Хан кхаьчча, лийра ву
Цхьайтта-шийтта шо хир долуш жима к1ант вара цуьнан. Важа доьзалхой баккхий а хилла, зударий балийна а, балонза а цхьацца белхашкахь а, доьшуш а д1асабевлера. Х1орш кхоъ бен ца диснера кхеран кертахь. Жима волуш дуьйна коча 1амийна волу Хьамзат цхьа шен амал йолуш вара. Даимна цунна хьесталуш лелара нана. Дас а могуьйтура жимах волчунна вукха баккхийчу доьзалхошна ша аьттехьа могуьйтуш ца хилларг. Доцца аьлча, к1ант 1усина хьоме хеташ вара, нанас санна хьеста ца хьестахь а. Нохчийн массо доьзалехь а жимахверг хуьлуш ма ву деций-ненаций ваха къастийнарг. Х1ара шиъ делла д1адаллалц кхаба а, кху шинца 1ан а, виса а везаш верг вара Хьамзат. Амма, мухха делахь а, наггахь дас к1антана дов деш меттиг а нислора.
Иштта цхьана дийнахь, суьйрана ша ц1а веъча, б1аьрг тухуш кертахула вола а велла, х1усамнене чу мохь туьйхира 1усас:
- Хезий хьуна! Чохь вуй и к1ант?
- Урокаш еш ву!
- Урокаш-м ас йийр ю хьуна цунна! Схьавола алал цуьнга цкъа чехкка!
- Ваттай! Юкъара х1унда воккхуш ву иза х1инца? Ц1е яьлла болх ма бац вайна? – к1ент1ехьара г1о даккха юьйлира нана.
Амма цунах г1уллакх ца хилира. 1уса ша аьлчунна т1ера ца волура.
Ца дог1учу дагца, партал, реза воцуш, хьаьжа юккъе шад а х1оттийна, веана, дена хьалха х1оьттира Хьамзат:
- Х1ун боху ахь?
- Ас хьоьга хас ахка ца аьллера, малонча?!
- Ас муха охку иза, сан корта лозуш хилча?
Шен мерах кхозу седа киснара схьаэцна йовлакхца д1а а баьккхина, к1анте дикка хьаьжира 1уса. Цуьнан кийтарлонаш дика евзаш волчу кхунна хиира Хьамзата харц дерг дуьйцийла. Шен когаш к1ела а хьоьжуш лаьтташ волу к1ентан мера т1ехь керла, т1е к1омар а даланза, махцарган тидам бира кхуо. Т1аккха, т1е а чевхина, 1усас хаьттира к1анте:
- И х1ун ду?! Ас пуьташ ботта маггане а мегар дац, мосазза аьлла хьоьга?! Хьоьга муха дийца деза кхин?! Пуьташ ца ботта-м стаг хила хьаха веза! Дера веза… Оцу мерана х1ун хилла хьан ?
Сихха воккха хила, стаг хила сатесна волчу Хьамзатна, оццул дас шен юьхь яьккхича, эхь хийтира. Охьатаь1инчуьра кхин хьала а ца таь1аш дийца х1оьттира иза т1аккха:
- Со берашций, цара вита а ца витина, эвлайисте лечкъаргех ловза вахнера. Цигахь, цхьана диттан га а тасаделла, к1еззиг лазийра сан мара. Юха, ц1а веъча, корта лаза баьллера сан. Ткъа х1инца урокаш еш вара со. Кхана, школера ма ваьлла охкура ду ас хас, кагтуха а хьокхур ю.
- Истоп! Кхин ма дийца! Хаватит! Иштта схьа х1унда ца боху ахь т1аккха саразу?! - к1анта шена пуьташ боттарна холча х1оьттинера 1уса. Ахказа дисина хас-м кхунна кхин башха гуш а дацара.
Шина куьйгаца шен мара йовлакх юккъе а боьллина, «хинт1», аьлла цунах схьадаьлла хи д1а а даьккхина, шен оьг1аз ваханчуьра г1еххьачул васта а луш т1етуьйхира 1усас:
- Тьфу, не1алт хилла оцу хьан мерана, х1ан хилла…
- Битахь сан мара… Дера хьайнчух хуьйцур-м бацара хьуна ас иза! – элира, къажа а къежна, Хьамзата.
Охьа а таь1на, кхунна ластаян тамехь х1ума лоьхучух сурт х1оттийра дас, вела ца вала а г1ерташ:
- Ватталхьан! Д1адала суна гучара, солач! Хьо ве Дала х1аллак, х1ан ве, хезначунна ловц а болуш!
- Витахь со! Со сайн хан кхаьччхьана лийра ву хьуна! – эккхитира, ведда, дехьа а ваьлла, кхерам т1ехбаьллий хиъча майраваьллачу Хьамзата.
- Э-х1ей! Тамаша бу ас хьо хьайн хан кхаччалц вита-м витахь, - буй а лестош мохь туьйхира Мумас, цхьа дайн велааьшна а дина.
Свидетельство о публикации №220032200805