Бургьаб х1ела пагьму, Аминат

Аминат Х1япизовас

Гьар даим урк1и гьаргси,
Даим някъ сахаватси,
Дунъяличиб алк1алли,
Алк1аб х1угъунти рурсби.

Баркь-бацлизир х1ялалси,
Х1яялизир умуси,
Жагьтас бузес дигалли,
Бузаб х1у кьяйда карц1ли.

Буруси дев дурусси,
Урк1ила гьав гьайбатси,
Дунъяличир дилкьалли.
Дилкьаб х1елаван дезни.

Нешван Дунъя дигуси,
Жанван г1ялам дигуси,
Тяп х1угъунти адамти
Башаб, г1ях1лад башалли!


Х1япизовала поэзияличила

А. Х1япизовала назмурти шурми-ургарад дурадиркути, вих-или дуч1ути, шараб шинна урунжунигъунти сари, сари дурах1едикес г1ямалагарти, зайх1едик1ес чараагарти, сари аргъибсила урк1и х1яйранбирути. Ашкарливан, умути, дярг1ибти урунжунала шинни адамла чарх батбулхъахъа, урк1ила гьав г1ях1булхъахъа. Илгъуна асар бирули саби Аминатла назмуртани сари дуч1уси адамличира.
А. Х1япизовала поэзия муирала аслу-минала дугьбани варакьбарибси, рифмалашал зайбик1уси, мешубуцуналашал давлачебси поэзия саби.

Бугал кьаламла мух1ли
Гъайбик1ахъули г1яшли,
К1ап1ила лих1илизи
Бурира рарг игуси…

 Х1ера, секьяйда сипатбирулил илини шурмар лусентала суратра:

Дак1иб кьар шурмачирра,
Супелван г1улухъала.
Дерхъиб, шинни х1еркьибкъи,
Дубурла гьулу хъара.


Наб Аминатла назмурти илала сари-рег1ти х1яланачи, илала х1ял-т1абиг1ятличи мешудилзан, сенах1ену илини сунела урк1илизир алк1ути дугьби, гьачамцунра ах1и чучила пикрирухъи, назмуртази каргьахъули сари. Сунела урк1илизир улукьути пикруми  лебил г1яламлайчи мешути диънили ил тамашарирахъули сари. Аминат Х1япизова г1яламла дардли дардрик1ули сари, илдала шаддешли х1улрурк1ахъули сари; кьясдешлис яра вайбаркьлис мер ках1елесли, адамти даршути г1ямруличи карц1биахъес, илди талих1чебли калахъес рулгули сари.

Сепайда, шурдатес буц1и мукьрачи,
Жагьтала муръаби – шадти мукърачи,
Шурбатес…кьясдешли кьац1кабуцибти
Лагьнас к1ялг1ни лушул лацла устначи.

 Ил т1абиг1ятла сих1ру-дархси  караматдешлира даим ясиррурцули сари:

Малх1ямти, назакти исбагьи х1ебли
Лявбариб янила бярг1иб михъири,
Х1яршбариб х1яна бек1, байдариб х1улби,
К1ант1ибак1иб, бац1иб миълахъла урк1и.
Агь, малх1ямдешла ц1акь – миц1ирти сих1ру,
Дунъя варакьбирул шиниша шиг1ру.

А. Х1япизова сагасилиг1ир бамсриагарли умц1уси, сунени бируси х1ячиличи, буруси девличи мурталра чекаризурси автор сари. Илбагьандан илала пагьму г1урра мурхьбирниличи, илала поэзия сагати агурбачил гьат1ира зайбулхъниличи, илини сунела гьарил дев дурусбирничи уч1ан вирхес вирар.
Гьардизаб х1ела лерилра кьасани, Аминат! Берхъаб х1ела рух1ла давла! Бизили т1емдик1ути михик1 вавнани ургубван, жагати разити х1яланани вахбаршаб х1ела г1ямрула гьуни!


Х1ела рузи Г1яйша Кьурбанова