Мунги Г1ях1мад

                Ишбарх1и адамти гьарил халаси х1ерк1ла бех1бихьуд баргес, ил баргибх1ели, дярг1ибти шинна урунжуни умули ва ах1ерли дих1ес къайгъилизибх1ели, нуша даргантала литература нушала пикрумала дураб батес асубирару?
                Нуша даргантала литературала урунжуначи пикри бях1чиаэс, дила пикрили, замана баили саби. Даргала поэзиялис хьулчи кабихьибтала пагьму мурхьли бяркъес, илди х1ербиубси манзилла шурт1ри баяндарес, илдас диргаладулхъути гьадирклуми белгидарес нуша даргантала чебла саби.
                ***
                Мунги Г1ях1мад, мургьи-арцла урх1мешуах1енси уста, жагаси т1амала вег1 далайчи, пагьмучевси ва бузерила адамтачи дигичевси поэт, зума-зумали дирихьма дурцути дубуртазив, Г1ярбук1ла шилизив х1ериубсири, царх1илти дубурлантиван,  къияндешливра мискидешлизивра дебшлавиубсири. Илала пагьму кьиматлабарес вируси багьудичевси адам агарси манзиллизир г1ямру дерк1адра, ил шяг1ир халкьла урк1базив калун, ва, дила пикрили, наслуба г1урра хъумх1ерту.
Г1ямузгила, Г1ярбук1ла ва Хъярбукла устнаниван, Кавказла бег1лара ахъти, янира дуц1румра миъли дуцибти, гьанна альпинистуназир лертигъунти ваях1 агаркъи, сари хьурали ихъутала г1ямрулис урехилати дубурти ахъили, дура улкнази ваибкъи, илала альпинистлагъуна хабар х1едерхур. Сенах1енну спортла х1язли ах1енри ил даим кьяркьли кайзурти дубурти-ургавад викили, Стамбуллизи ваахъибси. Мунги Г1ях1мад сунела някъба дарибти ваях1 дицес, яшав барес ибси пикриличил сайри Турциялизи ваибси.
                Персияла улкназиб ва Франциялизиб х1ербирути адамтала г1ямру дяркъурли, Дагъиста халкьанала г1ямруличил цугдуцибкъи, илала я г1ялимлаван хабар т1инт1х1ебиуб. Амма Мунги Г1ях1мадгъунти устнала ваях1ли Г1ярбук1ла ши дунъяличиб машгьурбариб, чуни дарибти урх1мешути ах1енти г1яг1ниахълуми дунъяла музейтази даиб ва ахъси кьимат сархиб.
                Г1ямрула къияндешунани Мунги Г1ях1мад чуйнара кьакьавак1ахъиб, амма, сунела далуйтазиб чебиуливан, ил гьачамалра мук1урх1ек1ахъиб, дарданазиб алк1уси пагьму гьат1ира бугабиахъуб. Ил пагьму сунес ах1ерти дубуртазиб г1ярбук1ла лугъатличил зайбухъун. Цаличил цали бархбас бузахъес имкан агарли, вег1-вег1ла шимазиб х1ербирути даргантани х1ела т1ама камли аргъиб биалра, г1ярбук1антани илала пагьму чеалк1ути наслубази баахъиб – Ф. Абакаровала г1ях1дешли Мунги Г1ях1мад пагьмукартала авидлизи катур.
                Мискин халкьличи урк1и изуси, г1ярбук1ла мургьи-арцла   устнала искусство дурала улкнази баахъибси Мунги Г1ях1мадла  пагьму Дагъиста дубуртазиб г1урра зайбик1ули калаб!