Жан датла Нурулгьуда

               Ну-чина аркьули риасра, чинар цугрикасра, мякьлабти адамтачил тянишрирули рирус. Х1ера, илкьяйда 2010 ибил дуслизир, «Замана» газетала редакциялизир тянишриубсири ну Нурулгьуда Раджабовачил. Ил итх1ели имц1аливан исламла масъултас хасбарибси рубрика бузахъули, газетализир рузусири.
Нурулгьуда итх1ели дебали разириубсири, сунела узи, профессор Расул  МахIяммадов, ну ак1убси Кьярбач1имахьила шилизив калниличила багьурх1ели.
               1975 ибил дуслизиб чула хъулри сагадарес багьандан къаркъа хIядурдарес или, Издагла хъяб бик1уси мер-мусаличи узби МяхIяммадзагьир ва ГIябдулла Зайпуллаевхъали арбякьунтири. Ванза икъухIели, илдани хьанц1а къаркъалилизирад дарибти хъулрала гъят1биълуми  даргибтири. Илдала дух1нар гъургъала тIалхIяна, шин дашути къаркъала жирбитIуни  (трубаби), гермукьа, жура-журала мачни, кулхми, т1улкми, къаркъала гажинти даргибтири. Илди секIал ардухибтири ДГУ-ла исторический музейлизи. ДГУ-ла г1ялимтани кабизахъурсири: ваяхI урег-ибил даршдусла диъни. Профессор Расул  МахIяммадовли, гъят1биълуми ва илар даргибти ваях1 ахтардидарили, бурибсири: «Гьанна сирхIяла халкь х1ербирути дубартазиб армунти хIербирули кали саби или. Илгъуна пикрилис бикьридеш дирули гъургъала тIалхIянали, шин дашуути къаркъала жирбитIунани  (трубабани), гермукьали, жура-журала мачнани, къаркъала гажинтани, хъуми дарили калунти мерани, дубурти-ургабад барибси гьунила хасдешуни лернили. Илди баянтачила Дахадаевла района итх1елила багьудила отделла начальник, историк Хасбулатов Хасбулатли дуракаибси «Уркухъла ва Дахадаевла районна шимала история» бикIуси жузлизира белк1унсири.
                Профессор Расул  МахIяммадовли марбарибсири, историяла гIялимти Старабоннара, Плутархлара белкIаназиб Кавказла дубуртазиб, дурусли  буралли, жявзамана хIербирули калунти булгуначила, даргантачила, армунтачила гьанбуршули саби или. Моисей Харенскийли сунела «Армунтала история» бик1уси белк1лизиб гьанбиркахъули сай, Дициравиялизиб бетаурси дергълизиб булгуначила, даргантачила, армунтачила кьаманала гъабзадешличила, чIумадешличила, илдала гьаввашан Шергиличила. 
                Профессор Расул  МахIяммадовли бурибсири: «Ил секIал марбирули сай гIярабла писатель Масулинилира.  Х1ебиалли, гьаннала КьярбачIимахьила шила мер-мусаличиб, булугуначил, даргачил баргбалги, Издагла шилизиб х1ербирули армунтира кали саби. Илди халкь Издагла шила мер-муса дархьдатурли, арбукьнилис сабабли бетаурсири Сирх1яла дубуртазиб бусурман дин т1инт1бирни. Бусурман дин кьабулбарес х1ейгути армунти Издаг бик1уси ши бархьбатурли арбякьунтири или». 
                Нурулгьуда Раджабова сунела тухумла г1ямруличил дархдасунти баянти дурибх1ели, дебали тамаша ва разириубсири. Итх1ели бетаурси цаибил ихтилатличирад дех1дихьили, Нурулгьудалара дилара ургарти гьалмагъдеш уржиб. Чуйнара урк1и разибариб ил дигили парчрируси, шагьарлизир х1еррирули риалра, тяп дубурла шилизир х1еррирусиван,  г1ях1ялдеш дируси хьунул адамли. Чуйна илала кабинетлизи арац1аслира, сари набчир халаси риалра, тяп зиланнизиван гъайкарик1уси,  сунела хурегличил, чяй-чакарличил бут1аларируси ил адамличи дила урк1и кабизур, илала пасих1ти, халкьани-ургаб уржибдеш ва гьалмагъдеш калахъес жидик1ути белк1ани г1ях1дизур.
               Г1ях1дизур наб Н. Раджабовали урус ва дарган мезли делк1унти жузи:  «Иш хабар ах1ен – кьяркьси бархьдеш саби», «Илди шушала урк1базиб кавлан», «Дагъистан: 20 дус даршудешлара дургъбалара ургаб» ва ц. Илдала дурарадк1ун, Н. Раджабовали дарган мезличи исламла дахъал жузи шурдатур ва брошюраби дуракаибти сари. Гъамли  дуракаили дирар илала г1урра  чумал жуз ва брошюра.
              Республикала ТВ-ли личила авал фильм х1ядурдариб: «Нешличила г1ебшнила тугъи» – РГВК-ли, «Кьисматла дукьби» – ГТРК-ли ва ц. Илала кумекличил документальный фильмабира х1ядурдирули сари. Ил  «Ассалам» бик1уси, дарган мезли дурабулхъуси газетала редакторли урч1емал дус рузули калун, илх1елира алапа агарли, цазаманализир «Замана» газетализирра рузули. 
              Нурулгьудала илгъуна х1янчи нушала х1укуматли ахъли кьиматлабариб. Илис «ДАССР-ла культурала рурибси х1янчизар» ибси у бедиб, Пачалихъла Премиябачил: «Мургьила ч1ака», «Госсовет-ла РД-ла Грамота», «Россияла ц1уба къургъи» ва царх1илтачил шабагъатларариб.
              Насих1ятчиван ихтилатрик1уси Нурулгьуда Раджабовала т1ама, тяп рух1ла рузилаван, мурталра наб аргъес дигахъис.
              Ах1ерси халал рузи Нурулгьуда, х1ед арадешра, разидешра, талих1ра дулгулра. Гьардизаб лерилра х1ела кьасани! Аллагьли г1ерруцаби!