РогIера кхин цхьа де, дIадели дахна,
Маржа-яI, валарна герга со вуьгуш.
Кхин цхьа де яцъели зама сан тахна,
-ЙогIучу кханенна ойла ян вуьтуш...
Леррина ойла еш, дахна де луьстуш
ГIайгIане ладоьгIуш наб яйна сан.
Диний-те дан дезарг ас цхьа а кхочуш,
Я эрна хан йойъуш, де дели дIа.
Дог хьостуш хаза дош аьллий-те цхьаьнга,
Я доцург дийцина къа латий ас.
Я сагIа кховдийна дог эцна цхьанна,
-КIоршаме вист хилла йина-те вас.
Ойланаш, ойланаш сан коьрте хьийза,
Буьйсанан йохаллехь ладоьгIуш Iа.
Гуьйренан шийла мох сан корехь цIийза,
Гур дуй-те тIедогIу и хаза Iа...
август,2019ш.
Ойланаш
© Copyright: Сайд-Эмин Мартанхо, 2019
Свидетельство о публикации №219082401691
Свидетельство о публикации №219082401691
Рецензии
