Профессионал

Сымэджэщым зэщытегъэоу, е фэкIэщыгъоу зи чIэгъуалъхьэрэп, ау цIыфэу къэсымэджагъэм сыда ышIэрэр? Iэзэгъу лъэхъу, IэпыIэгъу къыфэхъущтым дэжь макIо.
Аужырэ илъэсхэм кIымафэу къихьэрэм пэтхъу-1утхъур (гриппыр) къыздехьы, ащ (пневмония)_тхьабыл узыр хэпхын плъэк1ыщт. Ыгъэсымаджэрэр бэ. Ахэм пульмонологием иотделений ары гугъапIэу яIэр. Шъыпкъэр пIощтмэ, къычIэфагъэхэм яшIуагъэ арагъэкIы.

Пульмонологием иотделение узэрэчIэхьэу гу зылъыптэрэр, апэрэмкIэ, къэбзэныгъэр ары. ЯтIонэрэмкIэ, IофшIакIохэр шъабэу мэгущыIэх, самбырэу мэзекIох, яIоф агу етыгъэу агъэцакIэ. Сыд фэдэрэ IофшIапIи зэгурыIо-зэдэIужьэу чIэлъыр пащэу иIэм ыпкъ къызэрикIырэр зэкIэми ашIэ. ПульмонологиемкIэ ар нэрылъэгъу.

Отделением ипащэу Нэхэе Мирэ Мосэ ыпхъур сымаджэу къычIафэрэм апэ ежь еплъы, узыр къызэриштэгъэ шIыкIэр, уахътэу тешIагъэр, уцэу ыгъэфедагъэр, ыпэкIэ сымэджагъэмэ, фэшъхьаф уз иIэмэ, зыгъэгумэкIырэ щыIэмэ, и1ахьылхэм узэу къяузыгъэхэр - зэкIэ зэрегъашIэ, Iэзэгъу фэхъущтыр егъэунэфы, еIэзэщт врачым амалэу къыхихыгъэм зыщегъэгъуазэ, зэфэхьысыжьхэр зэдашIых, етIанэ сымаджэм зэреIэзэщтхэ шIыкIэр зэдаштэ.

Отделением сымаджэу чIэлъыр бэ – шъэныкъом къехъу. ЗэкIэмэ Мирэ екIолIакIэ къафегъоты. Езэщырэп.
Нэхэе Мирэ дышъэ медалькIэ гурыт еджапIэр Инем къызыщеухым, емыхъырэхъышэу Краснодар дэт мединститутым чIэхьагъ ыкIи дэгъу дэдэу ар къыухыгъ.

СпециализациемкIэ терапиер сэнэхьатэу къыхихыгъ ыкIи 1966-рэ илъэсым Адыгэ хэкум исымэджэщ IофшIэныр щыригъэжьагъ. ЕтIанэ Ленинград кIуагъэ ыкIи ординатурэм илъэситIо щеджагъ.
1988-рэ илъэсым терапевтическэ отделением ипрофиль зэблахъуи, жьы къэщэным фэгъэхьыгъэ узхэм яIэзэным тегъэпсыхьагъэу зашIым, «пульмонологическое» фаусыгъ ыкIи 1989-рэ илъэсым Нэхэе Мирэ пащэ фашIыгъ.

Упэщэныр зэрэмыпсынкIагъор врач ныбжьыкIэм къыгурыIощтыгъэ, бэрэ афэмыгъэдаIоуи къыдэгущыIагъэх. IэнатIэр ыпшъэ рилъхьанэу зеучъуалIэм, ишъыпкъагъэ рихьылIи, Iофыр зэригъэцэкIэщтым ишIэныгъи, ыкIуачIи хилъхьагъ.

АпэрэмкIэ, отделением итеплъэ зэригъэдэхэщтым, щыкIагъэу иIэхэр зэригъэцэкIэжьыщт амалхэм алъыхъугъ. Зыгу макIэу, жьы зымгъотэу, узым ригъэзыгъэ цIыфыр къызычIэгъуалъхьэк1э - палатэр къабзэу, дахэу,нэм ылъэгъурэм гур къыдищаеу щытмэ, Iэзэгъоу сымаджэм рахьылIэрэм ишIуагъэ нахь къэкIонэу ылъытагъ.

АщкIэ лъэшэу къыдеIагъэр ТхьакIущынэ Аслъан. А лъэхъаным ар зипэщэгъэ профтехучилищэм истудентхэм пульмонологием иотделение практикэр щаригъэкIугъ – пк1э хэмылъэу гъэцэк1эжьын 1офхэр аш1ыгъэх. Нэужым, шъхьангъупчъэ Iухъохэр зэблахъугъэх, пIэкIорхэр, тумбочкэ кIэпсыхэр палатэхэм ачIагъэуцуагъэх.
ЕтIанэ зыкIэхъопсыщтыгъэ галокамерэр Нэхэе Мирэ отделением къыщызэIуихыгъ.

Щыгъур – «аджал фыжь» а1о, ау Iэзэгъушхоу зэрэщытыри джы къыхагъэщыгъ. Галокамерэм щыгъу сапэр щагъэфедэ. Ар гъэшIэгъон дэдэу гъэпсыгъэ – щыгъу ун: жьы зымыгъотхэрэми, аллергие зиIэ сымаджэхэми щыгъу сапэу зыIуащэрэм ишIуагъэ къякIы, иммунитетыр къеIэты. Гъатхэм, дунаир къэзгъэкIэракIэрэ къэгъагъэхэр чъыгыхэм апизэу, къэлэ клумбэхэм къащзэIукIэу, нэр пIэпихэу дахэу зыхъурэ лъэхъаным, жьы зымыгъэтырэ цIыфхэр нахьыбэ мэхъу. АхэмкIэ галокамерэр Iзэгъушху.

ЕтIанэ, гу зылъатагъэр: уз зимыIэхэри мэфипшIым зы сыхьатрэ мэкъэмэ дахэм кIэдэIукIыхэу зычIэсхэкIэ, анэгушъохэр нахь фыжьэу, якъарыу къыхэхъуагъэу - «къэзгъэныбжьыкIэрэ эффект» зыфаIорэмкIи шIуагъэ пылъэу аушэтыгъ.
Ащ фэшъхьафэу жьы зымыгъотыхэрэм зишIогъэшхо якIырэр небулайзернэ терапиер ары. Аппаратэу уцыр пахъэ зышIырэм, зэнкIабзэу, нахь куоу Iэзэгъур тхьабылым негъэсы.
 
Дышъэр унэкIапэми, уизакъоу зэкIэри бгъэцэкIэн, уалъыIэсын, щыкIэгъэнчъэу бгъэпсын плъэкIыщтэп. Къыбдезгъэштэщтхэмрэ, узэплъырэм о унэкIэ зылъэгъущтхэмрэ къыбготхэмэ дэгъу дэд. Ащ фэдэхэр щымыIэхэмэ бгъэсэнхэ фае.
Нэхэе Мирэ ыIэ илъ коллективыр зын къылъфыгъэм фэд: зэрэлъытэжьхэу, зэдэIужьхэу, зыч-зыпчэгъоу зэдэлажьэх.

Врачхэм, медсестрэхэм ащебгъэжьэнышъ, джэхэшъо тхьакIхэмкIэ укIэкIыжьэу яIэшъхьэтет лъытэныгъэшхо зэрэфашIырэр, ящысэтехыпIэу зэрэщытыр нэрылъэгъоу къахэщы. ЗэкIэмэ ацIэ къетIуагъэми тыхэукъощтэп. Ящытхъу нэкIубгъом тефэщтэп. Ар пащэм иIэшIагъ.

Сэ гу зылъыстагъэу, къыкIэзгъэтхъы сшIоигъор врач 1эпэ-1асэм гукIэгъушхо зэрэхэлъыр ары. Зэгорэм къырихьылIагъэу, зишIуагъэ зэригъэкIыгъэ цIыфым ныбжьырэу ар ыгу къенэжьы, илъфыгъэхэми, Iахьылхэми, инэIуасэхэми шIукIэ игугъу афешIы, нэшIукIэ къырегъэплъых. ЦIыфышIум игугъу тыдэкIи щашIы, къемыолIагъэхэри, зэхахыгъэм ыпкъ къикIэу, Мирэ къыфэразэх. Исэнэхьатк1э ипшъэрылъ зэригъэцакIэрэм ипэгъокIэу тикъэралыгъо щыпсэухэрэм лъытэныгъэ къыфашIы.

Нэхэе Мирэ ишIэныгъэ зэрэхигъэхъощтым пылъ, узым узэрпэшIуекIощт амалыкIэхэм алъэхъу, къызIэкIигъэхьэгъэ шIэныгъэхэмкIэ ныбжьыкIэхэм адэгуащэ: тхылъхэм, гъэзэтхэм игупшысэхэр къащахауты. Симпозиумхэм, конгрессхэм ыкIи семинар зэфэшъхьафхэм ахэлажьэ. КIэу, Iэзэгъу амалышIоу къежьэрэр зэкIэ къызфигъэфедэзэ сымаджэм ежь-ежьрэу ишIуагъэ зэригъэкIыжьын ылъэкIынэу егъасэ.
 
Врач ныбжьыкIэу отделением Iоф щызышIэхэрэр Мирэ кIэрыплъыхэмэ, щысэ тырахызэ, егугъух, ясэнэхьат агъэлъагэ.
Сэнэхьатэу къыхэпхырэм уищыIэныгъэ зеппхыкIэ, бгъэцакIэу, Iофэу узпылъыр пшIомыкъинэу, угу къыштэн фае. Нэхэе Мирэ цIыфхэр шIу елъэгъух, ар зэрылэжьэрэ сэнэхьатымкIэ анахь нэшанэ шхьа1эу щыт.

К1эк1эу къап1омэ, исэнэхьат гукIэ фэхьазырэу къэхъугъ.
Мирэ псауныгъэр къэухъумэгъэнымк1э къулыкъум иотличник, Урысые Федерацием изаслуженнэ ыкIи инароднэ врач, Адыгэ Республикэм ипульмонолог шъхьаI, терапевтическэ аттестационнэ комиссием итхьамат, Соловьёв зэшхэм яшIухьафтын илауреат.