Орта Азия, эсги тыбыр, уллу эшик...
Беш къарнашны тууб,джашагъан джери...
Миллетлени къанлы джауу, Берия,
Алыб келиб тёкгенед бизни бери.
Онтёрт джылны джашау бизни сынады,
Болумубуз ишибизден танылды,
Къара джазыу бизге санау-санады,
Энди артха къайтыр мадар табылды.
Да, къайтайыкъ, да барыб а тюшейик,
Миллетибиз тууб, ёсген таулагъа,
Ёлгенлеге ахыр салам берейик,
Тилек этиб, джол тутарыкъ саулагъа.
Орта Азия-бизни тургъан элибиз,
Тау Къарачай-бизни туугъан джерибиз,
Тургъан элинг, дарий кибик, бир айбат,
Туугъан джеринг-джан джакълагъан керамат.
Къарнаш халкъла, сау къалыгъыз, джолландыкъ,
Туз гырджынны бизге халал этигиз,
Ата Джуртха къаушургъа алландыкъ,
Сиз да мында муратыгъызгъа джетигиз!
1957.
Къайтайыкъ. Стихи 50-х г. 20в
© Copyright: Исмаил Семенов-Джырчы Сымайыл, 2020
Свидетельство о публикации №220101301608
Свидетельство о публикации №220101301608
Рецензии