Хадижа Г1ябдуллаевас

Жагати далуйтани
Дубурти делх1ехъунси,
Зайдик1ул макьамтани
Шурми дуч1ескайуси,

Х1урхъла арцанти-булан
Даим х1яйрандируси,
Жагьилтала урк1бази
Мурхьли минариубси,

Хъариэси замана
Ц1яб х1ябла карерхурси,
Бутрирадси Хадижа
Релх1еби х1у алжайзир!

                Ну гьардаим пикририк1ули рирус, сен жявх1ели Дагъиста поэтуни х1урмат-кьимат агарли кавлутирара или. Сабаб г1ямрула даража гьалабях1 бикуси белк1-белч1 агнилизиб биэс яра дишт1ати миллатунар Дагъиста халкьала мезани царх1илтани х1ергънилизиб биэс.  Лебли бииши, чулайчиб царх1илла г1якьлу мурхьли биъни марбарес бирх1ебирули, поэтунас диргалабулхъути адамтира, шяг1иртачи бугьтан чебирхьутира, илди, сабиван ах1и, дек1арли пикрибик1ни багьандан дигх1ейгахъутира. Асубирар, сабаб бишт1ах1ейчибад чула урк1бази питатли карт1ибси динна асарли адамтази далуйти кьабулдирахъес имкан х1елугнилизиб биэсра.  Сен-сен биалра, XIX ибил даршдуслизиб Хадижа Г1ябдуллаевала гьаннала манзиллизибван бег1тани урк1и аргъили, илала пагьму г1еббуцили, гьаннала х1янбиубти поэтуниван, гьести г1ямруличи раайчи, ил далайчи калунси риалри, х1ябилра дахъал илала дикьурти далуйтани ва ч1иллайтани буч1анти разибариши, даргала литературализи мекелли халаси пай кабихьиши.
               19 дусла г1ямруличир аррякьунсири ил пергер далуйтала ва дезнала уста. Илини г1елаб батурси пагьму – илк1ун литературализи кац1ибси цаибси ганз сабри. К1иэсил ганз кац1ахъес ва сунела ак1ниличил дунъя жагарабарахъес, тяп хъябхъяли бячунси дубурла михик1 вавасван, илис кьисматли кьадарх1ебариб.