантина дифруна мик1ру уьлюбхну гъабхурайиси айи му дестейихъ хъуркьуз пиган – думукьан ухди дурарихъ хъиркьидарва. Мурар, сарун вердиш духьнайи гьар султ йигъан рякъяриъ ахъри. Хъа, хъуркьуз ккунди кьяляхъ хъахънайирин сабпи раж вуйи, мицистар, жандикан зазар-кюлер кц1ахури, диву лик гагь кьяни шули, гагь уьлюбгъюри, ккадаурайи жилгъйир!

       Дици дайва гьа жигьил, дадайи гъяриз кац1ариз лигуз гъарах гъапиган, ярхла ву к1ури, унт1ар-зунт1ар ап1урайир! Магьада берей! Ибар кюдют1ну дерккнайва ичв дадайин, узура Хючназ гъягъюрза к1ури! Жарари ап1руб уччвуйи дябкъну узура гьаци ап1арза к1урубдиз шлуб гьациб шул! Магьа хъуркь увхьан шулуш дурарихъ! Ликариин алидар шверттер дарив, урхъар кайидарушра жжахдин кетйир алвуин! Увук кайиб: жарадари киву бурзарин карсу к1анар дернин гарнакан кц1ахуб! Ва ц1ар-ц1арнаъди дивнайи ц1аргъарин даргар ктуршвури, ликар эрхнайи дерниъ ирчри, кфир кумар адауб! Аьхю хпарилан гъайри дурарихъди увут1ан биц1и баяр-шубарра хъа гьа, увуз аьгъяш! Гьадрарихъдикьана шуладарвухьан, хъалтушв! Гьелебелесен – кьял’ин алиганси саб шврушв! Гьудуч1в гьамлин, кушвкушв!

       Хъа му фици вувуз, тинди ктуч1вуз к1ури Рубасдилантина иливнайи гъяч1яргъю гак1вларин ккуру ливливсиб гъядлантина улдуч1вурайир гук1унди! Хиял ап1ин му сабпи ражари т1илариин паргарагъаж хьтарди улуч1вурайи пягьливан ву! Уву улуч1вну к1ури яв гъагъишнаан к1анакк ккайи кьюб зурба хамхар дюргъну ниризди ахьидар, ликар дуркьну див, ккюрхну мягъян муркларикди, яв гъагъ ц1иб ап1арза к1урубси! Марччарихъ хъайи ичв адашдин юк1в мюбгъян, дарши гьилламадар! Гьеле увусдариз лиг: Бадайизна Атуриз, теленгйирси, ялхъвнар ап1ури улдуч1вури шулу душвлан. Гьамус, Халгъари гъап1уб ву пну, дурари ярумчухди дап1надар – чпи улдуч1вуз дап1найиб ву! Дифриинди тинди хъайи Чвкъюригъна гъяру вахтар дурарин гъушну! Индийский гуруси уьрхну гьавайиъди гъягъру Наврузбег-халу йик1урухъанмина!

       Хъа Ушвариз хъуркьу ихь набалугъ, ушв абц1ну аскканзина ккилигура, аьршдиз удуч1внайи хифарин к1ак1наъ балдабу йивури фуж деънайк1ан к1ури! К1екке ву, я хъахънай, чаз хифар уьргъюрайир, ахълириз ц1икбак кахьуз! Ягъли швуршвлариин али к1ару «урхьар» ит1уз хъюгърада миар ву к1ури! «Тююю» дап1ну гат1ахь! Саб биц1иди рякъюъ гъафну к1ури гаш алабхънадарвуин! Гьарарикк гъягъмучар аг, гач1нин гъиву чиграхьди ккахьри шулу. Гьадрар ит1ин! Миар к1арударси уьрударра шулу зазар кади шлу гьараригъ! Му, гъула гъахьир вуза к1ури, фук1ара аьгъюр дарки! Хъа фици аьгъю хьивдихъа, гъюбарихьан гуч1бу, дут1наш-дарш чпин кац1арихьа гъяризкьана дурушрайириз! Агь байк1и йиз вахт, набшдик1ана думу, ч1урдиъ фук1а йиз лик ктрубк1ишв гъидритру!

       Ягъли гъарзарихъинди гъюру му, ва сац1ибсана вуйиш кьяляхъ хът1урччвурайи, к1анакк ягълишин гъябкъюр. Ул хъубкьдар к1аназ! Гъябгъюрайи Аьхюнир гардандикк ккайи арсран зунжурсикьана рябкъдар – гьадмукьан ккуруди! Дилинтина, жвуван улихь хьайи шикилси рябкъру Чвкъюругъярин (Сулант1илра к1ури шулу думу гъулаз) гъулан аьгьвялатназ уччвуйи тамаша ап1ури деуз шуйи.
       Деуб наънан, дестейихъ хъуркьну ккундарин! Атуна Бадай гьадрарихъди хъашра аьгъяянхъа? Дураринра шил айибси дар. Айиш, дурари Угъулдиъ гъядлансина зюргълар урсрайи кьулуртйиризди гъванар ккат1ахьури, эллешмиш духьнахьидийи, шлинуб гъванди фукьан аьхю пакь ап1уруш гьюжатнаъ уч1вну.
       Барсик1айин штукк ккухъну-ккухъундар, душвкансина гъяризди кайи хяхлин кьуликансина саб жжярхял дибиргъну му бай, Акъаарин багъдихъансина кум-ц1ади т1ибхурайи дестейихъ хъуркьуз ккунди, гьяракатнаъ ахъу. Амма – наънан! Мугъан жаргъубт1ан дестейин гъягъюб чкиди вуйи!

       Саб арайиланси машиндин дих гъабхьи. Халгъарин Нурудин халуйи, кьябаъ йишв имдаршра, сарна-сарди гьаму рякъяриъ айи биц1и бай гьап1рур вуйк1ан к1ури, дебккну, иту. Му, шадну ктут1у!
       Школайин му машиндиъди гъярайи адмийири гья-гья уьлюбхну, яягъди гъярайидарикк хъял кап1райи.
       Кьялхъян бортнахъан хъит1игънайи набалугъди чпин гъуландариз гьарайниинди, хъич1ибхнадру хил саб-швнубан хъап1у. Гьамдиинди дугъу дурариин чан сабпи «гъалибвал» улупурайи! Пагь, мугъан, биц1ир вушра, жандиъ айи гьисс! Гуч1бяхин!

       Машин диш дап1ну базариз Хючнаарин асккан к1улихъна хъап1нийи. Эдеурайи халгъари му бализ фукьан к1убнир дарин к1урайи, чан сарна сарди Ляхлаансина базариз гъюрайир! Хабар дар дурариз му ахникк аварши, дестейихъан хъадабхънайи хъалтушв вуйибдикан. Якьин, мушвахь Бадайна Ату хьайиш, дурари халгъарикна мугълан к1урудар к1уйи, фукьан учв гуч1рур вуйиш, гьариз аьмлюхъяриз гъягъюз даршули, ясана гъяриз – дагрик кахъуз! Хъа вушра хьтарди хьуб ужуб гъабхьну, дарш балин паргар ургъюйи.
       Ул алдатну ккудубк1дар, му фукьан аьхю базар ву! Мушваъ адрубра адар: кьярт1-парт1налан гъадабгъуб куш-кейт1нииннакьан; гъаб-гъажлан гъадабгъуб кепккир-абугелдниинна; сини-миндилан – хямир кт1ибшру кьяб-т1абк1иинна, яни – ккуни жюрейин бакришин!
       Мугъаз учв мина гьаз гьаънайир вуйиш, зат дярякъюшварихьан, гьич к1ваиндикьан имдайи.
       Базар, Хючнуарин кючйир вуйибси лицури му саб вахтна гюздин тукандихъинди адахънийи.
       – Ччумгьа думу, Ату, – к1ури, Бадайи, аьхю гюзгдиантина ткандин айит1инди лигурайи чпин классди бай улупу.
       – Яяя Абут! – к1ури Атуйи дих гъап1у.
       Чаз таниш дих кубк1у му баликк ич1 ккибшу ва багахь гъахьидарин хилар гъидису.
       – Учу уву гъагууууб!
       – Хъа узу учву агури хьуууб!
       – Уву мина шлихъди гъафунва, Абут?
       – Машиндиъди! – къурзлувалиинди гъапи миди.
       – Дарш увура гьаддиъ айна?
       – Хъа узу учвуз дид’ан хилар хъаъри гъяркъюндайнучвуз? – мугъан фурснан кьадар адайи.
       – Учу думуган, гьадабт1бахъ, акъаарин багът1ансина гъягъюрайча. Машиндин дих хьубси, хъивну, кеъну, эъдича к1ури рякъюзди ут1урччвуз ккун гъабхьунчуз, хъа машин мик1на-клакси гъубшу.
       – Ари гьаддиъ узу айза!
       – Ивус ижжири, машиндии ээуьр! – Бахилвал кадиси гъапи баяри чпин нугъатниинди мунуриз.
       – Ухьу, кьяляхъ, гъулаз фила хътакидик1ана, – пну Абутри ушвниан, гъайгъуллу, гъулайлу ва фу-фтикна вуш аьгъю ап1ру кьюб гаф идирчу.
       – Магьа гьамус, гюзгдин маганзиндиан гьялавана гюмбе гъадабгъну гъягъидихьа. – гъапи Бадайина Атури.
       Абутриз, хъа ухьу Гюлюзер бажикьарихъди гъягъидарин пуз ккун гъабши, амма Атуйи, дурарин гьял аьгъяди гьамцидарихъинди илт1ибк1у:
       – Дурар ухьухъ лигрудар дар. Дурариз ухьу чпит1ан улихь гъягъруб аьгъя. Гьей, дурар биржварин гъядлан улдуч1вайиз, шлиз аьгъя ухьу наънанзина гъяради шулуш!
       …

       Ибшри сарун. Мурариз вари ляхнар аьхюдар хътарди, чпин к1ул’инди ап1уз ккун гъабши.
       Аммаки сабсана му Абутрин к1ваан удубч1вурадайи. Дугъаз гьялавана гюмбе фйир вуйиш аьгъдайи, я гьамусдиз гъеерхьу гафар дайи.
       Му тукандиъ Бадайихъдина Атуйихъди уч1ву Абутрин «шархьал ккадабхъу». Хъа фукьан утканди дабалгнайишв дарин! Миндина тинди жерге-жергеди, зисдина асисди жар-жарди – кьуларигъишвар ва дурар гъяц1ну – ицци-ужудар! Шархьил ккададабхъурин гьамцибган! Хъа, гьамрар улариз рякъюри, гъюбахъ-гъюбахъ артухъ шулайи тямягьнакан гьап1дива! Тямягь ву к1ури дурарикан фук1ара гъадабгъуз удудубкьрайиваликан гьап1дива!
       – Узу, саб кила вафлйирна лиманад гъадабгъидиза, – ва гьаци гьап1нура вуйи ицци фун ккайи, «ч1ач1ухйирин дада» Атуйи.
       Му классди бализ «ч1ач1ухйирин дада» гьаз дупнаш варидариз аьгъяйи ва дугъ’ин думу ччвур аьдати лак1амси алабхънийи. …Гьаз даршулин арда, Атури, гьар чпин дадайи илипу ч1ач1ухай «фурт1» дап1ну, минди лигну тинди лигайиз, хътип1уйи. Вари гьаци Гьябибит-бажийи метте-жжюжжейиз урч1вц1урна урч1вуб ч1ач1ухай алахьну к1ур.
       – Узу, шкалатарна пиражккияр гъадагъидиза, – чан фикриз гъафиб дишла тамам гъап1нйи, «п1ялц1ик1айи тавра» Бадайира.
       Хъа мугъаз «п1ялц1ик1айи тавра» гьаз дупнаш сакьюдаризт1ан мялум дайи. Даршра школайиъ айи варидари дугъаз ччвурнан ерина гьаци дих ап1уйи. Мугъ’ин му фици алабхъну хъа? Алабхъну сарун чав ап1ури гъахьи жинжалвалариз дилигну. Фу ву арда, МТФейиинна хюнйириз никк артухъ хьуз патока дубхайин тувуйи ахир. Хъа мугъу гьап1ру, Хюл’ин маларигъ гъяйи чпин адашдихьанна дадайихьан жиниди, адабц1ну флягайиан гьадму малариз тувру патока, алт1ну чан турбайиъ, п1ялц1ик1 вуйиз к1ури, Кьулккариз масу туври гъахьну. Гьаддилан Кьулккарихъ ц1их хъабхьру ва гъулан саб швур гьут1убччвуру. Хъасин, касибар, Огнийихъинди алдауру. Халгъаринуб вуйиш вари дюньяйиз ашкар гъабхьнийи, хъа мураринуб жини-жиниди гъюдубч1вну гъубшнийи.
       Багъишламиш ап1инай, Кьулккар, ичв сир ачухъ ап1баз. Сарун ичв гъул, Велт1лари хъурхьну кчвубхуб вуйич дупну пуз хьибдарчвухьан.

       Улар вари кьулар вуйибси исина-зина жаргъура му набалугъдинра, фтихъан хъч1ихуруш мюгьтал духьну.
       – Я классди баяр, гъапнийчва ахир, «гьялава, гюмбе» к1ури… – мушвхъантина чаз фу пуз ккунди айиш Абутри ачухъ ап1дар, хъа дишла гъавриъ ахъу Бадайина Атури дугъ’ин «ппяяяя» уьлюбхю.
       – Гьамусра гьадрар фйир вуш аьгъдарнус? Гьагувухь, фукьан хьавухь пул?
       Мугъу, гъюбччвну к1анаригъ хил, адабгъну саб кайи к1аж манат улупу.
       Бадайи дишла гьисаб гъап1у:
       – Саб гюмбена кила гьялава гъюрдувуз! Ча гъадагъузавуз?

       Дустарин кюмекниинди Абутрин хиликк сеткайиъ фу-вуш ибшу. Дугъан хъюхъни чан сетайихъан ицци кьюб ниъ зигура, ***инси ппуларра кмиди ришвура, хъа фу ниъ фтинуб вуш аьгъю ап1уз шуладар. Мициб аьжайибвали дугъан сппариккан шид гъябгъюрайи ва: «ккунийда деъну саб майдандиин булагъдихъ, ниъ кап1уз» к1урайи чан-чакна. Мугъан бахтнаанси гьаци гъабхьнира вуйи. Дурар биржвар ккайи гъядланди дурушди, гьадабт1бахъ, Дагниарин гъазмйириккантина гъярихъди дуфну Нит1хъарин булагъдихъ егин гъаши ва гьари чахь хьайидар адагъну, чиб-чпиз каъри баяри иццишнарикан бегьем кьукь ктабгъу.
       – «Гьялава» гъапиган йизра хиял гъабхьнийиз му мишмишин т1яаьм алиб вухьиди к1ури, вуйишт1ан – п1ялц1ик1ин – дупну Абут Бадайихьинди циккандиси гъилигу. Ва чахьинди гат1абхьу лигбан гъавриъ ахъу Бадайира кьялхъруси:
       – Уву мишмиш наан гъябкъю биркува! – гъапи!
       – Бирк узу гьацира вуза… – дупну Абутри чаин али, чпин бабан хччугикан дибирхну алабхьнайи филиндин шалврин кьамкьаринишвариин али урхъариъ т1убар урччври, – хъа му яв пирашкказа к1уруб, Бадай, ч1ач1ухайин ниъ хъайибсиб вуявки? Дарш вари пирашккияр гьамцдар шулин? – дупну, му ражну Атуйихьинди гъилигу.
Мидкан ассар гъабхьи бай гьамус Абутриин алархьуз хъюгъю:
       – Гьамусдиз я ч1ач1ухай, я пирашкка ккудрубкьурик кайи фурс! Урч1вц1урна урч1вубушра, варжушра, ичдариз гъит1дар! К1уруб аминив?! Дарш увуси, базариз гьаз гъафир вушкьана, аьгъдарагайси! Чав сабан машиндиъ т1еъну к1ури, вардарикан ктатури хъюгънайир!
       – Гьамус диван ап1идив ичв дади! – гъапи Бадайин гафари му «хъюхъ дазабгнайир» кцухуз гъиту.
       Сарун дугъан хъюхъ дазабгну рябкъюри имдайи. Дугъаз дишла к1ваин гъабхьи учв мина гьаз дуфнайир вуйиш. Ву пну сарун кьан вуйи.
       – Йиз фу тахсир а хъа базариъ гундушв руб адар к1ури! – К1улар ккадагъуз ккун гъабхьи гъучдиз.
       – Гундушв руб адру базар гъапиш вари гъуландар аьлхъюрвуин! Дици к1ури ичв дада алдатмиш ап1уз хьибдарвухьан!
       – Хъа узу дугъаз магьа гьялавана гюмбе гъабхурадарин?
       – Гюмбе ккипну к1анакк, гьялава илипну зиълан беле ицци нивк1ар ап1идива, ичв дадин п1акьар куркьиган! – Мурарин агьвалатнакан хабар айи аьхюри хъаънайиси гъапи «алверчи» Бадайи.
       – Сарун яв жжану! – пну хъипу Ату, алишвлан гъудужву ва гъулазди рякъ гъибису.
       – Учухъ нугъатар хъит1рубси дайчва! Гьамус увухъра, Абут, «Гундушв руб» хъибшурш к1урза! – гъапи Бадай гъяаьлхъю.
       – Хьузра ву гьа «П1ялц1ик1айи тавра»! – гъапи Атура гъяаьлхъю.
       – Увуз ужуйи «Ч1ач1ух’ярин дада»! – гъапи Бадай Абутрихьинди гъилигу.
       – Хъа «Гундушв руб» гьаз ккебехъна, баяр? – гъапи Атура Абутрихьинди кялхъриси гъилигу.
       – Ц1ийи нугъат хъибшу бай фици хьиди к1урва!
Мурар чак кялхърайиб аьгь дарап1ди му гъучийи дамах кади:
       – Хъа узу машиндиъ эур вуза! – гъапи.
       – Яваш сабан! Гьеле уву Хамиса бажийин улихь гьаци к1уруш лигархьа!
       – Узу гъилицунза, адайи гундушв руб базариъ!
       – Ваааа! Чаз «гундушв руб» гъапида!
       – Я кас баладар, хъана узухъ хъахъдичва, хъа гьадмуган лигарзачвуз!
       …
      
       Му гъучдиз мици хьуб’ин шадну кудут1найи баярин улхбар-рахбар гъулаз гъяйиз ккудук1ундайи.

       «Гундушв руб» лак1ам хъибшурин хасиятра гундушвси кагьалуб ва рубси арсруб гъабхьнийи.
      
        Магьа мухъугъанай учву лак1милан хасият асиллу дар к1урубдихъ!

        Гъулаз гъафи «Гундушв рубдиз» фу гъабхьнуш, мушвккансина ихтилат учву давам ап1инай, йиз биц1и дустар…