Хьалыгъумрэ дышъэмрэ
Зы мэфэ жъоркъ дэдэ горэм Аббас, зэрихабзэу, губгъом Iоф щишIэщтыгъэ. Лъэш дэдэу зэрэпшъыгъэр къызэхишIагъэу, чъыг чIэгъым чIэтIысхьи гупшысэм зыритыгъ: «Алахьэм ушхъухьэ кIуачIэ къысхилъхьэгъагъэмэ зэкIэ IэкIэ сызынэсырэр дышъэ сшIын слъэкIынэу - Iоф къиными сыкъыхэкIыжьыщтыгъэ, сищыIэныгъи дэгъу дэдэу зэтезгъэпсыхьэщтыгъ».
ОшIэ-дэмышIэу гущыIэ макъэ зэхихыгъ:
- Аббас! Джы дэдэм къыбдэхъущт а узкIэлъэIугъэр! Зы пкъыгъо горэм IэкIэ нэс – ащ лъыпытэу ар дышъэ хъущт.
Аббас ытхьакIумитIукIэ зэхихыгъэр ышIошI хъугъэп. Ау щытми, зищэи мыжъо цIыкIу къыштагъ. IапэкIэ нэсыгъэ къодыеу, мыжъор дышъэ шъыпкъэ хъугъэ. ЕтIанэ Аббас ятIонэрэ мыжъом нэсыгъ- ари дышъэ хъугъэ.
ТхьамыкIэр лъэшэу гушIуагъэ ыкIи егупшысагъ: «Джы дэдэм къалэм сыкIощт ыкIи сапи, мыжъуи дышъэ сшIыщтых…ЕтIанэ, бэу чIыгу сщэфын, псыхъо Iушъом унэшхо щызгъэпсын, садышхокIэ къесыучъухьан… Шы дэхэ дэдэхэр къэсщэфыщт ыкIи щыгъын кIэракIэхэмкIэ зызэтезгъэпсыхьащт…»
Къэтэджынэу фэягъ, ау лъэшэу пшъыгъэ, мэлакIи, псы фалIи
къэлIагъ, кIон зэримлъэкIыщтыри къыгурыIуагъ.
«Пчэдыжь унэм къисхыгъэу сIыгъхэр сшхын»,- гум къилъэдагъ ыкIи гъомлапхъэр зэрылъ дзыо цIыкIоу чъыг чIэгъым чIэлъым ылъэныкъокIэ ыIэ ыщэигъ. Аббас хьалпIамэ къыштагъ, ау ыжэ зыделъхьэм, гъучI такъырым ецэкъагъэ фэдэу къышIошыгъ. Хьалыгъури дышъэ хъугъэ.
Дзыо цIыкIум бжьынышъхьэ джыри къинэгъагъэти, Аббас гуIэзэ ар къыпхъотагъ. Сыд фэдэ зэлъыщтэныгъа ащ ыгу къитэджагъэр, бжьынышъхьэ цIыкIури, ышхын ымылъэкIынэу дышъэ такъыр зэхъум!
ТхьамыкIэжъыр лъэш дэдэу къэщтагъ. Джы сыдэущтэу ешъощта ыкIи шхэщта? Сыдэущтэу дышъэ дунаим щыпсэущта?
ЗэрэхъурэмкIэ, псынкIэ дэдэу гъаблэмрэ псыфалIэмрэ арылIыкIыщт, къин пимылъагъоу къыIэкIахьэрэ дышъэри ыгъэфедэнэу игъо ифэщтэп.
Аущтэу Аббас егупшысэщтыгъэ: зэкIэ ыIэ зынэсырэр дышъэ мэхъумэ, ынэ къыпэшIошIыгъ лIэ зыхъукIэ гъаблэмрэ, псыфэлIэныгъэмрэ къинэу рагъэлъэгъущтыр.
Мыщ дэжьым ынэхэр къызэтырихи, чъыг жьаум зэрэчIэлъыр зелъэгъум, зэкIэ къызэрэпэшIошIыгъэр къыгурыIуагъ. Лъэшэу жьы къыщи, къушъхьэшхо зыпшъэ дэзыгъэм фэдэу, ыгукIэ псынкIэ къэхъугъ.
- Шыкур, Алахь, сыдэу дэгъуа зэкIэ пкIыхьапIэу къызэрэчIэкIыгъэр! – ыIуагъ ащ.
Свидетельство о публикации №220062901255