Миллатла давла мях1камбируси

 



Ах1ерси Перзият Кьурбановна,

Дурх1нала разити вич1иръалали
Даим шадрирули, жагьли калаби,
Шадти мажлисуни гьунчидуршули,
Далай-делхъаназир г1ямру дерк1аби!

Дунъяличиб бахъал саби духутира, жагатира, адамтас г1ях1деш барес дигутира хьунул адамти. Илдигъунти хьунул адамтала ургаб бег1лара гьалаб гьанбушес рирус Перзият Бях1яндовала у, сенах1енну нуни хъумартес рирули ах1енра 2017 ибил дусла октябрьла 18-личиб Дагъиста пачалихъла университетла филологияла факультетлизиб дураберк1ибси даргала миллатлис багъишлабарибси мажлисличила. Илак1ун цалабикилри лебилрара-сера дарган мезличи урк1и изути, миллатла культура, литература, история калахъес дигути адамти. Ил балбуцли бахъал дарганти разибариб.
Разих1ейэс вирару, университетла зал дарган г1ях1гъубзни-игитунала, спортсменти-чемпионтала, поэтуни-писательтала, г1ялимти-кандадатунала, СМИ-ла ва театрла х1янчизартала, г1ях1тигъунти учительтала, бузерила гьабкьянабала ва бахъал царх1илтала суратуначилти стендунани жагабарили биалли? Илгъуна мажлис дураберк1ес багьандан, халаси заманара, дахъал устадешра, арцла харжанира, миллатла сархибдешуначи пахрура, бируси балбуцличи дигира диэс г1яг1нити сари. Илдигъунти къилликъуни сунезир лерх1ели сари Перзият Бях1яндовас чедиб гьанбушибси мажлис дураберк1ес имканбак1ибси.
Мекелли дахъал сари Перзият Бях1яндовала сипта х1ясибли дуракайути жузи, дурадурк1ути юбилейти ва царх1илти далдуцуни. Даргантас дигесили бетаур илала къайгъначил дуракаибси Х. Юсуповла х1янчи «Урус ва дарган мезла словарь», бишт1атас хасбарибси антология, сунезира даргала халкьла мух1лила пагьмулизирадти произведениеби, поэтунала ва писательтала белк1ани кадерхахъурси.
Пахру х1ебарес х1ейрар илгъуна сиптакар дарган хьунул адамличи, сенах1енну Перзият Бях1яндова гьаннара къайгъилизир сари, даргала литературала классик Г1ямарла Батирайлис нушала тахшьагьарли сабиси Мях1ячкъалализиб памятник т1ашбатахъес, ил т1ашбалтуси мер белгибарес, ил х1ядурбарес багьандан арцла харжани даргес.
Ну рирхулра: Перзият Бях1яндовагъунти хьунул адамти дарганти-ургаб лебалцадх1и нушала мез чеахъдик1ули кавлан, даргала литература, журналистика, г1илму, культура гьаладях1 аркьян, миллатла рух1ла давлала кьадри ахъбуцес дигути адамти имц1абирар.
Баркалла х1ед, Перзият Кьурбановна, х1у илгъуна лернилис! Даргала миллат уржахъути далдуцуни дурадурк1ахъес х1у арали ратаби!

Тухумти даим карц1ли,
Г1ялам х1ечи г1яшикьли,
Тяп лерсиван х1ялалли
Г1ямру дерк1аби х1уни!