Маулутда. Белые стихи 60-х г. 20в

Джырчы Сымайлны сёлешгени да назмуча эди да, амал табхан адамла айтханын джаза тургъандыла. Насыб болуб, ол адамланы игилигинден, джолда-къолда айтыб кетген сёзюнден бир юзюкле бюгюн  сюйген халкъыбызны дараджалы адамларындан таба барабыз. Аллах барысына да, туугъанына, туудугъуна дери  насыб берсин! Юйдегиси барысына да бек бюсюреулюдю. 

МАУЛУТДА ТЁРДЕ ОРУН БЕРИБ, КЪЫЙЫРГЪА ОЛТУРГЪАН
ЁЗДЕН УЛУ ЗЕКЕРИЯГЪА
/Ёзден улу Зекериядан эшитиб джазгъан джашындан алынганды. 1963дж./

Эй, башхагъа  сый  берген, кеси  сыйын танытыр,
Кесине къаллай сый тыйыншлы болгъанын  ангылатыр,
Иги игини кёрюр, игиден айтыр,  сыйлы табар  сыйлыны,
Аман хар джерде аманны  кёрюр, барды аны джюрегинде  къыйыны,
Сый бериу - адамны асылындан,  сый тюшюрюу - адамны пасыгъындан,
Да, Ёзден тукъум – сыйлы ёзекденди, ёмюрден къолу, кёлю да толу,
Бу тукъумда чийсил чыкъмаучанды, белгилиди онгу – солу,
Да, Зекерия, манга берген сыйынг бюсюреуюнгдю юйдегинге, тукъумгъа,
Сени адебинг да эсленир болсун бу джангы джетиб келген тёлю къауумгъа,
Тамадасыз тёр – къуу, сабийсиз арбаз – къуу- шуу,
Да келмесин асыл халкъыбызгъа адетни, адебни  унутур бушуу,
Адеб – биреуню  ишленмеклиги,  адет  а - халкъны  танытыууду,
Кесини  тин халисин башха  миллетлеге  ангылатыууду,
Да къалубалагъа дери тас болмасынла миллетибиздеги тёреле,
Кёлню, джюрекни кёкге тартханлай турсунла джуртубуздагъы тау ёреле,
Адетсиз, адебсиз бизни Аллах этмесин,
Къайары чарт - гурт адет бизни халкъыбызгъа джетмесин,
Да, Зекерия сенде эсленеди  ол онглу атангдан келген  асыл  энинг,
Эй, олтуруу - туруу танытыб къояды ким болгъанын  бу этинг – дженгинг,
Асыл – азмаз, ой, генджа тай арымаз,
Ким да сабийлигинден кёргенин этеди, анга да ишек болмаз.

Сыйынг - уллу,  юйюрюнг - онглу, джолоучунг - джоллу, фатарынг -  толу болсун!
Кёрюр къыйынынг, тамадагъа сый бериу, джер къойуу болсун!