Аьхиримжи рейс

    (зарафатнан ихтилат)

Ригъ дагъдин кIакIнахъ ккебкрайи вахтна, ХяртIабег халуйиинна Дербент - Мягьячгъала шагьриз гъягъру чан рейснан нубат хъубкьру. Гъатху автобусдин раккнар тIаъну: “Дербент – Мягьячгъала аьхиримжи рейс ву гьа! Гъачай, гъачай!" – кIури, инсанариз теклифар апIуру. Аьхирки, мучIу хьуз хъюгърайи вахтна автобус абцIру. ХяртIабег халу рякъюъ учIврайи вахтна, сар кьаби баб жаргъури, автобусдин улихьинди, хиларра тIурччвури, гьадакуру.
- Ярхи уьмур туврувуз, жан! Баракаллагь йиз бай, баракаллагь увуз! –кIури, Аьламат баб гьяракатниинди автобусдиъ архьру.
-ТIалаб вуйиз увкан, йиз бай, - давам апIуру, гьигьлан духьнайи бабу. - Аллагьисан, Къяякентдиз хъуркьган, бабаз йип! - Фикрар мапIан, баб! - кIури, гафар кьатI апIуру ХяртIабег халуйи. - Хъуркьси, увуз хабар тувидиза. Белки, шафёрин кIваълан дубшнашул кIури, Аьламат бабу вахт - вахтнак хъанара швнуб-сабан чан тIалаб текрар апIури гъахьну.
Амма, текрар апIин - мапIан, саб хайлин вахтналан кьяляхъ, ХяртIабег халуйиз бабан тIалабнакан бегьемди гьархру ва, анжагъ, Избербаш шагьрин багахьна хъуркьрайигантIан кIваин гъабхьундар. –Вайгьарай! Вайгьарай! Гьамус гьапIру? Кьаби баб сарди йишвун мучIушнахьди наана гъягъюру? Вайгьарай, вайгьарай! - чав-чакна текрар апIури, фикрари ХяртIабег халу авара апIуру. Бабаз чIалкьана дарпиди, нивкIуз багахь духьнайи пассажирариз хабар даршлуси, машин илтIибкIну, Къяякент терефназди кьяляхъ худ тувну , чан автобус хъапIру...
- Магьа баб, Къяякентдиз хъуркьнахьа! – автобус дебккну, хъюхъра дазабгну, фурс кади кIуру ХяртIабег халуйи.
- Аллагьди уьрхрува йиз бай! – кIури, саб улра сабцIибди тIапIну, нивкI` ан уягъ гъахьи Аьламат бабу гьяракатниинди чан пенжкин жиб’ан кьюб давленияйин дарман адагъну ушвниъ ирчру. – Ари сарун хъапI, йиз бай! - Йиз швушву, Къяякент шагьрихьна хъуркьган, кIваълан дурубшди гьаму дармнар итIин дупнайиз гьа...