Хоншу келиннге. Белые стихи 60-х г. 20в

Джырчы Сымайлны сёлешгени да назмуча эди да, амал табхан адамла айтханын джаза тургъандыла. Насыб болуб, ол адамланы игилигинден, джолда-къолда айтыб кетген сёзюнден бир юзюкле бюгюн  сюйген халкъыбызны дараджалы адамларындан таба барабыз. Аллах барысына да, туугъанына, туудугъуна дери  насыб берсин! Юйдегиси барысына да бек бюсюреулюдю. 


БАШ ИЙЕСИ БЛА КЪАУГЪА ЭТИУЧЮ КЕЛИНГЕ
/Семенланы Азретни къызы Байдыматдан алыннганды. 1968дж./

Эй, адам кесин таныса, башхаланы да таныр,
Кесин таныялмагъан зауаллы башхаладан ёч алыр,
Мен тамамма – деб кесин юлгю салыр, алай бла да башы палахха къалыр.
Адам улу бир – бирине ушаса да,  ёсюйю, халиси башха,
Да, ана сютю бла бешикден салынады анга ёз къашха,
Ол халиси  бла  джашай барады адам, бош къызаса сен джашха.
Барыбыз бирча болсакъ,  джашау ушар эди сууу чыкъмагъан кёлге,
«Манга уша» – деб чыртда джабышма, къызым,  эрге, джуукъгъа, тенге,
Алай этиучю болсанг  адамлыкъдан кетерсе кенге.
Хар ким къалай эсе, алай къабыл эте джашарыкъса,
Адамды – деб, адамгъа джюрек къадауунгу ачарыкъса,
Алай бла кёлюнгде  рахатлыкъ табарыкъса
Ансы«къулагъынг, бурнунг манга ушамайды,
Джюрегим сени огъурамайды, алмайды»  -
Деб, хар адам бла гурушхалы болсанг,
Хар адамгъа, «былай  атлачы» –  деб, чекле салсанг,
Хар ким сенден джанлар, джуукъсуз – тенгсиз къалырса,
Бырнак этилиб татыуусуз джашаудан арырса.
Хар джанны кеси болумуна кёре джашаргъа  хакъы бар,
Дунияны тумагъы, салпысы, джигери, сагъы бар,
Хар тюрлю джансызы,  джанлысы, къарасы, агъы бар,
Барыны да Аллах буюргъан бир джашау  хаты бар.
Бирча болмагъанла бири  бирин тюрте,
Бир – джагъалаша да, бир – юркюте,
Бир – бирин билимге, акъыл ёсюмге сюредиле,
Алай бла джашауну амалларын кередиле.
Эришиу бла болады акъылны, этимни  ёсюую,
Тартышыу бла болады миллет джашауну джетишиую.
Къызым, бу джорукъну тюрлендиралмазса,
Аллахдан келгеннге къаршчы керилялмазса,
Хар билген  билгенин этер, алай бла джашау этер,
Мунга сагъаймагъан да кеси джашауун къуу – шуу этер.
Эй, биреу биреуге «менича бол» – демесин,
Кеси болумун башхалагъа кермесин,
Хар адам кесича бир Аламды,
Андан – Адамды.