21-пи март день поэзии

21-ПИ МАРТ – «ДЕНЬ ПОЭЗИИ»
(Ихтлат)

…
– Ужуб ляхину! Вуда! Биллагь!! Вугьа, жан дустар!!!
– Вугьа?! Ужуб ляхинин?! Ай мидин!..
– Учвт1ан ужуб адар! Адар!! Адаргьан!!!
– Адарин? Фтин тяриф ап1ури хъюгънава йипа?!..
– Тярифназ дару тяриф фтихъ хъибт1уз ву?!
– Хъа уву данна адру адар ап1урайир?! Гьелебелесен му йиз швушв гъахи йигъ ву! День поэзии! Хъайву пеэригъ гъяхъриву! «Пооооэээзии!» Ихь ч1ал’индира к1урадаргьа: «День поэзии»! Фици шуйк1ан думу ихь ч1алниинди, яраб? Агьа: «Шиърарин йигъ»! Мици дюз гъюрадар: шиърарихъ йигъ шулин? «День поэзии» гъапиган фу мяна ади к1урахъа? Поэзия аьгъяхьуз шиърар вуйиб. Ваъ, ваъ! Дици дар! Шиърар – поэзия дар! Поэзия – мутму, шейъ дар! Хъа шиърар, ихь, мутму шулайихь! Гьаддиз, дюз гъюрадар! Хъа магьа, уву, ихь ч1алназ илт1ибк1, поэзия хъайир!? Гьан! Ккилигураза!.. Магьа берей!!! Кьяркъярси рабхурайва, «аяванавур ич1рияв, день поэзии» ап1ури гьирин ухди!!
– Гьадмура аьгъдайвуз, ккибици к1ул?! «Поэзия – мутму дар»! Хъа фу ву? Думут1ан ужуб мутму айин сарун?!
– К1ул кибицнайир думгьа уву! Узу дидиз «мутму дар!» к1урадарза! Узу поэзия шиърар дар к1ураза! «К1ул-к1ул»! Хъа яв к1ул алда…яв!
– Хъа фу ву думу шиърар дарди? К1ул кубк1найир!
– Хъа уву кубк1ну ич1…ву! «Шиърарин йигъ шлубин»?!
– Хъа шли к1ура «шиърарин йигъ» к1ури?
– Магьа уву: «День поэзии! День поэзии!» ап1ури либцурадарна сац1иб зикв илибшназуин к1ури!
– Узу увуз пеъ вуйин!?
– Гьамп1дик1ана яраб гьамдикан?! Чаз гъапибдиккан к1улар ккадагъури! «Зикв илибшуб» – пеъ хьуб дар! Кьуш кибшнайивал ву!
– Ааааа! Гъавриъ ахъруси йип, бая!
– Уву, адмийиригъ даршиб, ихь ч1ал аьгъяйвуз!? Гизаф дарабхди, илт1ибк1еле, «день поэзии» ихь ч1алназ!
– Хъа – «аьшкьнан йигъ»!
– Явашеле! Явашеле! Фтин йигъ?
– Хъа аьшкьнан!
– Поэзия «аьшкь» вуйин?
– Хъа фу ву? Дарш – къуру шиърар? Хъит1найи гьярфар? Увуз аьгъяш, гьамус шиърар компьютерарира дик1ура…
– А вуйи гьа?! Диди фици дик1уру? Дидиъ юк1в айин? Дид’ин к1ул алин? Дидиз фагьум айин? Дидхьан фикир ап1уз шулайин? Дидиз мак ап1уз аьгъяйин? Аьхирина-ахир дидхьан люкьнар ап1уз шулин?..
– Хъааа, авдааал! Гьамус, хпирин ерина, гьацдар хура! Уву к1урава, му, «швушв гъахи йигъ» дар, к1ури! «Аьшкь» ву швушв хрубра! Шиърар дик1рубра! Мак ап1рубра! Хабаъ т1аърубра! Инсандикан инсан ктаърубра! Аьлакьйир дерккрубра! Нивгъар рузуз гъитрубра! Гьирин ухди гъудужвну ч1атишв гъябкъюри «гьаяванарур ич1рияв!» пуз гъитрубра!..
– Вуш «аьшкь» кьяш кайи мутму ву йипа!
– Узу к1урадарза, думу чан гьаци ву!
– Гьаааа! Гьамус сац1иб гъавриъ шулайиси аза…
– Уву гъавриъ шайиз, дюнья хъидип1нура ккудубк1иди «роботари»!
– …
…