Габбо улуна. Белые стихи 60-х г. 20в

Джырчы Сымайлны сёлешгени да назмуча эди да, амал табхан адамла айтханын джаза тургъандыла. Насыб болуб, ол адамланы игилигинден, джолда-къолда айтыб кетген сёзюнден бир юзюкле бюгюн  сюйген халкъыбызны дараджалы адамларындан таба барабыз. Аллах барысына да, туугъанына, туудугъуна дери  насыб берсин! Юйдегиси барысына да бек бюсюреулюдю. 

ДЖАЙАУ  БАРА  ТУРГЪАНЛАЙ
МАШИНАСЫНА  МИНДИРГЕН  ГАББО  УЛУНА
/Габбо улу Мухамматдан алынганды. 1962дж./

Эй, Габбо дегенинг кёзде - алдыр, сёзде - керти,
Бу тукъумну уа барды дейме да намысы - бети,
Бютеу  Октябргъа  юлгюдю Габбону адеби, адети,
Туугъан - туудугъунда  танылады  тукъумну асыл келбети,
Хей, Габбо акъырын ишлер, алай этгени деменгили болур,
Юй - арбаз къурса ёмюрлюкге къурур,
Тынгылаукъ болур, акъырын, ёз сёлешир,
Хар адам бла келишир,
Алай ачыуланса Габбону аллындан джалла,
Тутунур джеринги къолла,
Къысха ачыуланыр да дженгил суур,
Алай ол къысха заманда да аллына тюшгенни  бургъу джеллей бурур,
Ой, Къарачайда ойма чалман - Габбодан,
Киришли къабакъ - Джатдодан,
Габболары баш тутхан тукъумду,
Кирисин кёбейтген а, эсеб бла тутумду.
Да, Габбодан болсун кюеуле,
Трам - Семенледен болсун келинле,
Семен тиширыуну аузундан, къолундан да келир,
Габбо эркиши да этер ишин билир,
Эй, Габбодан бет джойгъан чыкъмагъанды,
Бу тукъум юсюне кир джакъмагъанды,
Халкъгъа керек кюнде  Габбо ёрге тургъанды,
Къанлы  сермешде халкъ душманын да ургъанды,
Да, сен да, иги джаш, тукъум адетинги бузмадынг,
Джолда джайау баргъан къартны къаты бла озмадынг,
Сырынга кёре атлауунг,
Алгъышлыкъ болсун джашауунг,
«Уллу къазанда бишген эт чий къалмаз»,
«Асылдан асылсыз туумаз».